[校園鬼故事系列 2] [又係你呀陳生] 十不思議事件: 彩蛋一：李麗詠（２）
「小詠，你跟左我修道幾耐啦？」天命叔問。
「等我諗下先……應該都有五年啦！」我說。
「五年！無錯，已經五年啦！呢五年黎，我教你嘅野，你都好俾心機學！我真心多謝你做左我徒弟！但係……我……係一個唔及格嘅師傅！」天命叔歎道。
「師傅你講咩呀？咩唔及格呀，你對我好好喎！我跟住你學野，我過得好開心！」我不明所以的道。
「小詠，你記唔記得五年前，我同你講過，我唔會教你任何道術，最多只會幫你提升靈力！」天命叔說。
「我記得！當時你話因為我只係靈體，道術果D唔岩我學呀嘛！但係你肯幫我提升靈力，助我成仙，我已經好感動架啦！」我說。
「其實……我之所以要你專注提升靈力，係有原因嘅！因為，我一早就算到，你同子鋒將會遇到嘅劫！」天命叔凝重地說。
「劫？師傅你講咩呀？我唔明喎！」我疑惑地說。
「簡單講，係五年前，雖然你同我講過幾次，話想我收你做徒弟，但我都拒絕，係因為我算到，你呢個劫，係可以避免嘅，關鍵係，唔可以再同我扯上多一重嘅關係！而子鋒嘅劫，只要佢肯拜我為師，亦都可以幫佢化解！原本係好簡單嘅事情，但估唔到，最終拜我為師嘅，始終都係你而唔係子鋒！果一刻起，命運又開始變得複雜！我原本將你地嘅意識連起，只係為左令到小敏果件事，可以安全咁落幕！但亦都因為咁，你地兩個嘅劫，變得糾纏不清，成為左兩個只能活一個嘅困局！」天命叔歎道！
「者係話，當日我用計去做左你徒弟，先會搞到件事咁複雜！」我說。
「你又唔駛咁諗，可能當時咁嘅情況，都係命運嘅安排！只怪我當時無注意到，俾你得呈做左我徒弟，呢個已經無辨法改變！所以我係呢五年入面，都不斷嘗試去改變呢個困局，例如不斷逼個衰仔拜師，逼你提升靈力去應付黎緊嘅劫等等！但我無論點做都好，個困局不單止無化解到，而且時間仲愈推愈前！而且，估唔到嘅係，子鋒應呢個劫嘅時間，會正正係我離開左香港嘅時候！唉！」天命叔最後那聲歎息，明顯感到他非常洩氣。
「咁……咁，依家個情況，係咪好嚴重？個劫仲有幾耐會到？」我憂心地道。
「如果我無算錯！呢一個月內，個劫就會發生！」天命叔說。
「一個月？咁快？師傅你快D諗辨法啦！同埋你唔係話我都有份嘅咩，點解我又乜事都無架？」我緊張的道。
「小詠你冷靜D先！無錯，個劫，的的確確都同你有關！而我叫你增加靈力，就係為左你有足夠力量去應呢個劫！但依家……只怕時間唔係好夠！」天命叔說。
「我聽唔明呀，師傅你講清楚D啦！」我急道。
「唉！其實，原本你地嘅劫，唔足以要你地條命嘅！總之，依家個情況就係，個劫會應係你地是旦一個人身上，而且，仲係足以致命嘅！而我諗左好耐，既然無辨法化解呢個劫，我只好順應天命，等你地是旦一個去應劫！」天命叔說。
「咁點解要係子鋒去應劫呀？師傅係咪你做左D咩呀？不如我去應呢個劫啦！」我激動地說。
「小詠，唔係我做左D咩，而係命運選擇左子鋒，原本佢嘅運勢已經唔好，再加上佢依家所行嘅陰運，個劫會降臨係佢身上，一D都唔出奇！而且，就算要你去應呢個劫，因為你本身已經死左，無左肉身，應劫果一刻，亦即係你魂飛魄散嘅一刻！所以，由子鋒去承受呢個劫，先係最好嘅選擇！」天命叔說。
「咁……咁都無理由，為左我而要子鋒去死架嘛！」我哭道。
「我頭先都講左，我做左好多野去令到子鋒可以渡過呢個劫！係我臨走前已經交低左張保命符俾佢，而且天賜黎緊都會幫子鋒準備定一個替身公仔，希望助佢渡過呢關！」雖然天命叔這樣說，但他仍然緊皺著眉，明顯沒有太大信心！
「師傅，子鋒係咪會死？」我哭道。
「唔知道！我只可以話，呢個做法，只係賭一鋪！但最少，我地都叫盡左人事！」天命叔說。
「即……即係，無辨法救佢？唔係喎，師傅，你頭先咪話，我增加靈力嘅話，可以去應付呢個劫嘅？咁我去幫佢咪得囉？」我說。
「唔得！我頭先咪講左，你力量唔夠囉！你勉強去幫佢，只會令你魂飛魄散！」天命叔激動地說。
「師傅，如果唔係你地，我可能仲係俾小敏操縱緊！甚至可能變成惡鬼，俾人收左！呢五年，同你地一齊，已經令到我好開心，其實我已經係賺左！何況，我死左咁多年，無人無物！但子鋒唔同，佢有屋企人，有朋友，仲有大好前途，點計都應該係我去受呢個劫比較好！」我真心的說，對，這五年來，我已經是賺了！
「就算係咁，我都唔可能俾你去咁樣做！而且，就算你耗盡所有力量，都未必可以救到子鋒，咁嘅話，你嘅犧牲係完全無價值！」天命叔說，但說這話時神情有點閃縮，雖只有大約一秒，卻逃不過我的眼睛！
「我唔信！師傅我跟左你咁多年，你一有野隱暪就會變得得唔自然！我知啦！呢個方法係有效嘅！係咪呀？係咪呀？」我追問。
「唔駛多講啦！我唔會俾你咁做！你係我徒弟，我講嘅野你一定要聽！」天命叔說。
「我唔理！我一定會救子鋒！我一定會！」我哭著的逃離了天命叔的房間！
放心吧子鋒，我一定會救你！
─────────天命叔視角─────────
小詠離開房間後，我在房中獨自思考著！
「唉，究竟有無辨法可以同時救晒佢兩個呢？」我苦惱的想著。
「師弟，點呀？有無野可以幫到你呀？」立仁說。
「師兄！唉，我都唔知可以點做！俾著係你，你會唔會俾自己個徒弟去送死？」我說。
「師弟，其實呢個問題，你應該知道答案架！咩人就收咩徒弟，佢嘅性格根本同你一樣，都係咁硬頸，你唔俾佢做，佢一樣會照去做！倒不如你諗下辨法幫下佢啦！」立仁說。
「唉，以前師傅成日話鬼我，到依家我總算明佢當時嘅感受！但今次唔係講笑，佢如果夾硬黎，係一定會魂飛魄散！話晒佢都係我張天命第一個徒弟，我實在唔想佢咁！」我說。
「其實掉返轉諗，就算佢想救果個細路，都要個細路嘅魂魄係無俾人破壞到！先可以過到D能量俾佢，不如你諗下點救個細路啦！」立仁說。
「可以做嘅，我已經做左啦！我已經唔知可以點算！唉！」我垂頭喪氣的道。
「師弟……不如咁啦，我地聽日一朝早就離開呢度啦！其他野就俾D師兄弟處理啦！」立仁提議。
「聽日走？咁繼承嘅事咪……」我還沒有說完，便被立仁打斷了。
「唔駛擔心啦，反正我都只係受邀請上黎，都無諗過要繼承D咩！最重要係，大師兄已經失去左資格，我嘅目的已經達到！所以，都輪到我黎幫下你手啦！」立仁搭著我篇膊說。
「好！我聽朝打俾我個衰仔，交代埋D野俾佢同埋你徒弟！我地就即刻出發！」我說。
「仲有呀，你徒弟……係咪叫小詠呀？你繼續幫佢提升靈力啦！雖然唔知幫到幾多，但總好過咩都唔做！同埋，你都同佢講返聲你會支持佢，等佢唔駛咁擔心啦！」立仁說。
「邊有師傅會咁放縱D徒弟架？唉！好啦，知啦，聽日同佢講啦！」我說。
子鋒，小詠！我會盡可能幫你們，不會讓你們出任何事！
──────天命叔視角結束，切換回小詠視角──────
我飄了回房間後，想了很久，決定重新打開和子鋒的連繫！
雖然不清楚有沒有用處，但我會勸他不再參與這次的事件！
希望這樣能使他避過這一劫吧！
然後，這晚我闖進了子鋒的意識中，勸告他不要再插手那件怪異事情。
「子鋒，我……我唔想你死！我已經當左你係我親細佬咁，求下你，唔好再插手啦！」我在子鋒的意識中，對他說出心底話。
他沒有回答我，只是微微笑了一下！
我知道，這個笑容，是離別的笑容，他不打算放棄！
算了，反正我從一開始，便打算幫助你！
不論天命叔說了些甚麼，也不可以阻止我幫助你的！