Welcome To Knot ~ Season1: #6

整個下午我都處於茫然狀態。
抓爆頭，我都唔知嗰個H係乜水。
 
「叮叮噹噹~」
小撞鐘又響起，呢個鐘數，應該就只有佢先會出現！
「Hi！ 我又黎啦~」樂少衝咗去4號枱，佢話呢個位可以睇到好多Bikini 靚女去玩水喎。「照舊，要多件double chocolate cake。」
 
Kwan仔將一杯ice peppermint latte同一件double chocolate cake放咗係枱上。
「咦？！點解唔係靚女親自招呼我架？」樂少望一望Kwan仔，帶啲失望咁拎起杯latte開始吮。
「哈~我宜家好失禮咩？」Kwan 仔正想發作，楊言已經衝咗埋嚟襟住佢。


「Sky姐煩緊，你咪搞佢啦！重有呀，我Kwan仔不知幾靚女呀，你因住下次杯嘢飲我哋加料俾你！」
「係喇對唔住囉！咁我眼中有伴嘅pure唔入靚女list 嘛！Sky 做咩啫？」
 
樂少係附近一間潛水用品公司嘅top sales，憑佢把口，可以令一個完全唔識游水嘅人買咗一大堆潛水用品。所以免得過，我都唔會入佢間舖！
我會用「麻甩」嚟形容樂少，作為TB嘅佢，我真係覺得佢比好多男人重麻甩！
不過，佢係一個好正義嘅麻甩，朋友甚至唔識嘅人有事，佢一定係第一個行出嚟。
每日3點到樂少就會蛇過嚟食tea，次次都係4號枱，次次都要我同佢吹下水。
 
Kwan仔、楊言同梅姐係到繪形繪聲咁將頭先發生嘅事講咗俾樂少知。
等陣…梅姐？！


「呀梅姐！」我行埋去呢堆八婆堆到「你唔係夠鐘過啫喱到架啦咩？」
梅姐面露尷尬，急急腳咁走咗去。
「重有你兩個，Kwan仔你重計緊鐘架，楊言頭先邊個話捱義氣幫我點貨話？」
 
等兩隻馬騮都走咗，樂少就一手拉我坐底係佢隔離。
「點啫？個H係咩人？佢想點呀？你係咪之前係邊到識佢呀？不如打俾Taz問下，佢去咁多party識咁多人！」
「等…等陣！」我試圖阻止樂少繼續發炮「其實我都唔知H係咩人，今晚會發生咩事，我一d頭緒都冇。滿意未？」
「嘩！咁你今晚咪好危險？搵人陪下你去好喎！」睇得出，樂少係真正關心我，多過想八卦！
「我都唔知點！」
「今晚我陪你去。」小撞鐘連同呢句說話，一齊傳入我耳。


「啫喱？！」我同樂少同樣都覺得好意外，呢個時數，啫喱冇理由得閒。
 
「點解你會過嚟架？咁我啲cookies呢？今日有冇得新鮮出爐架？無得食我會好失落架喎！」樂少又開始佢嘅連珠砲發。
「頭先梅姐過嚟講晒我知。」啫喱根本冇打算答樂少嘅問題，一個屁股就坐咗落嚟。「今晚等埋我先去見嗰個人，你一個太危險啦！」
「喂！當我樂少死架？Sky今晚預埋我！」
 
突然間，我覺得好幸福。無咗一個「佢」，但有一班好錫我嘅朋友