韓暄一下短篇: 來生不做比卡超

我有一個朋友，我稱呼佢為比卡超。

比卡超顏值都幾高，喺呢個冇乜女性夠薑素顏出街嘅喬妝時代，佢就算素顏出街都絕唔會失禮。

再加上佢性格爽朗，冇乜港女氣場，初初識佢嗰陣仲以為佢嘅裙下之臣隊列應該長過搶住兌日圓嗰條龍，不過佢口口聲聲話冇，我當時唔太信。

早兩年佢終於嫁咗人，老公都幾靚仔，拍咗拖5年先結婚，應該都揀定揀啱㗎啦。

早排撞返佢，大家傾開計先發現，佢個世界根本完全唔係我諗咁樣。





原來佢少女時代曾經遇過一位賤男，比對方呃咗鑊金嘅，結果從此以後都唔再相信所謂嘅愛情。

冇幾耐遇到而家個老公，當時都冇諗係咪真係好鍾意呢個，只係覺得對方穩穩陣陣，比到自己安全感，唔好再玩自己就已經好好。

不過當時相處落都曾經因為對方同自己生活上唔係咁夾而分過一次手，但喺對方極力挽留同各種承諾下，又心軟同返對方一齊，最後仲結埋婚。

不過佢同我講，其實結婚嗰陣冇咩感覺，只係覺得家中兩老話要結所以先結，只係覺得完成咗自己人生一個責任。

本來一直都冇乜問題，但後來去到打算生小孩，比卡超突然開始覺得驚。





因為佢老公可能自少比人縱慣，個性比較依賴，家中好多事務都由比卡超負責，但佢老公又真係當佢係自己養嘅小精靈咁樣樣管到實，唔比佢做呢樣、唔比佢做嗰樣，總之就好似個死𡃁仔咁當比卡超係阿媽咁駛同時又當佢寵物小精靈咁養。

雖然佢老公對佢係好專一，但佢就絕對感受唔到愛情同婚姻嘅樂趣，只覺得所有嘢都係一份責任。

一諗到個老公已經要好似小朋友咁湊，生多一個甚至兩個出嚟咪要佢一個人湊兩個或三個死𡃁仔？仲要湊一世⋯⋯一諗到咁佢就開始驚。

呢樣嘢仲直接影響到大家嘅性生活，本身佢老公份人已經冇乜情趣，再加上心理陰影面積越來越大，比卡超根本配合唔到。

最大鑊係，佢老公覺得有問題嗰個係佢，自己一啲問題都冇，叫佢試下去睇下醫生⋯⋯





比卡超發覺同呢個男人一齊咁耐，原來對方連對自己最基本嘅認識都冇，最後都忍受唔到，決定要離開呢個男人。

比卡超係一個好傳統嘅女人，佢要做呢個決定其實經過好多思想掙扎，但一想到同呢個男人一齊的話前面根本唔會有開心嘅將來，佢無辦法唔咁樣做。

結果，比卡超都係返到原點，亦終於明白自己生命中最想要嘅其實係乜嘢；自己當年受傷後變得畏首畏尾，拒絕求變其實好錯。

我相信好多人都有比卡超當年受到傷害後嘅諗法，做人嘅嘢，穩穩陣陣、得過且過就算啦，唔好搞咁多嘢啦，免得自己再受不必要嘅傷害。

但結果，經過多年嘅兜兜轉轉，錯過咗好多唔同嘅時間同風景，最後都要返去原點面對最重要嘅問題——人始終要勇敢求變。

有人話，比卡超之所以拒絕進化，係因為唔想進化後自己嘅性格改變咗，唔可以再同小智好好相處。

不過，性格可能會變，但比卡超同小智一齊經歷嘅所有嘢都唔會變，大家仲有共同嘅回憶，只不過未來行嘅路可能會變得唔同，亦可能因此而創造更多更美好嘅回憶。

結果今日係點？小智努力咗接近20年都贏唔到冠軍，一切都要回到起點，比卡超拒絕進化係咪都有啲責任？





時代不斷在變，人唔變只會被時代淘汰，小精靈亦一樣。

人點可以唔化？所以人人都要進化。

係時候擺脫舊有嘅過去，來生不做比卡超。