《末日東方之珠--- 淪陷香港後花園》: 14.

「喂！阿文？你冇事丫嘛？我搵咗你成日都搵你唔到既！」
「Don！我冇事啊！」
「你而家喺邊？」聽到我激動既聲線，火圈外既行屍好似又開始騷動。
「Megabox附近。」
「Megabox!!??你望上高速公路！你見唔見到上面有火啊！我同泳茹喺上面啊！」
「火？喔！有啊有啊！你撐多陣，我地即刻上去救你！」阿文講完就收咗線。
我地？唔通阿文搵到佢既屋企人？咁我都安心啲。
 
火圈出面圍住差唔多十隻行屍，就算阿文真係黎到又點？佢一個人帶住兩老，邊顧得咁多？
 




「叭———叭———」
過咗冇耐，兩聲好大聲既喇叭聲從遠方響起，火圈外既行屍紛紛回頭，似乎被巨響所吸引。
 
「咻———哧—咻———哧—」
兩隻行屍突然跌入火圈，我同泳茹嚇到向後跳，我仔細一望，有兩枝短箭分別插喺佢地既額頭上面。
阿文幾時變得咁犀利？
「碰—碰—碰—」
一具具行屍依次倒下，我將視線範圍內既行屍額頭上既箭一一拔出。
 
「Don，冇事喇！你地快啲出黎啦。」阿文喺火圈出面大嗌。




雖然聽到阿文把聲我有啲安心，但係我而家淨係想知，點出啊…？
我望一望四周圍，除左兩架燒燶咗既車，同一個背囊之外真係咩都冇……
「Don。」泳茹一路望住車頂。
「不如我地爬上車頂，跳出去？」泳茹好認真咁講。
「吓！你幾時變到咁大膽架？」
 
我望住燒得七七八八既紅的，唔係，而家已經變左黑的，相比起火光紅紅既火圈，其實黑的上面只係剩翻少少火苗。
 
痴線，一定行唔通。但係除咗咁，仲有咩辦法？
「Don！快啲啦！」阿文又喺出面大嗌。




唉，死就死啦。
我揹起入面唔知幾時開始多左好多野既背囊，拖住泳茹，爬咗上車頂。
終於，見到阿文個衰樣。
佢好興奮咁原地跳。
身後係佢揸左好多年既貨Van，我隱約見到駕駛座上面有個人，應該係張叔。
「好似好恐怖咁……」我細細聲講，泳茹聽到翻咗個白眼。
「嘩，你好似真係唔驚咁喎…拿…咁我由三數到一就跳啦。」
3……
3……
3……
「你3夠未啊！人地好緊張架。」泳茹好用力咁打咗我一下。
「哈哈哈，我諗住緩和吓氣氛丫嘛。好啦，唔玩啦。準備，3！2！1！」
 
跳！
 




「碰！」
 
就快落地之際，我怕泳茹受傷所以攬實咗佢，喺地下滾咗幾個圈。
呢個時候，阿文竟然唔係過黎扶我地，而選擇係咁踩我隻腳。
「喂！你踩夠未啊！」真係嬲嬲地。
「啊，Sorry，Sorry，你條褲著咗火嘛。黎黎黎，起身，快啲上車。」
 
我聽到遠方傳黎咆哮聲，相信係隧道入面既行屍聽到啱啱既喇叭聲，就快追到黎。
我同泳茹急急腳爬入貨Van後座。
上到車我先發現，張叔同張嬸根本唔喺架車入面。
坐喺駕駛座既係一個我唔識既人。
一個陌生既男人。
一個拎住一把十字弓既陌生男人。