Welcome To Knot ~ Season1: #10

正當我係廁所洗面抹咀嘅時候，我成班Friend無視出面永遠唔會變短嘅人龍，一個二個都迫晒入嚟。又無啦啦夾咗我返VIP Room。
 
「死囉~ 做咩你一嚟到就入廁所架？」亞茶係第一個搶先"問候" 我嘅人。
「陰功，唔係咁就俾個衰人…」獅子第二。
「唔係掛，咁激玩車震定野戰呀？」又點會少咗Taz。
「點解你哋唔跟埋佢去架？」靖轉為責難樂少同啫喱。
「你…你冇嘢呀嘛？有咩可以同我哋講喎。」King 嘅女朋友Winnie 同魚魚都關心咁問。
「其實宜家咁，可唔可以告個衰人強姦架？」輪到樂少。
「告唔入架係咪呀？！ 女姦女呀？」小卒插咀。
「你講咩呀？！」啫喱好激動咁講「個衰人呀，唔好俾我搵到佢！」


 
「等陣！！！！」我忍唔住，企咗起身大叫「STOP！！」
好戲劇性地，全部人靜晒，個個望住我。
「你哋冷靜啲啦。」路比終於開聲「如果Sky真係有事，就返咗Knot，而唔係嚟Silence啦，真係貪呢到夠靜咩？！」
路比一講完，全部人嘅視線又返嚟我嘅身上。
「我冇事。咩事都冇發生過，冇車震、冇野戰、冇強姦，滿意未？！」我嘗試安撫成班朋友嘅情緒，但我知道，呢間房只會愈來愈嘈。
 
我呢班可愛嘅朋友，雖然個個性格都有d唔同，但我知道，佢哋成班都好鍚我。
亞茶係一個口直心快嘅G；
獅子就係一個成日好有要求嘅PURE；


King 同佢女友Winnie 都拍咗好耐下，好就好在大家會一齊嚟玩同識人，但又繼續對對方一條心；
魚魚其實好少同我哋出嚟玩，全因為佢要長假期，先可以由台灣飛返香港，呢條美人魚，係台灣嗰邊都引死唔少B架；
小卒係成班入面最細個，雖然佢成日話自己係B，要man啲。呢個6月27日生日嘅小朋友，今晚個party都係為佢20大壽而設。
 
成班人你一言我一語咁追問我頭先發生咗咩事，我真係唔想講太多。只係好簡略咁話我入廁所係想洗個臉冷靜下，同埋H俾兩條路我揀，一係拍廣告，一係同佢一齊。
咁當然聽到呢到，大家又七咀八舌咁去分析，想幫我做決定。
同一時間，我見到啫喱一直都冇出過聲，只係默默咁望住我。
我望向路比，投以求救嘅眼光。
 
路比望一望靖，靖就已經示意我同路比可以用佢個Office傾下計。