Welcome To Knot ~ Season1: #19

我真係唔知自己「被吻」咗幾耐。
我只係feel到自己個心狂跳。
我發現自己慢慢同化。
有一刻，我甚至有衝動，想回攬住啫喱。
 
就係喺呢個時候，啫喱放開咗我。
係佢個懷抱入面，我哋四目對望。
雙方都係到調整大家嘅呼吸。
 
啫喱轉向H，以挑釁嘅態度同H講：「你見到。Sky係我嘅人，你以後唔好再嚟煩佢呀。」


「哼~」H冷笑咗一下「你咪低能啦！ 你以為咁做，我就會信咩？ 就算你真係Sky嘅partner，我都有信心可以搶佢返嚟。你呢啲對手，我跟本唔會放入眼內。」
H推開啫喱，走近我「Sky，我講過，我要你心悅誠服咁鍾意我。」
佢望一望四周「睇嚟今日唔係同你食飯嘅好日，我第二日再嚟過。」
「好啦！ 我走先啦baby~」H臨走前，拎起我隻手，鍚咗一下。
 
我只係識呆咗企係到，目送佢上咗自己架車。
「我都話我唔係BABY囉！！！」當我回過神識得咁叫嘅時候，佢已經絕塵而去。
 
成村人推咗我同啫喱返入Knot。
宜家我同啫喱坐咗係到，俾人圍住係中間。圍觀加盤問者包括有目擊者Kwan仔、楊言同樂少，而因為樂少嘅場直擊再趕咗入嚟有Taz、靖、路比、獅子同埋小卒。


 
「其實大家都應該口乾，不如我整啲嘢飲俾你哋飲。」我嘗試借啲椅行開。
「你坐底。」獅子一聲咆哮，喝止咗我。佢會叫獅子，就係因為佢有溫柔的外表，卻有獅子撲兔嘅野心「你哋一日唔講清楚，一日都唔駛旨意走得開。」
「講咩啫？！」輪到啫喱嘗試發爛。「咁頭先情況危急。我唔係咁講點可以整走佢？」
「講？」輪到路比「根據現場記者嘅影片顯示，你唔止講咁簡單喎。」
「吓？！」我驚叫「樂少！你拍埋片呀？重有我都未問你，搞咩call晒佢哋入嚟呀？」
「咩啫？！」樂少不禁退後咗一步「係呀！ 係我call架，我由見到佢架車入嚟就開始call定馬啦。點知佢會做咩先得架？！」
「片係我叫樂少一路keep住拍嘅。好彩我咁叫咋，唔係邊到睇到咁精彩嘅一幕呀？！」Taz驕傲咁講。係咪錯覺？ 我覺得佢好似係對住靖咁講，好一個撒嬌feel！
「咪叉開話題。」靖好似好讚賞Taz咁「講返宜家先啦。」
「咁宜家你哋又公開講咗大家係partner，又當眾咀埋。算咩先？」小卒個死仔又插埋咀。


 
「咩算咩？」啫喱尷尷尬尬咁「都話頭先咁嘅情況，我冇得揀！」
「唓~ 就算有得揀，你都會揀咀落Sky到架。」Kwan仔一語中的，令啫喱塊面重紅。
 
「其實呢…」我嘗試解開宜家嘅困局「我可唔可以打個電話先，返嚟再審過？」
「好！ 橫掂亞茶未到，等埋佢先再審你哋。」路比作咗個決定。「Kwan仔楊言，有咩嘢食，我肚餓呀大佬，趕入嚟都未食嘢呀。」
大家又開始你一言我一語咁落order了。
 
我行埋咗一邊，想打個電話。
「喂？！ 係我。係…對唔住打搞到你，但係我諗唔到有邊個可以幫到我…嗯。我轉頭send張咭片俾你睇下，你可唔可以幫我睇下佢係咩人？ 嗯嗯…係…好…嗯…咁遲d再講啦。唔該晒。」