[校園鬼故事系列 2] [又係你呀陳生] 十不思議事件: （三十七）
失去意識後，我不斷重覆著同一個夢境！
不斷夢見自己的屍體，然後被黑影重覆佔據著！
而在清醒前的夢境，我聽見了那個「我」在說：「仲差少少！仲差少少就係屬於我架啦！哈哈哈哈！」
我嚇得馬上清醒過來！
我半直著身子，坐在病床上，我感到自己不斷出汗，全身都濕透了。
「子鋒！你醒啦？係咪發惡夢呀？」這熟悉的聲音，是阿詩！
「咦？阿詩，呢度係？點解你會係度嘅？」我問。
「呢度係醫院，係Irene送你地入黎架，依家佢錄緊口供！」阿詩說。
「錄口供？」我感到頭痛，之前究竟發生了甚麼事情？
「係呀，天賜係隔離房照顧緊佢地！」阿詩說。
「佢地？呀！係喎，雷少同冰冰，佢地點呀？」我終於記起暈倒前發生的事情了。
「佢地無事，醫生話佢地只係飲左D安眠藥，無任何損傷！」阿詩說。
「吁，太好啦！」我舒了口氣，感到安心！
然後，只見天賜走進病房！
「天賜！佢地點呀？」我問。
只見天賜眼中帶有一點怒火，走向我床邊。
「死仔！你係咪傻左呀！」他雖然壓低了聲音，但仍然感到他的憤怒。
「咩……咩事呀？」我大約猜到他為甚麼這樣，我只能裝作不知道。
「唔好扮野！你知咩事架！一條友去搵黃強，你真係想死？」天賜怒說。
「天賜冷靜D先，子鋒岩岩醒返，等佢休息下先啦！佢陣間仲要錄口供架！」阿詩拉了拉天賜，讓他稍為冷靜下來。
「休息？橫掂佢都想去送死，休乜鬼息者！你好講究竟發生咩事啦？」天賜雖這樣說，但眼中的怒火稍為消退。
「我陣間再同你講返成件事！不過，你地有無通知我阿媽呀？」我擔心這次的情況會嚇怕我的父母。
「我同佢講左，話你打波打得太勁，體力透支暈左，我地會照顧你，叫左佢唔駛擔心！同埋我話會再打俾佢叫佢黎，等D警察走晒，我會叫佢過黎搵你架啦！」天賜說。
「唔該晒！」我感激地說，真不愧是我的好兄弟。
接下來，我跟警察錄了口供，再跟我母親交待了事情，總算可以靜下來了！
天賜、阿詩和Irene，正站在我的床邊，大慨想我交代一下早上的事情吧！
「好啦，依家所有野都處理好晒啦，你可以講返究竟發生咩事啦？」天賜問。
「咪住，我想知雷少佢地點樣，同埋佢地究竟發生左咩事？」我說。
「你……到依家都仲係諗人地點……唉！好啦，等我講啦！」天賜說。
雷少和冰冰昨晚先行離開學校後，在學校的入口處隱約看到黃強的身影。
於是雷少馬上追了上去，冰冰阻止不了雷少，只好跟著雷少一起去追。
然後，雷少跑到了張伯的家門前，看見黃強偷偷的進入了屋裏。
他和冰冰在屋外猶豫了一會兒，決定推門進去。
當他們踏進屋裏數秒後，便感到有點頭昏腦脹的感覺，之後便昏倒了。
他們清醒後，便發現被黃強綁得死死的，完全動不了！
黃強並沒有告訴他們任何事情，只是跟他們說，目標由始至終也是陳子鋒！
然後，雷少聽到黃強致電給子鋒，他大喊了兩聲，嘗試阻止子鋒，卻感到一陣很刺鼻的味道，雷少又一次昏倒了。
之後的事，雷少和冰冰完全沒有記憶，只知道再次清醒後，便已經在醫院裏。
「所以佢地都無受到任何傷害？」我問。
「無啦！我入到屋嘅時候，你地三個人都暈低左，但無受到咩傷害啦！」Irene說。
「係喎，點解會係你送我地黎醫院架？」我問。
「仲好講，好在我今朝落街食完早餐，就見到你一支箭咁走左去學校果個方向！我本來以為你返學校，但諗諗下唔對路，今日學校明明無任何補課，於是諗住追上去搵你！去到學校見到閂晒門咁，咪四周逛睇下搵唔搵到你囉！我首先去左火災果間屋，唔見你！之後隱約聽到你把聲叫左一聲，好似好激動咁，就周圍再行下！之後就係一間屋前，聽到好似有人講你個名，就係出面偷聽左好耐！最後，我聽到屋入面有個人叫我唔駛再匿埋，叫我入黎救你地！跟住我咪好小心咁入黎，就見到你地幾個訓晒係度啦！」Irene解釋著。
「好啦，講就講完啦，你係時候講返俾我地知，點解你會一條友走左去搵黃強！」天賜問。
我想了一想，決定還是把整件事情的來龍去脈給交代清楚好了！
「就係咁啦，所以我當時唔去嘅話，佢好有可能真係會殺左雷少同冰冰，我根本無得揀！」我苦惱地說。
「唉，就算係咁，你都起碼通知我地是旦一個，等我地知道咩事！今次如果唔係Irene，都唔知幾時先有人去到救你地！」天賜說，明顯他仍不認同我這樣的做法。
「算啦，唔發生都發生左，我反而擔心緊，黃大一嘅目標係你，咁黃強究竟俾左D咩你飲？佢地接落黎又會做D咩？」Irene說。
「仲有，佢拎住黃大一嘅骨灰又係咩用意呢？」天賜說。
其實，來到這個地步，我真的感到害怕！
害怕的，不是我自己的安全，而是和我有關連的人，只要他們一日在幫我，一日便會繼續受到威脅！
說實話，多年以來，跟著天命叔去看那些甚麼除靈趕鬼的！
對這些詭異事情多少也有點免疫力！
最令我害怕的，還是人的劣根性，小敏事件也只是因為堅嬸被小敏操控，堅叔也只是為了堅嬸去做些錯事！
他們倆，內心還是善良的，但黃強，他不單比那些甚麼政府官員、甚麼商人要來得卑劣！他更是一個精神失常的瘋子！
儘管警方現已在通輯他，又有誰能肯定，這樣可以保障我身邊的親朋戚友呢？
大慨，他們不再插手這件事，會比較好吧！
「其實，我諗你地都係唔好再理呢件事會好D！」我認真的說。
「你講咩呀？係咪訓醒痴左線呀？」天賜怒道！
「咪係囉子鋒，點解你要咁講呀？我地識左咁耐，無可能依家走左去唔理你架！」阿詩也不太滿的說。
「你地都聽到我講架啦，黃大一目標係我，如果你地唔插手嘅話，我估佢同黃強唔會對你地出手！咁樣，最少你地唔會好似雷少同冰冰咁，遇到D咁危險嘅事！」我低下頭說。
老實說，我也是非常掙扎，才把這番話說出來的。
畢竟是我把天賜拉進來的，但當初我也沒有想到，事情會去到這麼危險的地步，或者黃強說得對，我也是自私的，我不想獨自承受那種因我而受傷甚至死亡的感受！
「陳子鋒！你到依家同我講D咁嘅野？你唔好以為咁樣好偉大！我話你知，我叉左隻腳埋黎，我就唔會就咁抽返身出去！唔該你啦，衰左一次算得係咩者！你都唔係第一次遇到呢D野架啦！你一直以黎都唔會咁，衰左咪笑笑口再起返身再黎過囉！做咩者依家，你咁嘅樣，本來有得救都變無得救啦！唔該你同我醒下啦，死人口面咁款解決到問題咩！你驚搞到我地，我依家就過去叫雷少佢地過黎，你問下佢地肯唔肯就咁退出！佢地肯我即刻跟住走又點話！」說完後，天賜離開了病房，然後阿詩追了出去。
病房裏，只餘下我和Irene兩人。
我低頭不語，仍在思考著天賜的責備。
「點呀你，死得未呀？」Irene率先開口。
「吓？我無事。」我心不在焉地回答。
「你仲記唔記得，之前係學校，我地扶住雷少同冰冰，好狼狽咁離開學校呀？」Irene問。
「吓？係咩？好似係卦。」我說。
「你果次講左好多你嘅經歷俾我聽，仲安慰我，叫我唔駛咁頹，有咩衰左就再黎過囉！我果陣係第一次覺得，原來人嘅意志可以咁堅強，如果俾著係我，遇到咁多野，唔好話起唔起得返身啦，我肯定唔再學道，就咁走左去。」Irene說，我沒有回應。
「你依家咁樣，只係一時失落者，我相信你可以無事嘅！」Irene拍了拍我肩膊說。
「我……只係以前嘅我太天真者！同埋……以前再危險，都係自己嘅事，但今次……佢地係因為我……先會遇到呢D危險！我.…..已經唔知點做先好！」我說。
「陳子鋒，你咁樣未免太輕視自己條命！同埋，亦都太睇少大家嘅決心啦！你如果真係唔知點做，你不如諗下，如果調轉角色，你又會係點，咁樣，你應該會明白點解天賜會咁激動！不過，我知呢D情況，要靠你自己諗通先得，你就襯呢段時間好好休息，同埋打起精神啦，我有預感呢件事好快會完，捱唔捱到過去，就睇你架啦！」Irene說完後，也離開了病房，餘下我一個人。
我......應該怎麼辨才好？
天命叔......我應該怎麼辨才好？
Irene離開病房後，在走廊上看到正等候著她的天賜和阿詩。
「Irene，有D野想你幫手，聽日我想......」天賜跟Irene討論著明天的行動。
子鋒在醫院的時間，還是有一些東西，是天賜他們可以做的！