Welcome To Knot ~ Season1: #22 路比

Sky嘅反應，大家都好愕然。
當Sky上咗樓，所有人嘅目光都轉投到我身上。
 
「嗱！唔好咁望我，唔關我事架！」我嘗試為自己開脫。
「Buddy，今次我都幫唔到你喇！」樂少做咗個雙手合什嘅動作，好似叫我折哀順便咁。
 
宜家，坐係圈入面俾人公審嘅人，應該係我。
「樂少~」我嘗試搵人求救。
點知佢…「Sorry Buddy！群情兇湧，愛莫能助！」




「嗱！坦白從寬，抗拒從嚴！」Taz繼續烈女上身。
「我…盡量啦！」
 
「啪！」獅子一野拍落我肩膀「講！ Sky 咩事！」
「嘩！好Q痛呀！」我捉住獅子唔肯放嘅手「咩呀？佢咪攰得制，返上去休息囉。」
「我係你就唔會玩嘢囉！」平時甚少講嘢嘅亞茶，永遠講嘢都係咁到位！
「我…邊敢呀！」望向靖，佢應該會救我。
「其實…」靖！我嘅救星開口喇！「我都想知咩事。Sky一年前係台灣返嚟，就變得…收埋咗。」
「Sky佢以前唔係咁架咩？」Winnie 問。


 
我環顧四周，大部份人都係Sky返嚟之後先識；我同Sky係上餐飲課程時嘅同學，靖係Sky去台灣前嘅瑜珈老師；另外，只有小卒，佢係Sky以前幫手補習嘅學生。
 
「Sky 以前唔係咁，佢好好玩，好外向，最鍾意望天。佢以前係…口直心快，咩都講架！呢~似Taz，不過冇咁惡！」小卒一口氣咁講，無視Taz想殺人嘅目光。
 
「咁究竟係台灣發生咗咩事？會令到Sky變成咁？」King問。
「唉~ 台灣…Knot…心結…繩結！你哋自己諗啦！」我扮晒高深「嗱！我應承咗Sky，佢唔俾講，我打死都唔會講！義氣架！」
 
「咁係咪…解晒呢到啲結，就得？」呢句，係小卒無奈嘅總結。