Welcome To Knot ~ Season1: #3

都有成大半年，解得到繩結嘅人，一對手數得晒。
究竟係結難解，定打結人心難解呢？
 
「喂！你抹同一隻杯都抹咗半粒鐘喇~」Taz將我由回憶入面拉返出嚟「你呢隻係咖啡杯，唔係酒杯呀！抹咁耐托咩？」
「小姐，其實你斯文啲得唔得呢？講嘢咁粗，邊識到女架？」
眼前的Taz，係個種爽朗型嘅美女，短而刻意抓亂嘅頭髮，化淡妝，高高瘦瘦。走一轉老蘭，不如幾多外藉同本地麻甩飛撲過嚟。
可惜對呢個不分嚟講，男人係useless！
同佢去clubbing 好處係成日有人請飲嘢，問題係永遠冇女埋身，啲直女直頭當佢仇人咁！
 
「唓~」Taz乾埋最後一啖lemonade「要我斯文，一係你癲咗睇錯，一係搵到個食得住我嘅，唔係都幾難！」 


 我倒咗杯冰水俾佢「今晚跟小卒去clubbing囉，或者有艷遇！」
「睇下點先啦！係喎，下星期五呢到有冇booking？」Taz 上半身爬過工作枱，想拎我本booking簿睇。
因為呢個動作，佢件闊圓領絲質上衫出賣咗佢均勻嘅身材，令佢個條事業線毫無保留咁顯露出嚟。
「喂！」我拿拿淋幫佢㩒住件衫，可惜都係遲一步。
坐係另一角落有個肥肥大大嘅鬼佬，向住Taz走埋去。
「Hi Pretty！ Can I buy you a coffee？」
「嘖！買咩咖啡啫，要飲我唔識買呀？ NO！ Sorry！」
Taz揚一揚手，想打發個鬼佬走。
點知個鬼佬一手捉住Taz揚起的手。
「Come！ Come and sit with me！」


「嘩！痴線架！」Taz好努力想甩手個鬼佬隻手，但人哋堂堂一個大男人，邊有咁易！「Shit！ What are u doing？ Let me go！」
 
我望住Taz被個鬼佬拉咗落吧凳，正想衝出吧枱救佢時…
「Hey man！ Let her go！ She's my girl！」
一個同Taz 差唔多高的人出現，一手捉住鬼佬個手碗。兩個人對望咗半分鐘，鬼佬終於放手！
「OK！ She's yours！ Sorry！」
鬼佬同對方握一握手，放底錢係吧枱，就走咗！
 
Taz等鬼佬一出咗門口，就飛撲攬住佢個救命恩人。「多謝你救咗我呀啫喱！嚟~俾我咀啖先！」
啫喱係附近一間餅店嘅老闆，亦都係我舖頭所有面包糕點嘅供應商。


「咪玩！」啫喱一手推開Taz「你女仔嚟架，俾d矝持啦！你咪搞到Sky添呀！」
啫喱將面包搬入工作枱，又幫我將啲蛋糕放入展櫃。
「知你緊張Sky喇！」Taz嘖了啫喱一下，轉嚟同我講「Hey baby, 下星期五幫我hold場，本小姐要搞party！ 我要have fun！ 等我上btf招人先！夠鐘，我返公司啦，bye~」
 
「成日都係咁，都唔俾人check 下架！」我望住Taz背影，感覺到佢傻大姐背後的結。
「你呀！」啫喱企咗係我隔離，成頭汗。我倒咗杯lemonade俾佢。「你自己都要小心d先得架！頭先見你想衝出嚟救Taz咁款，又唔睇下自己幾弱先得架！」
啫喱一口氣飲晒成杯lemonade。
 
我識咗佢都應該差唔多一年，由當初我自己走去佢舖頭傾合作，到宜家佢 日日親力親為咁幫我送貨。
有時舖頭有咩燈油火蠟問題，都係呢個高大，手瓜有小老鼠嘅TB幫我搞。
 
啫喱用紙巾抹一抹咀，又摸一摸個剷晒青嘅頭，望住我。
「Sky！」啫喱成個人哄咗埋嚟，嚇得我要退後一步。
正當我不知所措時，啫喱又展露出招牌冧死女嘅笑容，退返後一步，等我哋之間有返個合適距離。
「你幾時先同我去街啫？」啫喱輕浮嘅態度，有時都搞到我唔知佢講真定講笑。


「等你搞掂身邊d妹妹仔先講啦！快d返舖頭啦！」我將啫喱半推半拉咁推出門口，目送佢離開。
「喂！唔該晒你呀！」我係已經行遠嘅啫喱身後大叫。佢揚一揚手，轉了半個面在笑。
 
有一剎那，我以為眼前嘅係「佢」。
 
我知啫喱一直都對我好好，但一日結未解，我都唔想掂感情事住。