Welcome To Knot ~ Season1: #26

我同H行到去抵港大堂。
 
我望住抵港航班顯示屏。
H試圖幫我，「Baby，搵邊個航班呀？我幫你。」
我只係笑咗笑，並冇打算回答。



「H，你拍過幾多次拖？」係等緊目標人物出現時，我問H。
「哈哈~做咩？咁快想知我有幾多經驗呀？」H一邊講，一邊笑。





「H，」我慢慢咁講「澳洲留學高材生，攻讀創意設計，畢業前已經有一間國際廣告公司羅置，係佢哋嘅澳洲分公司做起。因為有創意又有膽色，所以好快上位，後尾返嚟香港，係香港分公司做創發主管。」



「！！估唔到你對我咁有興趣喎Baby~」H先係愕咗然，但好快就回復佢輕佻本色。





我並無理佢，繼續講：「去澳洲之前有過一個初戀女朋友，但因為要去讀書，所以好自然咁就分咗手；去到澳洲冇耐，就拍咗一兩次拖，後尾識咗一個香港女仔，一個對你嚟講好有挑戰性、但又好愛嘅女仔。你哋一直都係離離合合，每次分手，你都會搵一啲你覺得好有挑戰性嘅人去追。基本上你都可以得手，但得到咗，你就唔滿足，結果又返去個女仔到…一直咁循環。」
「……」H一路聽，頭就愈望愈低。
 
「個女仔根本就係你嘅心結。你一直都無放低過佢。你唔覺咩？你一直去搵嗰啲好有挑戰性嘅女仔，都有個共通點，就係同你嗰心結一樣，開頭都係咁討厭你！」
「你重知咩？」H沈沈咁問。
 
「我重知，心結係要解！你要嘅人唔係我或者邊個，係亞Sum。我唔知你哋以後係點，但有時可以擁有，就要珍惜。」我對H友善咁笑「今晚餐飯，留俾你同佢啦。」
我指住出閘口，有一個高高瘦瘦嘅女仔，載住黑超拖住行李，一個人行咗出嚟。雖然佢冇化妝，但仔細啲望，你會發現佢係略有名氣嘅model。
 


我轉身準備離開。
H叫住我：「Sky！ 點解你知咁多？」
我講咗一個人名。
「唔怪得！……Sorry, and thank you！」
「得閒同Sum一齊嚟Knot，我請你哋飲Secret！」