《末日東方之珠--- 淪陷香港後花園》: 16.

「張叔張嬸咁好打，一定冇事既，應該係電話冇電先搵佢地唔到，放心。」我推開攬得我好實既阿文。
 
「湯豪，多謝哂你照顧阿文，我想問吓我地而家去緊邊？」叫佢湯生好似有啲生外。
 
「大帽山。」
 
「大帽山？點解？」
 
「我地晏晝嗰陣已經兜過哂成個九龍，發現幾乎所有可以離開九龍既路都俾警察封死哂，所以阿豪就話上大帽山最安全，啲發癲既人應該唔會得閒到走上山。」
 




「就算山上面冇行屍又點？我地喺山上面可以做啲咩？而家最重要既唔係應該番屋企睇吓屋企人安唔安全咩？我地而家連發生咩事都唔知啊！」上咗車咁耐，泳茹終於出聲，我捉住佢隻手，安撫佢既情緒。
 
「行屍？」湯豪既聲音非常低沉。
 
「係咁既，泳茹佢係護士，根據佢收到既消息，嗰啲發癲既人其實喺醫院既時候已經停哂心跳，所以正確啲黎講佢地已經係屍體，只不過唔知點解仲識行識走，於是我就稱呼佢地做行屍，畢竟…人…應該唔會係咁……？」
 
「頂……真係walking dead……」阿文喺副駕駛座暗罵咗一聲。
 
「Don啊，你Daddy,Mommy喺屋企等緊你架，做咩要上山啊，我地走啦……」泳茹一臉擔心。
 




的確，我好心急想快啲番屋企，但係而家茂茂然落車，我地都唔去得邊，加上佢地又話離開九龍既路封死哂，我地根本唔知九龍出面既狀況係點。
 
既然湯豪堅持上大帽山，自然有佢既道理。
 
我又打咗一次電話番屋企，確定佢地安全之後，就叫泳茹放心，唔會有事既。
 
「Don，你地訓吓先啦，應該冇咁快到。」
 
咁既情況，再攰，我都訓唔著。
活於恐懼與不安之中，問誰又能安心入眠？




 
我望住窗外一幅又一幅一閃而過既景色，泛黃既街燈，紅綠交替既的士小巴，高矮參差既樓房店家，明明依然係我熟悉既香港，點解呢一刻變得咁陌生？
 
唔知過咗幾耐，我一張開眼既時候，架車已經喺山頂停低咗。
原來肉體既疲憊始終敵不過理智既折磨。
喺副駕駛座上既阿文，挨喺我身上既泳茹，熟睡得如同初生嬰兒。
我輕輕將泳茹平放喺後座，等佢可以訓得舒服啲。
 
「原來星空，係咁靚。」湯豪發現我行咗出黎。
 
我抬頭望向天空，無數的星星如鑽石一般閃爍不停，似在眨眼，又似在招手。
我低頭一望，本應醉人既夜景因為部分地區停電而顯得殘缺不堪，與繁星閃爍既夜空形成強烈既對比。
 
「西貢都睇到咁靚既星星，下次帶你去睇。」
由細到大，只要心情唔好，我就會走去碼頭，訓喺細沙上面，望住星星，感受寂夜既寧靜。




 
「你住西貢？」
 
「嗯，離呢度好遠。」
其實放眼望去，西貢就喺我視線範圍之內，難怪人地話，這麼近那麼遠。
 
「泳茹係你女朋友？」
 
「係好朋友。」我輕笑搖頭。
 
「我女朋友曾經話過，老咗之後想喺高山、森林入面隱居，體驗吓最原始既生活，打獵捕魚，每日只為食物煩惱就夠。」
 
湯豪托一托佢副運動型太陽眼鏡繼續講。
 
「佢成日都話，去畢架山度住幾日，再搬去大嶼住幾日，然後去大帽山渡假，儲夠經驗就去歐洲。」




 
「雖然我嗰陣成日笑佢傻，但係我都係去咗考救生員，好努力咁操fit自己，就係為咗可以好好咁保護佢，做佢可以依靠既男人。」
 
「今朝見到佢不斷發冷抽搐，我真係好心痛，除咗用力咁攬住佢之外，我根本唔知可以做啲咩，明明call咗白車，但係等咗好耐都未黎，佢同我講完最後一聲我愛你之後，就暈咗。我企起身，諗住開車載佢去醫院，點知佢就發哂狂想咬我，喺我地掙扎之際，佢就喺窗口度跌咗落去……」
 
「我即刻跑落樓，點知成街都係發哂狂既人，不斷向我攻撃，我好不容易終於掙脫，跑番上樓。拎起武器之後先覺得，冇咗嘉欣，我根本唔想活落去，於是我很去窗邊，望住樓下嘉欣條屍發呆……」
 
湯豪冇再講野，我諗佢當時應該係望望吓就望到對面樓既阿文，然後出手相救。
 
此時此刻，湯豪除咗佢女朋友之外，最需要既，
應該係一罐啤酒。