Welcome To Knot ~ Season1: #27. 啫喱

收到Sky嘅message，我立刻以九秒九嘅速度跳上車，都唔理有冇超速，向機場直剷過去。
 
點解會去咗機場？
發生咗咩事？
唔通H想來硬捉Sky上機？
Sky千其唔可以有事呀~
 
愈接近機場，我愈搞得清自己嘅心意。
或者咁講，我承認我係鐘意Sky，但我宜家搞清楚嘅，係我唔想冇咗Sky。
與其佢有可能被其他人搶走，我唔想自己有日會後悔。


我決定，點都要博一博。
 
泊好車，我正想跑上去離境大堂搵Sky，我突然諗起啲嘢。
我除咗我一直著住嘅短袖裇衫(平日我最鐘意將佢當褸咁著)，拎咗係手。
我諗Sky可能有需要披住佢，佢今日件露背…太性感啦。
但係如果我跑上去，我怕我會出汗整污糟件衫。
都拎住好。
 
上到去我見到Sky好安然咁坐咗係到飲咖啡。
好彩，佢冇事。


 
Sky話要返去，我決定鼓起勇氣。
我將件衫俾佢披住，又拖住佢行。
天啊~ 唔好fing開我呀！
 
咦？！ Sky佢冇抗拒到。
咁…係咪即係…？？
 
上咗車，佢開始講H嘅事我知。
但無論我點問，佢都係唔肯講係邊個幫佢搵料。


呢個人，可以咁短時間起到H嘅料，重要知道埋阿Sum邊班機返，佢都真係幾勁。
 
回程我專登駛慢啲，我好驚…
一陣一落車，我哋嘅關係又回復返以前咁。