Welcome To Knot ~ Season1: #35

星期二，終於可以放下假。
係時候要郁下。
 
行經Taz亞爸間酒樓，見到Taz係入面釣緊魚。
拿拿林send 個whatsapp叫佢出嚟。
點解唔直接入去？唔好喇！佢亞爸不嬲唔太鐘意我，始終，同行如敵國啦。
 
見Taz睇完whatsapp成個人立刻醒咗，同夥計交待咗聲，就飛跑咗出嚟。
佢係門口一見到我，就一手拉住我向前跑。
我隱若聽到佢亞爸係我哋身後用潮洲話係到鬧。


 
兩個人手拖手，係大街大巷咁跑，後面有個男人係到嘈…哈哈！其實都幾「烈火狂奔」feel！
 
跑到車站。
「嗄…嗄…嗄…俾你咁搞一搞，你亞爸…嗄…又再唔鍾意多啲喇！」我喘住氣咁講。
「嗄…嗄…要我老豆鍾意你做乜啫？Oppa鍾意你就夠啦！嗄…嗄…」Taz豪爽地用手抹一抹汗「你打算去邊呀？我好悶呀，帶埋我去啦！」
「我約咗佢喎！」我指指前面。
 
Taz沿住我指嘅方向望過去，見到有架黑色Saab 9-3 Aero駛緊埋嚟，車入面，就係靖。
今日其實我約咗靖去做瑜珈。


 
大無畏嘅Taz當然唔會理自己識唔識玩，靖一停車佢就跳咗上前座乘客位。
而我，就只好對住有少少尷尬嘅靖笑一笑，坐咗係後座。
 
靖將我哋車咗去上環一間細細地嘅私人場「呢到我個朋友架，你地有興趣都可以自己嚟book喎。」
「咪搞。山長水遠~」Taz嘅直腸直肚，有時都幾令人尷尬。
 
「不如我地換衫先啦。Taz 我有多條褲，你著住先啦。」同一時間，靖都遞咗件tee俾Taz。
Taz老實不客氣接過，就行咗去更衣室。
我拍一拍靖「佢獨女，一早俾人寵慣咗。」


「我知。」靖無奈咁講。
 
換完衫，我同Taz就係靖嘅指導下開始做啲熱身同呼吸。
雖然Taz貪玩，但佢玩個時，係好認真架。