Welcome To Knot ~ Season1: #27

我上咗去機場離境大堂嗰層。
我係嗰層嘅Starbucks 坐底咗，點咗杯 Caramel Macchiato。
 
拎起電話，先send咗個message俾啫喱，請佢過嚟接我；再send個message俾嗰個人，多謝佢嘅幫忙，一切都已經處理好。
再用電話處理好去台灣嘅事，都差唔多成大半鐘。
 
抬起頭，啱啱就見到啫喱喘住氣咁跑過嚟。
「嗄~嗄~嗄~Sky，你…你冇事呀嘛？！」我示意啫喱先坐底。「我收到你message已經即刻入嚟架啦！」
 
「我冇事！」我對啫喱笑一笑「駛唔駛買杯嘢俾你飲？」


佢搖一搖頭：「係飲，都返Knot啦！H呢？佢掉低你一個係到呀？正衰人！」
啫喱愈講愈勞氣。
我拍一拍佢手背，再笑住講：「佢宜家應該同佢女朋友去咗食燭光晚餐。我哋返去喇。一路行一路講。」
 
我起身想行，啫喱突然將佢一直拎住係手嘅短袖裇衫披上我到：「褸住佢，我唔想你俾人睇蝕！」
我都重未嚟得切反應，佢又突然拖住我隻手，引領我行去停車場。
 
我發現佢做呢成串動作當中，其實都冇望過我。
但係跟住佢行，從佢身後望佢，又的的確確見到佢耳仔都紅晒。
 


我一路笑住跟住佢行，被佢拖住咁行。
 
上咗車，我開始講關於H嘅事佢知。
我有預感，今晚我需要講好多嘢佢知。