Welcome To Knot ~ Season1: #12

靖雖然係一間酒吧嘅老闆，但千其唔好以為佢係鍾意四圍蒲嘅人。
自從2年幾前失咗，靖就開咗呢間Silence。
靖係我哋呢班人入面最成熟細心嘅，亦因為呢份細心，令佢投資有道，可以擁有自己嘅住屋同酒吧，都可以算係一個小富婆。
 
作為一個TBG嘅我，其實都唔可以否認靖真係一個靚女，係有成熟味道嘅智慧型pure。平日因為工作需要，靖會將自己長而微曲的頭髮盤係頭到，t-shirt牛記。
但今日係同小卒慶祝生日喎，靖就好尊重場合咁化咗個淡妝，放低咗把頭髮，亦都著返件黑色半截top加黑色貼身牛仔褲，盡顯線條。
 
當成班friend半拉半扯咁將兩個事主帶入房時，我拉住亞茶「Taz飲咗幾多？發生咩事？」
「我眼見佢就飲咗兩杯shots，之前有冇飲我就唔知。獅子話聽到Taz同人話去第二度再飲過，跟住靖就同Taz嘈起上嚟。」
 


入到房，兩位事主各據一方，但似乎已經冇咁火爆。
「究竟發生咩事啫？Friend嚟架係到嘈！」King首先開口「出嚟玩，要開心啫！」
 
「你以為我唔知呀？」Taz開始向靖發炮「次次我叫shots，你就要小寶（bar tender)溝少d酒俾我，明明我出去飲4、5杯shots就到頂，係呢到我飲8、9杯都冇事，你正奸商呀！呃酒錢！」
「我係奸商？我呃你錢？次次你係到飲我都無收你錢架！」靖忍唔住，開始反駁。
「咁你咪孤鬼寒囉，又要扮豪爽唔收錢，又要溝少啲酒俾人，扮晒嘢！」
Winnie都忍唔住，開始插口「Taz你誤會咗靖喇！佢就係見你次次飲大咗就四圍咀人，俾人抽晒水，先專登要小寶整d特別shooters俾你，俾你可以玩得開心啲又冇咁易醉架！」
「Taz呀！」King都加把口「你唔係唔知自己玩到幾癲，靖都係唔想你係出面玩有咩事，先唔想你出去飲啫。靖佢…」
「King！ 夠喇！」靖一喝，King即刻唔出聲。「佢鐘意點玩就點玩啦，我唔係佢邊個，管唔到佢咁多。」
 


Taz企咗係到，定定咁望住靖。
我暗暗同其他人打咗個眼色，全體慢慢退出間房。
有啲嘢，都係當事人去處理返好！