Welcome To Knot ~ Season1: #14

嗯~ 頭好痛！發生咗咩事？點解…我會返咗屋企架？！嗯~
 
「咯咯…」
邊個搞門呀？好似搞緊我個頭咁。「入嚟啦！」
係楊言「Sky姐？你醒咗喇？梅姐整咗啲姜茶，叫你飲咗佢，同埋呢到有份多士，你食少少啦！」
「嗯…唔該你呀！我…我琴晚點返嚟架？」
「好彩我同Kwan仔係到過夜咋。半夜三更啫喱抱你返嚟架，佢放低咗你就叫我哋好好照顧你，跟住走咗喇。我同Kwan仔今朝好乖，準時開舖。宜家成十一點啦，我見舖面少人啲，先上嚟咋。」
「嗯~唔該晒你哋呀！俾我抖多陣，轉頭我落嚟架喇。」
楊言點點頭，轉身想走。
「呀~楊言，咁…今朝啫喱有冇送貨嚟呀？」


楊言諗一諗「冇呀！係強哥送嚟架！佢話啫喱今朝先返喎！」
「今朝？！咁我琴晚幾點返？」
「大約點幾兩點啦！」楊言講完，就轉身落樓下。
 
我兩點返到，就算車埋樂少，都無理由今朝先返架！唔通有咩事？
唔得！一用腦，個頭就痛！
 
我飲咗杯姜茶，個人好似真係舒服啲。
起身沖個涼換件衫，就落樓下。
Knot尚算正常，見到Kwan仔同楊言合拍而落力咁做，突然有種老懷安慰嘅感覺。


 
「楊言，可唔可以幫我問下梅姐有冇姜茶多？有就幫我入一杯，我想拎去俾啫喱。」
「哦！」楊言乖巧咁入咗去入面。
「Sky，早晨！」Kwan仔一邊整理緊工作枱，一邊同我講。「今朝好正常順暢，唔駛擔心呀！」
「睇得出！ 叻女呀！」我望住呢個已經做咗差唔多成年嘅part-time。
 
「Sky呀！我有嘢想同你講呀。」Kwan仔突然剎有介事咁同我講。
「除咗辭職唔做之外，咩都可以講。不過盡可能都唔好要我用腦，好痛！」
「其實我想話…我可唔可以轉full time呀？我下個月畢業，我想搵份工，儲下錢，遲啲等楊言都畢業，就可以請佢去旅行。」Kwan仔尷尷尬尬咁講。
我對個傻妹笑咗一笑「好，有planning係好事架！我正想問你有冇諗過幫輕下我。我晏啲同你傾下full time條件，宜家我想去搵啫喱先。」


 
正好楊言拎住杯姜茶出嚟。
我吩咐咗佢哋兩句，就出去喇。