Welcome To Knot ~ Season1: #18

我同啫喱落到樓下。
 
其實係樓梯行緊落嚟嗰時，我已經需要迎接Kwan仔、楊言…同樂少（！！）嘅目光。
 
「樂少！你嘔完喇咩？」啫喱係我身後問。
「我就冇嘔喇，我驚Sky嘔啫！」樂少最鍾意語不驚人誓不休「驚到嘔呀！」
 
我同啫喱一齊順住所有人嘅目光望出舖外。
嘩！！！唔係呀話！！搞咩呀？
 


舖外有架啞黑色BMW M3停咗係到，我認得，因為我坐過！
H 以一身old school classic look 加佢幅Ray-Ban出現，靠咗係佢架車到。
佢手上拎住咗一扎，宜家演唱會都唔會再送嘅99枝（？）玫瑰花。
 
「楊言、Kwan仔，如果佢一陣係都要塞扎花俾我，你哋去後面幫我分咗佢！拎啲返屋企，留啲係舖，其他就連同我哋啲宣傳單張派俾人，做宣傳。OK？」我決定物盡其用。
無法，小生意，點都要慳啲。
 
好彩宜家都接近收舖，店面同出面都唔多人，唔係真係瘀死。
似乎我唔出去接招都唔得喇。
 


我行出店外，後面跟住成村人- Kwan仔、楊言、啫喱、樂少。
「請問有咩可以幫你呢？」我堆起服務性行業嘅專業笑容。
H將佢手上嘅花遞咗俾呀「Just for you, baby！」
 
我忍唔住打咗個冷震。
「呀~多謝先！不過我唔會要，同埋你認錯人，我叫Sky，唔係baby！」
「OK Sky，你上去換件衫，我今晚同你去食飯。著靚啲喎！」H一邊講，就一邊將扎花塞咗俾楊言同Kwan仔拎住。
「你都幾自大架喎，夾硬嚟都得嘅？！」樂少忍唔住第一個爆發。
 
「你啲friend呀？」H一眼都冇望過樂少，只係用手指指住佢咁問我「咁cute呀！不過你d friend 都係我d friend，我實尊重你架喎！」


H轉身望住樂少，伸出手「Hi！！H呀。」
樂少當然唔會理佢啦。
「OK Fine！」H收返隻手「Sky你重唔去換衫？今晚我哋第一晚拍拖喎！」
「拍拖？！」全場大合唱！
 
「Sorry 呀！」啫喱係我身後行咗出嚟，企咗係我同H之間「Sky今晚唔會陪你食飯，因為我唔批准呀。」
「你唔批准？邊位呀？」H開始將啫喱放入眼內。
「我叫啫喱。」啫喱深呼吸咗啖「係Sky嘅partner。」佢跟住轉身，攬住我個肩膀。
 
「Partner？！」今次我同啫喱都冇參與呢次大合唱。
我只係好愕然咁望向攬住我肩膀、企咗係我左手邊嘅佢。
 
「Partner？」H挑釁咁話「跳舞定生意上個啲呀？哼~」
啫喱並冇回應H。
佢只係突然攬住我條腰，一啖錫咗落我個咀到！ 重要係長嗰隻！！


 
搞咩？！連續被人強吻，差啲強姦、再嚟強吻？！
點解呢一幕，咁韓劇架？！