Welcome To Knot ~ Season1: #13.Taz

成班友仔慢慢咁行出房，以為神不知鬼不覺。
咪玩啦，成十個人，大人大姐咁行出去，樂少重要唔小心撞跌枱面杯酒，搞到勁狼狽，佢唔係以為我盲同聾呀嘛？！
 
宜家成間房得返我同靖。
佢側身坐咗係我前面嘅長身梳化到，用佢嘅左邊身對住我。
長髪同時撥埋咗左邊，我根本睇唔到佢個樣。
 
「喂！ 做咩頭先唔俾亞KING講埋落去呀？」我嘗試搵D嘢講，緩和下氣氛。其實搞咗一排，我啲酒氣都開始散。
靖並無俾反應我，只係繼續KEEP住同一個POST坐係到。
我慢慢咁兜過中間張圓枱行埋去。「咁你做咩唔俾我出去玩？ 你咁緊張我做咩呀？」


 
仍舊無反應，但我人已經行咗去佢前面。
我本來想跪係到望下佢，但我件貼身黑短裙one-piece戰衣，根本唔容許我咁做。最後我決定坐係佢身邊。
 
我伸手撥開佢因為低頭而遮面嘅長髪。我feel到佢輕輕一震。
跟住見到嘅，就係一大滴一大滴嘅眼淚。
我覺得有啲內疚。
 
我用手輕輕幫佢抹咗面上嘅眼淚，今次好明顯，靖又再震咗一下。
對住眼前呢個美女，似乎有啲嘢我係需要去做。


我趨前攬住咗佢。
今次佢唔單止震咗下，重震咗好耐…因為佢開始係咁喊！
 
我Taz姐玩咗咁多年，最搞唔掂，就係女人嘅眼淚。
我都唔知點做好，唯有低頭，慢慢幫佢吻走啲淚水。
 
有一刻我feel到佢係停咗喊架。
但到下一刻我有意識嘅時候，我哋兩個已經攬埋咗一齊，我由鍚佢面變成同佢咀對咀緊。
 
我一邊落力咁回應佢嗰咀同條利嘅同時，手亦不自覺由摸住佢個頭，慢慢向下伸展，摸到佢條頸同赤裸裸嘅肩膀。


而佢，亦都由攬住我，變成掃緊我背脊。
 
我左手繼續扶住佢個背，右手開始摸到佢鎖骨。
其實我一直都覺得靖嘅鎖骨好靚好性感。
 
兩個人嘅咀一直冇停過，大家都好落力咁互相吸吮對方，舌頭亦都互相係到糾纏。
 
我輕咬咗佢下唇一下。
呢個時候靖慢慢地推開咗我，我一臉不解咁望住佢。
「呼~」佢深呼吸咗一陣，頭先太激烈，我同佢都要調整下呼吸。「我係鍾意你，亦會擔心你係出面玩會有危險。係我叫小寶專登為你調校特別嘅SHOOTERS，只係你先有。」靖用最溫柔嘅聲線講。
我嘗試再鍚落去，但係佢格開咗我。
 
「我知你未定性，未玩夠，要你認真咁去對待一段感情，暫時唔係你要嘅嘢。但我係認真架，亦都唔介意去守護住你。」靖深呼吸咗一下「我地不如HOLD住先，等你有一日想定落嚟，又想同我一齊，你先再同我開始過啦。但你要記住，呢到有個人、有個地方願意守護你。你要玩，就嚟呢到玩。」
 
靖講完，就企咗起身整理下自己。轉身，幫已經跟佢企咗起身嘅我撥好啲頭髮。「出去啦，啫喱個蛋糕好搶手架。」


靖轉身，拖住咗我出去。
 
唔知點解，我覺得靖好型！！