Welcome To Knot ~ Season1: #13

成班人好似做賊咁偷偷摸摸行出房，轉出大廳玩，由得靖同Taz係入面。
 
路比示意小寶將香檳同蛋糕推出嚟，要係大廳幫小卒慶祝。
蛋糕一推出，全場啲客都「嘩~嘩！」聲咁叫。
蛋糕係啫喱親自整，因為要開心share，個蛋糕成3磅重，係小卒最鍾意嘅芒果蛋糕。
我知啫喱整咗成日，所以今日佢話陪我去見H時，我都有啲愕然。
「嗱~ 個蛋糕係我哋嘅甜品達人啫喱整嘅！」樂少同路比開始係到玩唱雙簧「食過好食咁點呀？」「咪幫襯囉！嚟Silence飲杯嘢訂蛋糕又得。」「去門市買又得。嚟兄弟，派咭片！」
佢兩隻嘢真係~
 
全場大合唱完首生日歌後，Winnie帶頭俾咗個birthday kiss小卒，重要由King親自操刀，幫手影一張kissing嘅相。


Winnie 之後係亞茶、魚魚（小卒突然面紅）、獅子、我、樂少（！！）…基本上全場嘅女（同部份B)都咀過小卒，重要影咗相留念。
我估呢份作為20歲大個仔嘅生日禮物，小卒一定好滿意。
 
到大家都差唔多飲飽食醉，Taz同靖先係房行出嚟。
兩個都係成年人，頭先發生咩事，旁人根本唔需要過問。就連最八嘅樂少，都只係行過去遞咗兩份蛋糕俾佢哋，再曖曖昧昧咁笑咗下，就走開咗。
 
「做咩今日唔見你個妹妹仔女友？」我坐埋路比身邊問。
「散咗啦。我哋呢啲浪子嚟㗎！」路比隨意咁講，突然發現自己好似講錯嘢「呀Sorry！我唔係話浪子一定係咁，咁其實…」
「得喇！咁多年老死，我唔知你想講咩咩？都咁多年啦，我對佢…真係冇嘢喇！」我慢慢靠後，再將手上嘅飲品一飲而盡。
「嗯~咩嚟架？好難飲呀！」我望住手上嘅空杯，再望一望路比。


 
啫喱呢個時候都行咗埋嚟，見到我茫然嘅表情，加上面紅紅，即刻搶咗我手上嘅杯，放咗係鼻前聞咗一聞。
「路比，杯嘢邊個俾佢飲架？」啫喱面色一沈。
「我唔知喎，佢一路都拎係手。酒嚟架？」路比都忍唔住拎咗隻杯聞下。「嘩？！ Shooters…正常版喎。喂！ Sky？！ 你點呀？ 冇事呀嘛？」
 
其實Knot唔賣酒嘅其中一個原因，就因為我唔識飲。
一杯細細嘅shooters已經可以整死我，紅酒白酒不話下，啤酒都好啲，飲到一罐咁大把。
 
「嗯…嘻嘻~ 好暈呀！ 點解啲燈轉轉下架？」酒後的我，通常開始會胡言亂語「啫喱…嗯！ 你知唔知呀？ 頭先H夾硬鍚咗我個咀一啖呀~ 咁我咪去廁所洗面抹咀囉…嘻嘻~ 你聽我講，幾好笑呀！ 佢哋以為我俾人搞呀~ 哈哈哈。」
 


「好啦！ 唔好再講喇，你醉架喇！」啫喱塊面黑過黑色暴雨。佢將我成個人抱起，轉頭同路比講「你幫我去搵樂少返嚟呀，我揸車送Sky返去，去叫埋樂少幫手啦！」