Welcome To Knot ~ Season1: #23

我一早就俾電話嘅messages嘈醒。
按一按電話，我需要嘅H資料係晒到。
呢個人，幾忙都好，我知佢一定會幫我。
我心目中已經知道要點做。
 
星期日會係一個好忙嘅日子，我要早少少落去準備，H嘅事暫時唔理得咁多。
 
一落到樓下，就已經見到Kwan仔同楊言係到做準備。
「早晨…你兩個咁早做咩呀？」我不禁問。
「早晨Sky！ 冇呀，咁早咗起身冇咩做，咪早啲返嚟囉。」Kwan仔似乎係賣口乖多。


「放心喎，琴晚搞夜咗，鐘我會照計喎。」我試探式咁回應。
楊言立刻接口「我哋都唔係為咗咁而早返嘅…」
 
古古怪怪，我行入工作枱。
佢兩個人立刻貼近枱邊企…
我揚一揚手，示意佢哋行開。
佢兩個無奈咁企埋一邊，我先發現枱底我用嚟裝繩結嘅箱…空嘅！
我轉身望住佢哋！
 
「唔關我事架Sky 姐。」楊言先嚟個不打自招。「係King哥話要拎去…解晒佢喎。」Kwan仔亦自爆「佢地琴晚係到審路比，不過佢咩都冇講，只係話咩台灣、knot、心結、繩結…叫佢地自己諗。跟住啫喱就話乜唔通要解晒啲結你先可以解心結。最後King同其他人就要我哋拎晒啲結出嚟，佢哋分晒，拎晒走。」


 
朋友！！
 
望望個鐘，就嚟九點。
宜家唔係時候去處理自己嘅事。我打發咗佢兩個去做嘢，我沖咗杯咖啡俾自己，等自己可以收拾心情做嘢。