Welcome To Knot ~ Season1: #17

對於今朝嘅事，我並冇再去多想。
我繼續維持Knot的正常運作：沖咖啡、調飲品、整理蛋糕展櫃、點貨、計數…
 
星期六嘅下午係最多人最忙嘅時候。
基本上有Kwan仔同楊言係到，大家都係一腳踢。
 
5點。重有一個鐘就可以收工。
呼~ 我從未試過覺得一日嘅工作係咁攰，咁想快d完。
係咪因為呢排天氣熱，多咗人嚟玩水呢？
定係，呢排我太多嘢要去處理呢？


 
頭先嘅事，我根本冇時間去諗。
反而宜家有時間坐係到計下數，今朝啲記憶先返返嚟。
所有嘅記憶，令我面紅耳熱…啫喱嘅咀、佢嘅舌吻，佢強而有力嘅臂彎，佢對我嘅撫摸，同佢嘅無禮…
我真係呀~ 點可以咁架？！ 
但係…我又有少少懷念啫喱嘅擁抱。
 
「Sky姐…Sky姐？！」
「吓？！ 楊言，咩事呀？」
「我係問你咩事就真呀。你做咩一個人係到發呆，重成塊面咁紅呀？ 係咪重未酒醒呀？」


「冇事冇事。我上去洗個面先。」講完，我就三爬兩撥咁上咗樓。
 
「Sky？？」房門口有人叫我。我抹好臉一邊開門。
係啫喱！！！！
 
「你…你入嚟先講呀。」我開門俾啫喱入去，坐係房內的小梳化上。
宜家氣氛真係…尷尬都爆。
 
「你…頭先…唔該晒你幫我…我指幫我貼退熱貼…」面前嘅啫喱，一啲都唔似平日成熟穩重嘅佢。
「呀…你知道咗我上過去呀？」


「其實…我想問…呀…我…你…呀…」
「啫喱…其實你想講咩呀？」
眼見啫喱深呼吸咗一下，好似要鼓起好大勇氣咁「我係話，對唔住…我頭先…頭先…有冇…呀…你…」
似乎佢嘅勇氣好快就用完。
 
「咯咯…Sky…我係Kwan仔，我諗你要快啲落嚟睇下。」門外傳嚟Kwan仔嘅求救。
「Sorry呀啫喱，我哋一陣先再講，我想落去睇下咩事。」
「好…我同你一齊落去。」