《末日東方之珠--- 淪陷香港後花園》: 15.
嗱，我都話阿Don一定識抆番啲箭出黎架啦，佢咁醒！
喔喔喔，你好你好。原來你就係泳茹，我叫阿文，同阿Don好細個就識架啦，不過我中三之後就冇讀，唔怪得之唔識你啦。
唔記得介紹添，開車呢位係湯豪，佢姓湯，單字一個豪。點識？喔，其實件事係咁既。
今朝我同你分開之後，就即刻踩衡油趕番屋企，好驚老豆老母有事，但係沿路又唔知做咩好塞車喎，我一路抄小路，去到啟德先鬆番少少。
我出左啟德隧道之後，一路直衝，本身諗住到偉業街先轉落去，點知衝到咁上吓，突然見到前面啲車停哂喺度，啲司機個個落哂車，雙手舉高投降咁款喎，咁我心急番屋企，咪調頭諗住兜第二條路走。
我兜番落啓祥道，終於入咗九龍灣啦，但係精明既我開始覺得怪怪地，明明食飯時間，點解條街會咁冷清？
我停咗架車喺屋企樓下，就行入大堂諗住搭lift上樓啦，點知平時最勤力既看更陳伯竟然唔喺度喎，咁我咪禁lift囉。
我上到12樓，一出lift就見到一地都係報紙啊，衫褲行襪啊，好似人地走難咁，咁我就即刻走去諗住打開屋企度門啦，點知我屋企竟然中門大開喎，我就即刻入去睇吓啦。
唔睇由自可，一睇我就真係把鬼火。間間房都好似俾人摷過哂咁，我地啲衫褲少左好多，屋企個夾萬啲錢都冇哂，就連掛係牆上面啲相都唔見哂，一定係俾人爆格啦！但係我諗深一層，唔係喎，賊仔冇理由偷相格，唔對路！平時我唔喺屋企，老母有咩要講都會寫低痴喺雪櫃度，我行入廚房，果然有張黃色memo紙，上面寫住
「仔，有危險。」
次次都係咁，寫埋哂啲冇可能睇得明既野！於是我反轉張紙
「九龍灣運動場見，淘大危險，勿近。」
次次老豆都會喺後面補番兩句，真係唔明佢地點解唔寫喺同一面。
咩話？唔好講廢話？我講得太詳細？我唔講詳細啲，你點feel到當時有幾咁緊張啊！乖乖地聽埋先啦！
我見廚房啲刀唔見哂，平時老母教拳用嗰啲纏手帶都唔見埋，就知道事態嚴重。
正諗住出發去九龍灣運動場搵佢地之際，有兩個人渾渾噩噩，搖頭晃腦咁走入黎喎，哇，佢地嗰陣味，我到而家都仲記得好清楚，好似有成千隻死老鼠走咗入黎咁。咁我咪同佢地講，兩位大佬，呢度我屋企，你地唔可以隨便走入黎架喎。
唔講由自可，一講佢地就發哂癲咁撲埋黎，哇！嚇到我丫！我嚇到跌咗落地，佢地好快就撲上黎，我用盡全力用手爭頂住佢地喉嚨，佢地把口真係好鬼臭。我突然諗番起，西九龍公路上面人食人既畫面，再望下我眼前呢兩個癲佬，張開血盆大口，不斷壓落黎，失哂常性咁。
當時，我個腦淨係得一個諗法。
死得。
佢地愈黎愈大力，我又成晚冇訓，根本唔夠佢地黎，喺佢地就快咬到我之際。
「咻———哧—咻———哧—」
「噗———噗———」
佢地兩個突然全身放軟咁攤喺落我個身度喎！哇！我即刻尖叫咗一聲，好彩嗰陣附近冇其他人，如果唔係一定俾人笑死。
我仔細一睇，原來佢地個額頭上面插咗兩枝短箭。我訓係地下，抬頭反轉180度咁望向窗外，隱約見到對面大樓有個人影。
我即刻推開身上面既屍體，走去窗邊，果然有個人。我咪即刻對佢大嗌，喂！你殺咗人啊，但係你又救咗我喎，咁而家條屍點算啊！
對面大樓個人影就係湯豪，佢舉起食指放喺嘴唇上面，我咁醒緊係get到佢叫我細聲啲，唔好俾人發現啦。佢再指指我停喺樓下架車，應該係要落樓下集合既意思？
Okay，咁我咪諗住落樓囉，點知我行到門邊，又咻一聲，一枝箭插落度門度，哇！頂丫，差少少就射中我啦！咁我咪行番去窗邊，睇吓佢想點。
我望出去，佢將拳頭放喺額頭度，然後突然向空氣揮拳喎，哇真係唔知佢想點。我睇極都唔明，咪開始模仿佢既動作囉。過咗一陣，佢突然大嗌，抆番啲箭俾我啊死蠢！
車，你玩哂啦，又係你叫我唔好出聲，而家又咁大聲喺度嗌，你啲戲咁屎，鬼睇得明咩。啊！Sorry，Sorry，你專心揸車。
之後我地就開車去運動場啦，到咗之後，我地見到既係接近一百個人喺運動場入面，好慢咁好似冇乜目的咁行黎行去。
我本身諗住落車去搵老豆老母，點知湯豪拉住我，佢叫我睇清楚啲先，但係我都係忍唔住，跑咗落車。
我行到圍欄旁邊，終於見到場內有幾恐怖。入面既人，幾乎個個都滿身是血，有啲人啲內臟仲跌哂出黎，我忍住吐意，行去門口，點知度門俾人鎖住咗喎，咁我咪大嗌囉，老豆老母你地喺邊啊！唔嗌由自可，一嗌，場內一百個人全部同時轉頭望向我，個個都雙眼反白泛紅，最靠近我嗰個人既眼窩甚至有蛆蟲爬出。
佢地開始發出咆哮，不斷衝向我呢邊，好彩有圍欄，如果唔係我而家可能已經……
身後既貨VAN傳黎喇叭聲，我知道係湯豪叫我快啲上車，但係我未搵到老豆老母。我開始跑步，圍住運動場外跑咗一個圈，確認老豆老母唔喺一面之後，就上咗車。
佢地一定唔喺入面，我老豆個頭咁潮，我老母又咁好打，我知佢地一定唔喺入面，佢地一定冇事。
上番車之後，我就打俾佢地啦，點知打唔通，我就開始打俾你啦，但係又係打極都打唔通，幾驚你有事啊。我地咪喺附近兜黎兜去，諗住搵路出去，到啱啱終於打到俾你，我都安心番啲。
好彩搵番你咋阿Don。
黎，攬吓先。