Welcome To Knot ~ Season1: #5

Knot平日嘅午市，主要都係招呼附近嘅居民、老師同學生，有時都會有啲遊客同打算/已經出海玩嘅人。
 
Knot走cafe路線，每日午市主要係賣包、三文治、沙律，最多都係一款意粉。所以Knot甚少招呼到附近地盤嘅工人。
亦因為咁，嚟得呢到嘅，都係有要求的人（嗱~咪斷章取義！我冇話工人們冇要求呀！）
 
午飯時間一分一秒咁過，人客都陸陸續續咁離開。
店內的客人就只剩下兩三枱。
楊言呢個時候由樓上，拎咗d碗碟行咗落嚟。
「點呀傻妹？好d未？」我沒有抬頭望佢，只係專心咁沖咖啡。
「好好多啦，多謝Sky姐。」楊言乖巧咁幫我開始抹爐頭。


「你就好囉！有人今日心不在焉，寫錯3次單，送錯2次枱喎！」
「吓？！真係架？Sky姐你唔好鬧佢啦，最多我幫手執好呢到，同一陣間幫你點貨啦！」
「傻妹！你哋冇事我就最開心！」
 
「Sky！」Kwan 仔一臉苦惱咁走埋嚟工作枱「4號枱個客好煩，你可唔可以…？」
我視線越過Kwan仔嘅肩頭，望向靠近窗嘅一枱。
「好呀！你入嚟替我，6號杯咖啡未整，順便幫我去後面請梅姐入嚟拎d碗碟去洗。」正想行出去，我同擦身而過嘅Kwan仔講「氹下人啦！先認錯唔代表真係你錯，只係代表你緊張呢段關係啫！」
 
離開吧枱，我立刻堆上笑容行去目標人物身上。
佢一個人，著住淺藍色裇衫同黑西褲，重戴住幅Ray-Ban太陽眼鏡。


枱面上放咗杯咖啡，同埋食剩半份Caesar chicken salad三文治。
「你好！我叫Sky，係Knot嘅老闆。唔知係咪啲嘢食唔啱食呢？或者我有咩可以幫到你？」可能見得太多TB，我習慣唔會一開口就叫人做先生小姐。
 
那個人將一直望住個海嘅眼光，慢慢轉投到我身上。
「你係老闆娘？」一開聲，TB。
「係呀，我叫Sky，請問有咩可以幫到你？」
呢個TB都算無禮，佢嘅目光將我由頭掃射到落腳，又由腳掃返上嚟！
我Sky 最討厭無禮貌嘅人，所以你做初一時，十五就歸我！
「小姐！請問有咩可以幫到你？」係，我認，我係專登大聲d叫佢小姐架！
 


那人不發一言，將啲錢連同一張好似咭片嘅物體，放咗係枱上面，再企咗起身，只係喺我耳邊講咗一句，轉身就走咗！
 
我呆咗咁企咗係到，直到Kwan仔同楊言走咗過嚟。
「Sky姐，你無事呀嘛？個人同你講咩？」
Kwan仔拎起啲錢同咭片「廣告公司-創發部主管 H！」
「H？ 咩H？Sky姐你識佢架？」楊言問。
 
我擰一擰頭「佢頭先話，今晚7點嚟接我喎！」
「吓？！」Kwan仔、楊言、同清潔嘅梅姐都一齊俾同一個反應。