[校園鬼故事系列 2] [又係你呀陳生] 十不思議事件: 彩蛋一：李麗詠（３）
翌日，由於我主動連接子鋒的意識，使我今天感到異常疲勞！
（小詠鬼魂教室：有人問，鬼會否感到疲勞！答案是肯定的，簡單解釋一下，人和鬼也一樣，只要有能量的消耗，便會感到疲勞！只是人的疲勞，會反映在身體和精神上！而鬼的疲勞，會反映在精神及靈力的操控上！）
當我起床後，本想盡快跟天命叔說清楚我的立場，讓他盡量幫助我去拯救子鋒！
怎料到他竟比我更早醒來，更來到我的神主牌前！
「起身啦！小詠！搞咩呀你，做乜鬼咁攰？哦，你又偷偷地去左子鋒意識入面呢？」天命叔說。
我還沒有來得及反應過來，便又聽到天命叔在叫喊。
「即刻切斷同子鋒嘅聯繫！如果你仲想救個細路，就照我說話去做！同埋，快D起身！」天命叔說。
我聽到天命叔說「仲想救個細路」，立刻清醒過來，從神主牌裏飄了出來。
「係！收到！師傅，你係咪諗到點做啦？」我說。
「唔好問咁多住，你由今日起，唔理你有幾辛苦都好，同我不斷消耗你嘅靈力直到用唔到為止！我會幫你恢愎靈力，師兄都會幫你手，務求係最短時間內，增加你嘅靈力最大值！同埋，無論你感覺到子鋒有咩問題都好，都唔可以同佢聯繫！如果唔係，少左一日就少左一日，到時救唔到佢就唔好怪我！依家我同師兄執埋D野，就即刻返香港！」今天的天命叔說話異常有力，令人感到非常有希望！
「明白！」我馬上回應！
天命叔和立仁師叔，跟其他師兄弟交代了要處理的事情後，便離開這遠離市區的道壇了！
由於道壇位處的地區非常偏遠（五桂山附近），我們必需步行到附近的小鎮，才能乘車到市中心，然後經陸路乘坐巴士回到香港！
如果情況許可，大慨只需要兩天，便可回到香港！
我們步行了好幾個小時，總算來到小鎮，但由於經過這小鎮的巴士已經開走了，所以只好先在小鎮住上一天！
找了家旅館安頓好後，天命叔開始解釋給我聽，計劃如何實行。
「小詠，你聽住！」天命叔說。
「係！師傅！我聽緊！」我高聲回答。
「好，我地如果順利返到香港嘅話，有我同師兄去幫子鋒嘅話，我相信呢一劫絕對唔難渡過！」天命叔說。
「阻滯？會有D咩阻滯？我地都順利黎到呢度啦，返香港好也者！」我天真地說。
「我都唔知有咩阻滯，呢個只係我嘅第六感，我都希望我係錯嘅！」天命叔說。
我也開始擔心起來，畢竟天命叔的第六感和普通人的可不一樣，他的命中率可是高達九成的，尤其是不好的預感！
「所以，以防萬一，我準備左第二個計劃，亦係由收你做徒弟果一刻開始，已經開始準備嘅計劃！」天命叔說。
「係咪要我繼續提升靈力呀？」我說。
「無錯，但首先，我要話返俾你知，我究竟算到子鋒將會遇到D咩，到時你要點做，同埋究竟有咩風險！」天命叔認真的說，我也不由得認真起來，點了點頭表示了解！
「好，成個情況好特別！因為每次算出黎嘅結果都改變緊，只有尋晚算嘅時候，總算有一個扎實的結果！我算到子鋒佢，會俾邪靈奪去身體！」天命叔說。
「奪去身體？」我驚訝的問。
「無錯！簡單講，子鋒嘅靈魂將會被趕出身體，或者被破壞！呢個計劃，只能夠建立係子鋒嘅靈無被完全破壞，先能夠實行！」天命叔說。
「如果……子鋒嘅靈魂被完全破壞……佢會……」我不敢說下去。
「無錯，會死！但好彩嘅係，之前我果個，呢個劫係同你兩個有關，如果子鋒咁輕易死左，個劫就唔應該同你有關！所以，我地可以假定子鋒嘅靈魂唔會被完全破壞！但係，佢嘅靈魂一定會失去到某種程度，令到佢嘅靈魂無辨法靠佢自己同埋外力去修補返！」天命叔解釋。
「唔可以用外去修補？咁我又點救到佢？」我緊張的問。
「呢個就係重點啦！想當初，連接你同子鋒嘅意識，只係為左幫我地處理好小敏件事！唔知好彩定唔好彩，你兩個嘅意識連接後，靈魂方面亦開始同步，雖然唔可以話完全一樣，但已經有一種不可分離嘅關係！所以，你先會係切斷連繫嘅情況之下，都可以某程度上，感受到對方嘅安危！亦因為咁，你地兩個嘅靈魂，可以互補不足！就好似捐血捐器官咁，世上可能只有你地兩個，係無血緣關係下，靈魂上卻唔會出現排斥嘅狀況！」天命叔說。
「即係話，就算子鋒靈魂受到破損，只要唔係完全消失，我就可以將自己嘅力量過俾佢？」我問。
「無錯！而更好彩嘅係，你地呢五年入面，可以話係連記憶都共享，所以你對子鋒黎講，係一個非常合適嘅輸血者！但係，呢種做法，非常危險！靈魂嘅組成，非常複雜，而且力量嘅傳送，唔係好似輸血咁，可以控制！而一開始左，靈魂嘅力量就會完全俾對方吸走！」天命叔認真的說。
「者係話，只要我決定好要過靈力俾子鋒，我嘅力量就會全部流失！咁係咪無辨法阻止呢？」雖然我也作好犧牲的準備，但我也想聽聽有沒有方法使我們都能存活下來。
「有！就係你嘅靈力，能夠遠遠超過子鋒靈魂嘅儲存值！只有咁樣，當佢嘅靈魂被填滿後，你嘅力量再過唔到去，咁自自然然，你就唔會失去所有力量而魂飛魄散！」天命叔說。
「咁其實唔難者，子鋒嘅靈力都無我咁高！」我說。
「如果真係咁，我就唔駛咁緊張叫你提高靈力啦！子鋒顯示出黎嘅靈力，唔等於佢嘅容器就係咁大！肉身嘅容量，可能遠比想像嘅大！所以，如果你嘅力量唔夠大，就會係過程中魂飛魄散！所以我始終唔建議你咁樣做！」天命叔說。
「唔緊要啦師傅！我已經決定左啦！無論你幫唔幫我，我都會將力量俾晒子鋒！總之佢一定唔可以死！」我說。
「唉！明明自己有機會死都唔理，都唔知你呢D咁固執嘅性格似邊個！」天命叔歎了口氣。
「嘻嘻！咪似師傅你囉！」我飄了去天命叔身後，作勢抱著他。
「無黎正經！飄返去對面！既然你決定左，咁我都唔會阻止你，總之呢段時間你就盡量提升靈力！到時如果真係需要你去幫子鋒，我會幫你施法，當你入去子鋒意識嘅時候，只要用手捉住佢，咁就會開始將力量傳俾佢架啦！不過要記住，你唔可以俾佢意識到發生緊咩事！因為我怕佢知道左嘅時候，恢復緊嘅靈魂會排斥你俾佢嘅力量，咁到時，唔單止前功盡廢，仲會令你兩個都有危險！」天命叔說。
「我明白！到時如果我都係魂飛魄散，師傅你就忘記我，逼子鋒做你徒弟啦！我知佢其實都想跟你學野架！」我說。
「你係咪傻架，比賽未開始就預自己輸！記住，一係唔做，一做就要以最好嘅結果為目標！所以你唔好諗咁多啦！話唔定我地順利返到香港，唔駛煩！」天命叔說。
天命叔跟我交代好所有事情後，便回房睡覺去！
我則在神主牌旁，邊嗅著上好的沉香，邊提升靈力！
對，我可不能這麼早便放棄，最少，我應該盡自己的努力，才對得起自己，才對得起師傅！
翌日，非常不幸，天命叔的預感成真了！
「咩話？山泥傾瀉？無車入到黎？咁者係點呀，你地要搞幾耐呀，我趕時間返香港呀！」天命叔在櫃枱怒吼著。
「先生，你冷靜D先，我地都控制唔到！政府部門已經派左工作人員去清理山泥，應該好快會無事架啦！」想不到在這小鎮，還能聽到這麼流利的廣東話！
「無事，大陸野信得過？咪撚玩我啦！仲有咩方法可以離開呢度，你快D講！」天命叔激動的說。
「無啦，我地所有人都係靠呢條公路出去市中心架！呢條路一日未整好，就無辨法出去市中心架啦！」那店員說。
「師弟你冷靜D先！唔好意思，我地因為有D急事要盡快離開呢度！所以先會咁心急者！」立仁說。
「我明嘅，不過我地呢D鄉下地方，真係無其他辨法！」店員說。
「但係你地之前應該都會遇到呢D情況，一般黎講會幾耐先清理好？」立仁說。
「一般黎講都係三至五日！有時係八至十日咁囉！」店員說。
「咁呢段時間，你地咪無辨法出去買野囉？」立仁說。
「係架，不過唔緊要，我地條村係落後D者，不過都起碼有一個月嘅儲糧，同埋一堆乾糧，所以完全無問題！」店員解釋。
「哦，咁樣，係喎，小兄弟，你係度做左幾耐呀？」立仁問。
「我？應該半年左右啦！」店員回答。
「咁樣，可唔可以麻煩你，幫我地問下老闆，睇下佢知唔知有無咩方法可以離開呢度，因為真係好急，唔該你！」立仁說。
「咁呀……老闆佢唔鍾意我地問咁多野架喎，仲有佢依家係房，心情唔係咁好……」店員邊抱怨邊拒絕立仁的請求。
「唔該你啦後生仔，我地真係趕時間！」立仁再請求那店員，只見他把一些東西塞了給那個店員！
「咁……好啦，見你地咁慘就幫下你啦！」店員推開了櫃枱後的門進去了。
「師兄你俾左D咩佢呀？唔係錢呀？果個咁嘅貪錢怪，等我……」天命叔問]激動的說。
「師弟你都唔好咁固執啦，最緊要知道答案者！少少錢由佢啦，如果佢用到嘅話！」立仁說。
「用到？哦，師兄你……唔錯唔錯，呢D細路係要俾D教訓佢！」天命叔說。
只見那店員從門內出來了，身後有一個老人跟著他。
「就，就係你地想知道點離開呢度？」那老人操著一口濃重鄉音的普通話，聽得令人不太舒服！
「係呀，想下老闆你呢，呢度會唔會有其他路走架？」立仁問。
「有，有呀！係村嘅東邊，有好多樹林果度，有一條山路，舊時我地未有巴士，就係沿住果條路出去市區架啦！不過果度好多年無人行，可能已經俾D雜草遮住左架啦！」老人說。
「咁嘅話，照你估計，係果條路走出去，要用幾耐時間呀？」立仁問。
「應該三日左右會到市區架啦！去到果邊就有車可以去珠海或者經佛山返香港架啦！」老人說。
「三日？好，唔該晒你呀老闆！」立仁說。
「我勸你地都係等清走D山泥啦！依家咁大雨，果條路會好難行架！同埋果條路有好多古靈精怪野！你地都係唔會好亂行啦！」說完後，老人便又回到房裏去。
「三日喎師弟，你點睇呀？」立仁問。
「嗯，都仲有時間嘅！我地即管等埋聽日，打探下清理山泥嘅情況，再走都未遲！小詠，你暫時返房繼續提升靈力！師兄你幫我手睇住佢先，我打個電話返香港，我要交待D野俾天賜佢地，同埋話定佢聽我地會遲返去！」天命叔說完後，便跟店員要求致電回港。
希望明天能夠把山泥都清理好吧！子鋒，要撐著啊！