Welcome To Knot ~ Season1: #7

5點，我叫咗Kwan仔同楊言過嚟。
「嗱！呢條係Knot嘅後備鑰，橫掂楊言你今日都用咗2號房，你哋今晚係到過埋夜啦。我今晚都唔知幾點返。如果我有咩事，幫我睇住Knot。」
「Sky~你咪講到咁恐怖啦！」Kwan仔一手攬住楊言，搞到好似我今晚要佢哋住鬼屋咁！
「總之聽日9點正要開舖。星期六呀，會好多人，如果我真係未返你哋又搞唔掂，就掛牌休息一天啦。你兩個玩還玩，咪搞到立立亂，同記得執返好間房呀！」
 
打發咗佢哋上樓，又未夠鐘收舖，無無聊聊地我又開始玩打結。人一放鬆，思緒就好似解咗禁咁，一直自由地飄去。
 
「叮叮噹噹~」
「Welcome to Knot！」一抬頭，嚇咗一跳！「搞咩呀你？！」
眼前嘅樂少刻意gel高自己個頭，又唔知點解要摺起短袖tee嘅衫袖上到肩頭，想顯得大隻啲？


「喂！咁唔打得都睇得呀~」樂少尷尷尬尬咁講。
「宜家古惑仔講數咩？」我笑住離開工作枱，我呢個朋友真可愛「幫我收舖啦，我去沖涼換衫。」
「沖涼？不如一齊啦！」樂少笑淫淫咁講。
「咪玩！」我一手推開呢個傻仔，將鎖鑰拋咗俾佢「收舖啦！」
臨上去，我仍然聽到樂少係到自言自語「又收舖？我啱啱先收完舖喎，宜家又收舖？唔通我係收舖達人？」


當我換好衫落樓下時，已經見到樂少同啫喱一齊了。
相比樂少，啫喱簡簡單單嘅黑色tee配Chevignon深藍色牛仔褲，加埋Timberland嘅Classic boot，一切來得更自然。
 


啫喱一見我，就皺眉頭「你無第二件衫咩？換過佢啦！」
我望一望自己，又望一望樂少。
「有咩問題呀？Sky件衫好正喎！白色入肩one-piece，索呀！」樂少嘗試幫我辯護。
 
正當啫喱想反駁時，門外響起汽車嘅響號聲。
我無再理會啫喱嘅要求，自行就走出舖頭。
門前係一部全黑嘅跑車，我唔識咩牌子，但係我聽到樂少細細聲講「嘩~BMW M3呀！」
 
H由司機位行咗出嚟，示意我上車。
我行到車旁，並無打算上車。「你係邊個？我做咩要跟你行？」


「我以為我留咗張咭片俾你，已經介紹得好清楚。至於你上唔上車，你自己決定。」H說完，就拋咗一樣嘢俾我，之後就自己上咗車。
 
我望一望手中嘅物品，心涼咗一下。
我轉身同啫喱樂少笑咗一下，揮一揮手。「你哋落Silence等我呀！我一陣會過去，等我呀！重有，幫我同路比講，我搵佢呀！」
講完，就轉身上咗車。