[校園鬼故事系列 2] [又係你呀陳生] 十不思議事件: 彩蛋一：李麗詠（４）
翌日，我沐浴在沉香的煙霧下，正在回復我的靈力！
然後，便聽到天命叔在櫃枱前吵鬧著。
「屌你，又話今日會清理好！連車都未出發，清條毛咩！」天命叔對店員說。
「大叔，你同我講都無辨法架！政府嘅野我都控制唔到架嘛！你咁急咪行路出去市區囉！」店員看來也生氣了，不太禮貌的說。
「你D咁嘅死仔包！呃完阿叔仲要咁無禮貌，唔俾D教訓你都唔得！」
之後天命叔繼續和店員爭吵著，直到立仁師叔來到，才平息了這場紛爭！
「師弟，你幾廿歲人仲咁好火嘅？同佢嘈都唔係辨法架，不如返房起個壇，幫下小詠提升靈力啦！」立仁說。
每天早上，天命叔也到櫃枱前跟店員吵架，立仁師叔則把他帶回房內，替我增進靈力！
然後，這樣的情況持續了一星期！
「仆街！真係忍無可忍啦！我去打爆果條死仔包！」天命叔在房中激動的說。
「師弟你冷靜D！我上次咪施左法令佢頭頭碰著黑囉，你打死佢都無用架！政府唔做野都無計！」立仁說。
「係囉，師傅，雖然我都好擔心子鋒，但我地真係無辨法走呀嘛！不如我地再研究下有無其他方法救子鋒啦！」我說。
「無啦！我諗左五年，都諗唔到咩新嘅方法，無啦無啦，呢次子鋒死緊啦！早知係咁，我就拖埋佢上黎中山，等你兩個都跟實我啦！」天命叔說。
三人沉默了好一會兒，只感到無可奈何！
「咯咯！咯咯！」忽然房外傳來敲門聲。
「邊個？」天命叔說。
「係我呀？老闆呀，唔好意思，我可以入一入黎嘛？」門外傳來一口濃重鄉音的普通話，是旅館老闆。
「係，請入黎啦！」天命叔說，雖然他不滿那店員，但他還是對老人有所尊敬。
「係，幾位，真係唔好意思呀！果個細路唔係好識禮貌，我代佢講聲對唔住！」老闆說。
「唔好咁講，只係因為我地真係好趕急，先會日日去搵佢問清楚者，我地都有唔岩嘅！」天命叔恭敬的道。
只見老闆凝視著我們，而且更把視線停留在我身上，是錯覺嗎？
「老夫後生果陣都經歷過好多野嘅，相見即是有緣，我呢度有粒金丹，係我用左唔少時間去鍊出黎嘅！呢位小姐，到時如果真係決定要去做！你地就點著呢粒金丹啦，希望幫到你地！」老闆說，我們三人也大感驚訝。
「老闆，你……你睇到我？」我問。
「小姐你咁靚，我點會睇唔到！同埋，你地如果想趕得切，襯陣間稍為停雨，就好出發啦！經山路行返落去，希望你地趕得切返香港啦！」老闆說。
「多謝高人相助，未知應如何稱呼？」天命叔和立仁師叔立即畢恭畢敬起來。
「哈哈！咪又係老人家一個，我都半隻腳入左棺材啦，仲高咩野人！你地自己小心D啦，果條路雖然可以出到市區，但實在太耐無人行，會有好多唔應該係果度嘅事物存在！你地要隨時打醒十二分精神！仲有半個鐘左右就會停雨，你地快D執野啦！」話畢，老闆便施施然的離開了！
「估唔到，係呢D地方都會遇到呢D高人！」天命叔說。
「可能都係命運黎，小詠，你同子鋒應該命不該絕！」立仁說。
然後，他們兩人把東西收拾好後，等待著出發的時機！
半小時後，雨勢真的停止了！
他們向店員和老闆道別後，別根據老闆的指示，向那山路走去！
「哇，呢條都算係路？全部都係草喎！」天命叔邊撥開雜草，艱辛地前進著！
「睇黎真係好耐無人行！師弟，你望下呢度！」立仁撥開了那些雜草，指著地上的某個位置。
「咦，係樓梯！」天命叔高興地說。
「無錯，雖然係難行D，但應該唔太難行！」立仁說。
我則依附在天命叔背包裏的神主牌上，按照吩咐，繼續修練我的靈力！
我們一直的走著，沿路上除了一些植物外，便沒有太多奇的東西了！
我們就這樣的走了兩天，第三天的時候，立仁師叔突然說：「師弟！好似有D奇怪！」
「奇怪？」天命叔說。
「你無發現，依家D景像，好似同尋日一樣咩？」立仁說。
「咩話？」天命叔拿出八卦圖，在上面刻畫著些甚麼似的。
只見天命叔的八卦圖上，多了一個黑色的箭咀，像有生命的不斷轉動著！
「唔得，定唔到方位！我地俾果個阿伯呃左！」天命叔說。
「未必關個阿伯事，如果佢要困住我地，無必要特登叫我地行呢條路，亦都無必要俾粒金丹我地！」立仁說。
「咁究竟發生咩事？無理由有靈體可以暪過我地兩個架！」天命叔說。
「能夠咁清楚我地嘅能力，又可以針對我地，令我地迷失！好可能係大師兄搞嘅鬼！」立仁說。
「果條仆街！係道壇果邊仲未受夠教訓，仲要黎搞破壞！你條仆街同我死出黎！」天命叔說。
「冷靜D師弟，大師兄應該走左，我諗佢係想教訓我地多管閒事！我地依家唔好浪費時間搵佢，諗下點樣做好D！」立仁說。
「點做？區區結界加上五行八卦想困住我地？講笑咩！」天命叔再次拿出八卦圖，聚精會神的研究著，而立仁師叔則在一旁默默唸咒，看來是想透過咒術衝破結界！
也不知過了多久，兩人同時坐在地上！
「呢條仆街嘅結界真係唔講得笑！我居然搵唔到任何突破口，所有方位每一秒鐘都變換緊，完全搵唔到正確方向！」天命叔說。
「我頭先都試過破解結界嘅咒術，但睇黎呢個唔係單一結界，我試左幾次都無辨法破解！」立仁說。
聽見兩人的對話，我忍不住從神主牌裏飄了出來。
「小詠，你出黎做咩呀？快D繼續修練啦！」天命叔說。
「你俾個八卦圖我睇下先啦！嗯，咁樣，之後咁樣，之後應該係咁樣！我知啦！」我高興的說。
「咩話？你知，小詠，唔好講笑，我同師兄都完全搞唔掂，你唔好亂黎喎！」天命叔說。
「唔係呀，師傅！我真係知架，呢個陣式我係你道壇果本結界書見過，只係佢揉合左兩個結界嘅特性，所以方位先變換不定！但變換方式係固定嘅，只有八八六十四種，頭三十二種我地只要向乾位前進，後三十二種就向坤位前進！只要重復八次，我地就可以突破呢個結界架啦！」我說。
然後，天命叔和立仁師叔驚訝的看著我。
「做咩呀？係咪我分析錯左呀？」我不安的說。
「唔係，你做得好好！之後交俾我地啦，你返入去繼續提升靈力！」天命叔這樣吩咐我，我便繼續修練好了！
「師弟，唔怪得你咁搏命啦，佢都係一個好徒弟！」立仁說。
「梗係啦！我收得嘅徒弟，點都高質D嘅！亦因為咁，我更加要盡力幫佢！加速啦，師兄！」天命叔說完後，便馬上加快速度，突破這個結界。
好不容易逃離了結界，雖然被預期的時間遲了不少，但總被結界困著要好得多了！
我們馬上乘坐巴士到深圳，然後轉乘火車回到香港！
在火車上，我一直感到心緒不寧，而且這種感覺愈來愈強烈！
我把這種感覺告訴了天命叔，他們便決定直接去坑口村查看一下情況才回家！
雖然我感到非常不安，但唯一能夠做的，便是依照天命叔的說話，盡可能的提升靈力！
在到達九龍塘火車站後，天命叔面帶難色的跟我說：「好，唔好再用靈力啦，你襯呢段時間休息下，恢復返所有靈力！陣間……好可能要你出手！」
「無問題呀師傅！唔駛擔心我，我會幫到子鋒，同埋都唔會俾自己死嘅！」我笑道。
然後我們三人，各自懷著不同的情緒，來到學校！
當我們來到學校的時候，我已清晰的感到，子鋒的靈魂，幾乎被完全破壞，那一瞬間，我好像感到眼裏流出了熱淚來！
不消一會，天命叔和立仁師叔，便把那可惡的邪靈給消滅了！
天命叔扶著子鋒，我則在一旁看著他！
「小詠！睇黎都係要你出手啦，雖然佢每個靈魂嘅組件都仲係度，但已經無辨法靠自己復原！所以……」天命叔不安的看著我。
「放心啦師傅，我唔會俾自己有事嘅！」我說。
「咁好啦，你聽住！記住陣間入左子鋒意識之後，唔可以俾佢知道或者察覺到，你究竟做緊D咩！如果唔係，就會好似之前咁講，你地兩個嘅魂魄都會變得七零八落！第二件事，就係你全程要捉住佢，手腳面咩都好，咁先可以將你嘅力量過到俾佢！第三件事！應承我，一定要返黎！你係我張天命第一個，亦係最好嘅徒弟！」天命叔說。
「好，師傅！我一定會返黎架！」我笑說。
「好，咁我依家用我嘅力量將你送入子鋒嘅意識入面！你保留所有力量，準備傳俾子鋒！」天命叔以符咒作導引，把我送進了子鋒的意識中。
在子鋒的意識中，我感到自己的力量正慢慢的流失！
尋找了一會後，我終於見到了子鋒，他那白痴臉還是沒有任何改變！
我在碰到他的一剎那，感到自己的力量大量流出，並進入子鋒的體內。
而看著子鋒的意識變得正常起來，我也感到非常高興！
我跟子鋒不斷的聊天，原來我這五年間，經歷了這麼多開心的事情！
我真的是賺到了，但我的意識開始愈來愈模糊了！
我真的很無用！我的力量幾乎全部流進子鋒體內，還是沒有辨法把他的靈魂容器完全填滿！
天命叔，看來我是沒有辨法遵守承諾了！
而更差勁的，我居然在最後關頭，話俾子鋒知，我將力量傳俾佢！
明明天命叔已經吩咐我不可告訴子鋒的！
幸好，好像沒有使他的靈魂排斥我的力量！
我實在忍不住了，在最後消失的時候，我只希望再次感受子鋒的心跳聲！
怎料，子鋒竟吻了下來，我感到從他的嘴唇，傳來一陣又一陣的暖流，然後，我消失了！
「咦？奇怪？我唔係消失左嘅咩？唔通靈魂消失左之後，仲有其他世界可以去嘅？」我張開了雙眼，環視四周，只見仍是白濛濛一片！
「小姐，你醒返啦？」一把熟悉而充滿鄉音的聲音，從我旁邊傳來。
「咦？老闆？點解你會係度嘅？呢度又係邊度呀？」我問。
「你岩岩咪捨身救果個小朋友嘅，好彩你師傅醒目，將粒金丹點燃左之後，俾左果個小朋友食！佢最尾錫你果一下，就將呢粒金丹嘅力量過左俾你！所以你仲能夠生存係呢個世界！如果唔係魂飛魄散之後，唔好話成仙，仲係真正嘅永不超生！」老人用鄉音極重的普通話跟我說。
「咁……我者係無死到呀？YEAH！！！！又可以返去同天命叔學野啦！」我說。
「唔好開心得咁早住，呢粒金丹，係用我嘅力量煉製嘅！用你本身嘅力量並唔相同！所以你黎緊只能夠依附係靈位上面，將呢種力量融合，變成你嘅力量，咁你先可以重生！」老人說。
「哦，無問題呀！我會好好努力架啦！」我說。
「而要融合呢種力量，需要用十年嘅時間喎！真係無問題？」老人說。
「十年？咁……都總好過永不超生啦！我知足架啦！多謝你救我呀！」我笑說。
「小姐你果然唔錯，好啦，咁你聽住啦，你師傅將你嘅靈魂轉移左去神主牌！你之後都唔可以主動接觸佢地１你每日都要照住我教嘅方法去做，將呢種力量融合，知道未？」老人說。
「知道！不過……真係要十年咁耐呀？」我笑問。
老人看著我笑而不答，只把融合力量的方法教授了我。
真的要十年嗎？算了，總之努力就好！
所有事情，我相信，總是可以改變的！
完