Welcome To Knot ~ Season1: #11

入到靖的office，我將一直收埋嘅繩結拎咗出嚟，遞咗俾路比睇。
 
「呢個係佢打嘅結，H當年去台灣見過佢。」跟住我就將H嘅故事由頭到尾講一次俾路比聽。
 
「個H都幾狼死喎！」呢個係路比聽完之後嘅總結「你估佢知唔知你同佢之後嘅事呀嗱？！」
「我估佢唔知。如果唔係佢唔會叫我自己同嗰個人傾繩結嘅事。」我嘗試分析一下宜家嘅情況。
「咁你諗住點？」路比真心關心我「除咗自大同霸氣咗啲，H都好似唔錯架！」
「你係咪玩嘢呀？」我拍打咗路比一野「你知我宜家咩都唔想諗，只係想搞好Knot！」
「痛呀！」路比摸一摸被我打嘅頭頂「成日攬住堆結唔放，你估你真係可以放底咩？算吧啦你！你明知身邊有咩人係到等你架，佢…」
路比都未講完，啫喱就開咗門伸咗個頭入嚟。「唔好意思，阻一阻你哋！但係出面抄大鑊，我諗要你哋出馬先得！」




我同路比根本都唔知發生咩事，只好跟住啫喱出去。
出到大廳，就見到中間另另舍舍啲人圍咗一個圈，圈嘅兩邊各企咗一個人…正確嚟講，係兩組人。
靖企咗係其中一邊，King 同Winnie都拉住咗佢；Taz企咗係另一邊，亞茶、魚魚同獅子都襟住咗佢。
 
樂少一見我哋出嚟，就拿拿淋過嚟打小報告「佢兩個為咗飲幾多同邊到飲而吵大鑊，差啲打起上嚟。」
「咩呀！係Taz想打靖咋！」小卒插晒咀。
路比眼見勢色唔對路，就示意King拉靖入VIP Room，同一時間要樂少就同小卒去安撫客人。
 


啫喱自己就行埋咗明顯飲到wing wing 地嘅Taz身邊，發號司令「我今日救過你，你要還！宜家同我入房四四六六拆掂佢！」
Taz係有恩必還，有仇必報嘅人。所以由啫喱落呢道命令，Taz冇得唔聽！