Welcome To Knot ~ Season1: #4

放心喎~ 成間Knot唔會淨係得我一個人做。


Knot逢星期二休息，開九收六。咁當然，民宿同夜晚包場除外啦！
最忙嘅時段，我都有兩個part-time幫下手，其實基本上平日我係請一個part-time，假期先要兩個。
但係Kwan仔同楊言呢對孖公仔，成日好似見少陣都唔得咁，一個返工另一個都會出現，所以我都由得佢哋。
 
今日忙完一個朝早，又係時候準備午市嘅繁忙時段。但係，都重未見孖寶任何一個出現。
時間緊迫，我都唔理得咁多，著手開始要準備午市。
 


「叮叮噹噹~」
大門個小撞鐘努力咁發出佢獨有嘅歡迎語。
「Welcome to Knot！」我反射性地回應。
抬頭一看，係雙眼有少少紅腫，拎住一大個袋嘅楊言。
楊言一個箭步衝埋嚟吧枱「Sky姐，樓上有冇房？我想搬嚟住幾日…」
「吓？！房就有，你冇嘢呀嘛？」
楊言擰一擰頭，就自行上樓。行到一半「Sky姐！唔好俾個衰人知我係到喎！」
 
話口未完，小撞鐘又響起，今次輪到Kwan仔。
「你係到做咩呀？咪搞住Sky啦！」Kwan仔跑上樓梯，一手就扯住楊言個袋。兩個人就係咁係條樓梯到拉拉扯扯。


「咪理我！我唔駛你理呀~」
 
我決定要阻止呢場鬧劇。
「喂兩位。」我行到兩人中間的地方，一手㩒住被拉扯嘅袋。樓梯唔係好闊，宜家變咗三個人一齊迫咗係一個好細嘅空間到。「就嚟午市，兩位可唔可以唔好係到嘈住先呢？Kwan仔，你俾楊言上去休息下先，佢對眼咁，你都唔捨得佢去招呼人客架？！Kwan仔你去換衫返工，楊言你上去二號房休息下。」
 
發完一司令，我眼尾都唔望一眼，就放手落返去做嘢。
雖然我係老闆，但我知呢兩個小朋友會聽我講，佢哋都幾尊重我架。
果然，Kwan仔死死地氣落返嚟，著咗條全黑長身圍裙，就係工作枱準備工作。
 
我煮咗份白汁海鮮意粉，沖咗杯朱古力，加咗少少肉桂粉，拎咗上去俾楊言。


「楊言，我係Sky，入得嚟嘛？」
二號房的門慢慢打開，楊言示意我入去。
「煮咗d嘢俾你食，飲埋杯朱古力，休息下。有咩事都好，樓下個傻妹都係緊你架！」
楊言默不作聲，一直用匙把朱古力攪動著。
我起身想離開「Sky姐！」楊言叫住我「你點知佢緊我？」
「佢唔緊你，就唔會追住你唔放啦。」
我微微一笑，轉身落樓下做嘢。
 
係架，一個人唔緊你，就唔會追住你唔放。
思緒，又飄到「佢」由台灣追到嚟香港嘅時候。