Welcome To Knot ~ Season1: #33

5:30pm，Knot差唔多打佯。
平時呢個時間，舖面都冇乜人，而part time們係5:00就會放工。
 
但係今日…
Knot 似乎特別熱鬧。
 
Taz 睡眼惺忪咁坐係自己個專用位，樂少就係隔離「繼續努力」咁解結。
楊言一手收咗個結，放返入箱入面，再同Kwan仔一齊出動去收埋其他曾經被帶走嘅結。
 
見住個箱，由本來被洗劫一空，到宜家慢慢、慢慢多返啲繩結…心入面有種講唔出嘅感覺。


 
「唔好諗咁多啦！慢慢嚟！」係啫喱。
佢好似知道我諗緊咩咁。
我微微一笑，望出露天位。
路比一落咗更，就同靖一齊嚟，宜家兩個人就係出面食煙吹水。
佢兩個不時望入嚟；靖應該係望Taz,而路比，應該係望我同啫喱。
 
以路比嘅專業判斷，佢應該已經察覺到我同啫喱講咗。
路比做咩嘅？
當年佢貪玩學人走去讀餐飲，讀完唔鐘意喎，咪走去考警察。


點知，又真係俾佢考到喎！
 
6:05pm，King 同Winnie一齊到。
點解佢哋可以一齊咁耐，又可以包容到各有各玩嘅呢？
 
獅子拉住亞茶衝咗入嚟。
「Sky，一杯Secret俾亞茶一杯俾我，佢解咗兩條呀！所以有一杯係我嘅！」
 
「點解亞茶你唔俾我飲呀？」小卒係門口已經大叫，手上係一大盒pizza外賣。
「唔想。」乾淨利落，係亞茶嘅特色。


 
成班人見到小卒嘅外賣，就已經一窩蜂咁衝上嚟。
大家嘻嘻哈哈，好開心。
 
呢班就係我嘅好朋友…我班Knot友！
可以的話，我會盡我能力去keep住大家一齊。
真心架！