韓暄一下短篇: 國王的新樓
在不久嘅將來，一個遙遠嘅銀河系⋯⋯
電動門打開，一對配合黑色長袍搖擺節奏向前踏出步伐嘅黑色長靴行入室內。
對於呢個好似同黑暗完全融為一體，但又能夠喺黑暗中展現出完整輪廓，堪稱為黑暗同恐怖喺人類世界嘅代言人，啱啱行入房間內就令到整個房間嘅溫度好似跌到零度一樣，每一個人都好似立即結咗冰，就連大氣都唔敢透一口。
「呼、呼～～」
由佢黑色面罩上嘅揚聲器傳出嘅沈重呼吸聲，就好似暴風雪吹起嘅寒風刺痛住室內每個人嘅聽覺神經。
「Lord Vader」一位身穿高級軍官服飾嘅中年人第一個勇敢破冰上前迎接恐怖大王嘅來臨。
「有咩新發現？」經過聲音處理器傳出嘅無機質聲音，令軍官有一剎那以為自己面前嘅係一個禮儀機器人，不過佢好清楚，機器人無可能散發出能令自己接近窒息嘅壓迫感。
「喺一個邊境星系，發現有叛軍出沒嘅行蹤，」軍官一邊壓下心裡嘅緊張，一邊打開面前嘅星系圖，不斷將坐標修正到自己所指嘅星系，然後繼續進行匯報：「不過其中一個係居住密度好高嘅星球，人口稠密而且階層結構複雜，追查方面會有困難⋯⋯」
「幫我聯絡負責嗰一區嘅行政官。」幾下沈重嘅呼吸聲過後，一道冷冷嘅命令由揚聲器傳出。
「大人，屬下已經聯絡咗佢，佢已經喺通訊器前候駕傳召。」軍官為自己嘅妥善處理得意洋洋地回應。
「將通訊影像打開。」唔知道黑暗嘅化身有冇留意到下屬嘅演技，只係冷冷轉身去到全息通訊影像產生裝置面前。
通訊影像好快就打開，影像入面隨即出現一個神情猥瑣但著得身光頸靚嘅臃腫老伯。
「Vader大人⋯⋯」雖然只係全息影像，但見到黑暗嘅化身企喺自己面前，肥老伯已經肴哂底。
「叛軍捉到未？」
「大人，叛軍好狡滑，不過我哋已經加緊追查，好快就會有好消息⋯⋯」
「好快即係幾時？」
「我⋯⋯我已經吩咐咗手下加緊追查⋯⋯相、相信短時間內就會有消息⋯⋯」肥老伯feel到氣氛有啲唔妥，不斷用衫袖擦面上好似豬油咁標出嚟嘅汗水，而且緊張到剩係識重複同一個答案。
黑暗嘅化身冇再出聲，只見佢舉起右手放喺面前，好似空氣中有件睇唔到嘅物件比佢揸住一樣，與此同時，全息影像中嘅肥老伯突然變得面容扭曲，雙手捉住自己條頸，就好似比人掐住條頸咁變得透唔到氣。
企喺Vader大人同埋肥老伯身邊嘅手下見到呢個情景都顯得有啲慌張，傳聞Vader大人嘅原力修為深不可測，甚至比皇帝陛下更厲害，但估唔到超越遙遠嘅星系，佢嘅原力都有咁嘅威力，如果唔係親眼所見都唔敢相信。
「帝國唔需要垃圾，皇帝陛下需要嘅係高效嘅管治，睇嚟你無法勝任咁重要嘅工作，我而家宣佈你嘅任期正式完結。」
唔駛一陣，肥老伯就斷咗氣，跌咗落地。
然後，Vader大人指住原本企喺肥老伯身邊嘅瘦削手下，同佢講：「由而家開始你就係新嘅行政官，我要盡快知道叛軍嘅消息，唔好再要我等。」
「遵命，Vader大人。」新行政官蛇頭鼠眼嘅面上浮現出狼狽又緊張嘅表情，戰戰兢兢咁臨危受命。
全息影像通訊亦到呢度結束，睇到黑暗嘅化身喺自己面前消失，新行政官而家先可以鬆一口氣。
「新任行政官大人，咁我哋而家點做好？」企喺一邊目睹全程嘅其中一名副手，即刻想巴結新行政官，埋嚟獻殷勤。
「嘿，隻死肥豬蠢到懵炳咁，抵佢有今日，其實我一早已經有方法，只係冇同隻肥豬講，如果唔係我點上到位。」
「大人英明！萬歲萬萬歲！」副手立施妙手擦鞋之技，希望得到新官嘅重用。但佢個心不禁喺度諗，若然肥豬嘅下場係咁，呢位新上司又點可以保證自己唔會步肥豬後塵？不過暗地裡人人都叫呢位蛇頭鼠眼嘅長官做「鷹狼」，手段非常厲害，以佢咁心狠手辣，話唔定真係可以明哲保身兼上到位。
之後，新任行政官向整個星系發表講話，指出肥豬長官因為腳痛要告老還鄉休養，帝國已經正式委任自己領導星系未來嘅發展。
講話當中發表咗一個重點，就係星系當中將會以一種前所未見嘅物料去建立一個最前進同最大型嘅城市，比年輕人規劃佢哋嘅將來：
「呢種前所未見嘅物料，需要擁有對帝國徹底忠誠嘅純真之心先可以見到同觸摸到，由呢一種物料所建造嘅城市，將會遠勝全銀河所有星系，本星系嘅未來將會由呢種物料帶領步入另一個新時代，所有人民都應該緊隨帝國嘅步伐，為建設帝國嘅未來而努力！」
喺新行政官慷慨激昂嘅陳詞之下，新城市嘅發展工程正式展開！
喺貴族同埋富豪嘅推波助瀾下，新城市嘅樓花炒風極為熾烈，再加上為咗表示自己對帝國嘅忠誠，幾乎人人都爭住最少認購一個單位。新行政官更同時推出一個政策，就係即使冇錢買樓嘅低下階層人士都可以得到帝國政府全數資助貸款，可以負數息口兼三年免供優惠全額按揭借錢買樓，實行人人有樓住，人人有未來。
帝國從來未試過咁闊佬，好多人都失去理性，幾乎每人點都申請返一個單位，再加上為咗表示自己嘅愛國心，更加義無反顧訓身去盡。
以星系嘅科學技術，要建造一個全新嘅城市應該唔需要好耐，但預定建築新城市嘅地方就一直都只係一片空地，冇任何動工嘅跡象。
到咗工程預定完工嘅嗰日，新行政官帶同重要官員同埋貴族、富豪們，去到新城市舉行啟用儀式。
由飛船上望去新城市之處明明依然仲係一片空地，但新行政官就不斷大讚：「宏偉！實在太宏偉！絕對可以展現出帝國嘅富強同偉大！有咗呢一座標誌住帝國偉業嘅全新城市，相信帝國嘅霸業一定可以千秋萬世，令宇宙永享太平！」
坐喺新長官一旁嘅一眾貴族同富豪見到長官望住一片空地不斷讚嘆，都覺得有啲困惑，但為咗表現自己嘅強烈愛國心同擦鞋技藝，都紛紛表示支持同埋作一大堆吹噓嘅說話和應長官。
巡視期間，一眾平民只係不斷注視新長官顯露威儀嘅長長行列，但個個都敢怒而不敢言。明知比人搵笨都好，但為咗顯示自己嘅愛國心同埋唔敢得罪帝國，都只好忍氣吞聲。
突然，一名年約8、9歲嘅小孩喺寂靜嘅人群入面高呼：「狗官！為咗討好帝國就出賣我哋嘅利益！絕地武士一定會返嚟對付你哋！」
小孩身邊嘅成人想制止佢但已經嚟唔切，新長官一聲號令：「捉住佢！」
一眾帝國軍已經湧入人群，追趕嗰名小孩嘅行蹤。
新行政官亦同時下達另一道命令，但凡冇買樓嘅所有人一律捉拿，以叛國罪當做叛軍同黨嚴查，反抗者格殺勿論。
呢單嘢搞到好大鑊，好多人比帝國軍捉咗，仲有好多都喺被追捕嘅時候殺死。
已經成為傳說嘅絕地武士始終都冇出現，但帝國軍由始至終都捉唔到當時喺廣場大叫嘅嗰位小孩。
究竟係咪一切都係新行政官所佈嘅局？嗰個小孩都係官方安排？
真相係點冇人知，但整個星系嘅人只知道大家從此就要供一層只有愛國心先見到嘅空中樓閣，而行政官同班貴族富豪就賺到盤滿缽滿，行政官仲因為捉拿叛軍有功獲頒帝國星章⋯⋯