Welcome To Knot ~ Season1: #13. 啫喱

我真係俾樂少激死 ，人飲佢飲，學咩人溝酒飲。好啦，宜家冧埋！ 想叫佢幫手照顧Sky，變相我要照顧埋佢。
 
好彩路比係到，佢幫我搬咗樂少去後座，而我就放咗Sky係前面乘客位。
幫Sky扣好安全帶，我先有時間同路比講兩句「唔該你呀路比~ 一陣麻煩你幫我同靖重有小卒講聲。」
「OK！ 你一個人真係得？ 你搞掂SEND個WHATSAPP嚟好喎。」路比係一個真心為朋友嘅人。
「好~ 我送完佢兩個再話你知。走先~」講完，我就上咗司機位。
 
我一直都習慣車Sky 同樂少週圍去，咁大家都住得近呀嘛。
不過如果可以，我真係想只係車一個人。
一路揸車返去，一路就確保車入面兩個人都安全(同千其唔好嘔！) 。我唔敢亦唔想開咁快。車上兩個人，都瞓咗。


 
其實做我呢行，見麵粉多過見人。不過因為有時都要出舖面幫手，我都儲咗唔少粉絲。
粉絲又點，我想要嘅，以前到宜家，都係嗰一個。
 
雖然會兜遠咗路，但最後我都係決定先送樂少返屋企。
唔知係條路太崎嶇，定係真係咁唔掂，坐後坐嘅樂少佢竟然…作嘔？！
我九秒九迫咗架車埋一邊，再拖佢出車俾佢嘔。
大佬，重辛苦過整麵包~
 
等佢嘔完嘔罷，擺返佢上車，俾咗d水佢飲。


係喎，Sky可能都想飲啲水喎。
去車尾箱拎咗支新嘅俾佢，開咗前座乘客道門，半拉半扶咁，迫咗埋去佢個位到，等佢上半身可以靠住我﹐而我就可以慢慢俾水佢飲。
「Sky~ Sky？ 飲啖水先啦！」我輕輕叫喚佢，佢睸眼半張，迷迷濛濛咁望咗我一眼，就自己張開個咀飲水。
 
有冇睇過AV？ 唔好扮純情答我冇，B又點，唔睇得架？
舊式AV入面，好多時好鐘意用SOFT鏡，影下個女優對眼，又影下個咀，咩半開半張咁，有時重玩飲水濕身…
 
頂！ 我做咩望住Sky，會諗起啲咁嘅嘢？？？
望住佢個咀，我腦海又閃過佢頭先醉咗個時，話個衰人H夾硬咀咗佢一啖？！？！？！？！？！
咁…佢…點可以咁架！ 我…


 
我好有衝動想咀落去…
我慢慢俯身向前，望住佢個咀，慢慢合埋自己對眼…
 
「嘔~~~！」
頂！！　樂少你又搞咩呀？？？？