Welcome To Knot ~ Season1: #2

Knot重有一個小遊戲。
我呢到有好多大大小小嘅繩結，每日一個名額，你有方法係3分鐘內解到，我free你一杯House Label - Secret。
 
Secret係當年佢教我整的，我menu上冇呢樣嘢，俾錢我，我都唔會整！太多秘密係入面喇，我唔想係無啦更嘅人面前自揭瘡疤。
 
我都唔係好記得個繩結遊戲係幾時開始。
自從返咗嚟香港，我一諗起佢就會亂打一個繩結。亂打極，唔知點解都會用返佢教過我的方法去打。
打下打下，咁就有一大堆。唔係話放唔低，但有時候有啲人同事，點都會佔用咗你一啲ram。
可能呢啲就係情意結。
 


好似係嗰時開張無耐，成班friend嚟玩。路比係第一個拎起我放係工作枱下面其中一條繩結嘅衰仔！
佢望一望個結又望一望我「又諗起佢呀？」
路比係唯一知道我同「佢」嘅事嘅人。
「冇…都咁耐。不過慣咗無聊無嘢做就玩結，咪儲埋咗咁多！」
「邊個佢？咩結嚟架？」路比個女朋友仔一手拎咗條繩，嘗試解開。
「咪多事！人哋嘅嘢咪理咁多！咪搞人哋啲嘢啦，俾返人！」路比真係義氣仔女，我知道佢唔會係大喇叭，所以當初先放心同佢講。
 
女朋友仔根本就冇聽入耳，只係好努力咁想解結。「咦？！我…好似解到喎~」
「吓？！」Taz由遠處撲咗埋嚟，同女朋友仔一齊將條繩又拉又扯「係勁喎！ Sky啲結都未試過解開到架！」Taz轉頭望住路比「係咪單純啲嘅人先解到架呢？我哋呢啲飽歷風霜，心太複雜，所以唔識解？」
 


「喂！有咩玩？」明明係露天位抄緊人牌嘅小卒，八八卦卦咁又走埋嚟吧枱！「今晚housewarming 好熱鬧喎。你哋咁悶坐係到做咩啫？」
「咪嘈啦！」Taz連眼尾都冇望過小卒「就嚟得喇！」
「得…得…就得！」女朋友仔好緊張咁叫。唔知點解我見到路比臉都紅晒！
 
「Yes！！！！」Taz 大叫一聲，搞到全場都靜晒望住佢！
「呀~無嘢。」我嘗試打圓場「佢同呢個妹妹仔解到Knot第一個結，我會free一杯House Label - Secret俾佢哋！恭喜晒下~」
 
一個結換一次Secret，值！
 
我相信全場大部份人其實都唔知咩事，但一大班人係到叫囂，你唔係唔叫呀！