Welcome To Knot ~ Season1: #21

一打人廿四隻眼，明白嗰種壓力嗎？
 
我望住啫喱。
呢個人…真係佢嗎？
我知道佢對我好好，係一個可靠又有責任心嘅人。
深呼吸一啖，準備好我嘅台詞…
 
「我…」
「…若有一天公開明目張膽的愛  我怕會讓你太意外…」係我嗰電話響。
我接聽咗。


「頂！」「妖！」「Shit！」
此起彼落嘅粗口係Knot中回響著。
 
「喂？…係…知道…等等。」我轉向Kwan仔「拎H嗰日留底張咭片俾我。」
我用手機影咗咭片，再send 咗俾電話中嘅人。
「喂？收唔收到？…係…唔唔…好…唔該晒你呀！…好，我爭你杯咖啡！拜~」
 
線已收，我暗暗呼出一口氣。
抬起頭，眼光接觸到嘅，又係嗰廿四隻探射燈！
 


「呀！大家可以放心。H嘅事，我會處理架喇。」我嘗試緩和一下宜家嘅氣氛。
「Sky姐」楊言細細聲係我耳邊講「其實佢哋都唔係關心你同H點，佢哋想知你同啫喱點咋！」
 
我抬頭望向路比。
「唔好望住我！」路比無奈地望返我「群情兇湧呀！而且我不嬲都鼓勵你解開自己個結，開始新一段關係架。都兩年啦！」
 
呢句說話，觸動咗我神經。
我低下頭，企咗起身，幽幽地講「有啲嘢，唔係話解就解。」
 
我推開人牆，行到樓梯口停低「Kwan仔，記得鎖門。」


講完，就上咗樓。