Welcome To Knot ~ Season1: #32

星期一，一個禮拜嘅新開始。
 
「Sky！」Kwan仔幫手準備開舖，楊言今日要返學「今日心情好似唔錯咁喎，成朝都笑！」
「係咩？可能瞓得好。」
「咁…其實你同嗰個H？」Kwan仔都係八卦架喇。
「今晚咪叫咗佢哋過嚟，一次過講囉，你同楊言都可以係到架！」
Kwan仔似乎好滿意呢個安排，開開心心咁去開舖。
 
啫喱亦都準時送嚟今日要用嘅面包同蛋糕。
「俾你架！」啫喱將一個小紙袋遞咗俾我，同時我都將一杯啱啱沖好嘅咖啡俾啫喱。


「駛唔駛咁夾呀你哋！」Taz 唔知係咩時候竄咗入嚟。
 
「關你咩事呢？」啫喱拍一拍Taz嘅頭「你咁早過嚟做咩？」
「痛呀Oppa！」Taz摸住頭。「琴晚出咗去玩，啱啱先返，咪諗住食個breakfast先囉！Sky！琴晚點？H有冇咩猴擒嘢出現？」
 
「咖啡。」我送咗杯咖啡到Taz面前「今晚一次過講啦，我唔想重複十萬次。快啲食，跟住返去瞓，唔係一陣你老豆又嘈！」
「咪理佢啦！喂！睇下Oppa送咩俾Sky先~」Taz一手搶咗我放係工作枱嘅紙袋。「咦？！咩嚟架？」
Taz拎起紙袋入面嘅面包。





係一個…好似丹麥包咁嘅紐紋包，但扭法複雜好多。形狀，有點熟口熟面。
「係Knot！」啫喱係我耳邊細聲講。
啫喱係仍然一臉厭棄嘅Taz手上拎返個面包。「以後我每日焗一個俾你，我冇咩可以做，唯有用麵粉整個結俾你，俾你食咗，希望個結就會解到。」



我笑了！呢個傻瓜，真係會用佢可以做到嘅方法，去幫我去氹我。