Welcome To Knot ~ Season1: #8

一上車，H就踩油開車。
 
我好明白呢類自大狂所需要嘅，就係別人嘅注意。所以一路上雖然我有好多問題想問，但我都係選擇沈默不語。
 
「做咩咁靜？你唔係有好多嘢想問我架咩？」哈~不出所料，H忍唔住啦！
「問？我問咗你都唔會俾答案我，咁做咩要問？」我一邊回答，一邊將佢之前拋俾我嘅嘢握實係手，想從中得到更多力量。
H哈哈大笑「哈哈…好！不愧為智慧型靚G，唔怪得你連浪子Ocean都收伏到。」
 
Ocean！呢個好似一個魔咒嘅名字，再一次隱隱刺痛我個心。
我握實嗰樣物品嘅手，亦都因為太用力而指骨發白。


 
車最終停係西九海旁。
H落咗車，我唯有跟住做。
佢拎咗包煙出嚟，示意問我介唔介意，我崧一崧肩。
H扯住煙，慢慢講出佢要講嘅對白：「兩年幾前我同我ex去台灣旅行，咁啱去到OC，識咗Ocean。嗰時佢啱啱打算暫停營業，話要去香港搵一個好重要嘅人。」
吹咗一個煙圈，H繼續講：「後尾佢知道咗我哋係由香港嚟，就要我哋留低，要我哋話俾佢知香港嘅事，話想了解嗰個人多啲。我個ex重話佢好認真，又話可以令一個浪子肯認真停落嚟嘅人，一定係好叻。Ocean嗰時話，呢個人係一個好聰明好有智慧嘅女仔。」
 
講到呢到，我低頭望望手中的物品。係一個繩結，一個我一眼就望到出，係佢打嘅繩結。
「後尾我哋要繼續行程，佢就要飛香港。佢將呢個繩結俾咗我，話如果有日我地兩對人相遇，都有個記認喎。佢重話多謝我教咗佢唔少香港嘢，所以如果第日我有事要搵你哋幫手，就拎個結出嚟。哈哈哈~ 好似啲武俠小說咁。」H 將支煙屁股掉咗落地踩熄咗，轉身正面望我。「宜家我就係有嘢要搵你幫手。」
 


「呢件事係佢應承你，我一啲都唔知。」我嘗試控制自己嘅情緒，冷靜咁答佢。
「呢個係你同佢嘅事，你可以去問返佢。至於我同你哋嘅事，呢個先係我要處理嘅嘢。」H真係得勢不饒人，佢行到去我面前，我迫不得意要背靠佢車身，佢就雙手分別襟住我兩邊的車身上。
我同佢之間，就只有半隻手都冇嘅矩離。
輸人唔輸陣，我繼續以倔強嘅態度對住佢。
 
「唔好話我夾硬嚟，我俾你揀：1. 我公司要搵個廣告女主角，好啱你，我想搵你做；2. 我唔鐘意自己個女朋友拋頭露面，你做我女朋友，我有方法叫公司唔駛你拍。」
「哼~」我聽完之後真係忍唔住冷笑咗一嘢「咁叫有得揀呀？ 我揀3. 唔拍又唔做。」
 
其實如果宜家咁嘅姿勢，如果係男人我真係可以一個屈膝頂上去，咁就甩到身。但…點解啲防狼術，無教點對付B架？！