[校園鬼故事系列 2] [又係你呀陳生] 十不思議事件: （三十五）
完成結界後，我們各自回家，心裏總是有點不安。
然後，我嘗試透過意識去找小詠，但發現和她的意識連繫不上，又發生了甚麼事了嗎？
這夜，我就這樣憂心忡忡的睡了。
然後，我發了一個夢！
夢的內容非常簡單，我看見了自己的屍體！
夢中的我，完全失去了氣息，躺在學校的操場中間。
而我旁邊站著一個黑影，那黑影用它那雙透射出綠光的眼睛看著我，然後，它慢慢的從我嘴巴，進到我的體內！
那黑影完全進入我的體內後，我的屍體，竟慢慢的恢復了意識，不但雙眼張開了，而且更慢慢的站了起來。
只見站起來的那個我，眼中散發出詭異的綠光，然後慢慢的變回正常的眼睛！
這個，還是我嗎？
然後，我醒過來了！
我立刻走到浴室，洗了一個澡，在這期間，我不斷透過鏡子察看我的眼睛！
還是那樣有魅力、還是那樣有型啊！
而且，心裏也不像以前般會感到不舒服，大慨真的是一個夢吧！
我呆呆的回到學校，整天都警戒著，會不會在哪裏發生甚麼奇怪的事！
但一直到放學，也沒有遇到任何事情！
可能，我的預感落空了吧，這樣也好，事件就這樣落幕也不算壞事！
說也奇怪，就這樣過了一個星期，卻甚麼也沒有發生！
而且，每天我們到天台檢查那些令旗，也沒有發現有任何問題。
「小雷，下星期五就係聖誕聯歡會啦！我地陣間去買禮物到時抽啦！」冰冰說。
「吓？我地班無搞咩抽獎果D喎？」雷少說。
「吓，咁你者係唔陪我去呀？」冰冰提高了聲線，纏著雷少不放。
「去，你要邊我都陪你去好未？」雷少摸了摸冰冰的頭，然後回答他。
我和Irene見狀，也不好意思看著他們。
「咁你地走先啦，我同Irene上去檢查得啦！」我說。
「吓？我唔係咁嘅意思喎，上去檢查完一齊去買咪得囉！」冰冰說。
「哦，唔係呀，因為陣間我同Irene要補返D靈力俾個結界，所以會耐D，你地都係走先啦！」我向Irene打了個眼色，示意她配合我的謊言。
「係啦，雷少，冰冰，你地行先啦，我同子鋒搞掂得架啦！」Irene機警地說。
「吓，咁樣……」雷少說。
「得啦，快D走啦！」我推了雷少一把，讓他們快點離開。
然後我和Irene來到天台，檢查那五支令旗。
「奇怪！點解會咁？」Irene輕聲說。
「做咩呀？有咩唔妥呀？」我問。
「你睇下呢支令旗，旗嘅方向同另外四支唔同！」Irene說。
的確，四個方位的令旗，也是指向右方，只有中間的令旗，指向的是左方。
「會唔會太大風，吹郁左Ja？」我說，雖然這理由簿弱得連自己也說服不了！
「唔好玩啦，有咩理由淨係吹郁呢支先得架！」Irene繼續檢查著其他令旗。
「咁者係點呀？最重要個結界仲係咪有效先？」我緊張地問。
「最奇怪就係呢件事，根據天命叔本簿記載，如果結界失效，令旗應該會呈現被折斷嘅狀態！但依家全部令旗都無事，即係話結界無被破！」Irene看著令旗，疑惑的說。
「吓？會唔會有D雀仔經過，扯郁左支旗？又或者……」我已想不到其他理由了。
「我都唔知係咩原因！希望真係俾風吹郁或者俾D雀仔整郁左啦！」Irene說。
「應該無事嘅，係樓梯你又有整結界，我估無人上到黎卦！」我說。
「個結界淨係對一般人有效架ja，如果有一定靈力嘅人，或者帶住一D纏繞靈力嘅道具，就好易穿過上到黎！」Irene說。
「吓？唔係喎，上次我明明係兜返轉頭架？」我問。
「咁係因為你無釋放自己嘅靈力者，只要你隨便結個手印，釋放靈力，個結界根本唔會對你有用！」Irene解釋。
「咁……咁都無事嘅，無啦啦點會有人識得釋放靈力先得架？」我雖然這樣說，但心裏又泛起一陣不安的感覺！
然後，我和Irene離開了學校，回到家中，我嘗試透過意識，尋找小詠。
「頂，條友又切斷左連繫，做乜鬼野呀佢？」
我不安地在床上滾動著，然後沉沉睡去。
起床後，我感到非常疲勞，幸好這天是星期六，可以好好休息一下。
但竟然，我收到了一個電話。
「喂，邊位？」我拿著電話說。
「子鋒，你唔好過黎呀，佢……」電話那邊傳來一把熟悉的聲音，但瞬間像被甚麼東西阻止了說話。
「喂，你係邊個呀？發生咩事？」我大叫。
「哈哈，你好呀，陳子鋒同學，仲認唔認得我呀？」這聲音聽來很熟悉，亦有點厭惡。
「你……你係黃強？」我說。
「Bingo！你真係聰明！」黃強說。
「你想點呀？頭先果個係邊個黎？」我說。
「頭先？哦，你講我好朋友雷少呀，唔止佢呀，仲有佢女朋友冰冰添呀！至於我想點，好簡單者，我想見你！」黃強說。
「黃強，我已經知道晒條村發生過嘅事，都知道你受到黃大一嘅詛咒！但唔緊要架，我師傅佢識解咒架，你唔需要再受佢控制，做埋D咁嘅野！」我嘗試拉長和他的對話，想在這期間想出一些辨法來！
「詛咒？受控制？你唔明白，唔關呢D野事！純綷係人性問題，當日我阿爺咁做，我一D都唔覺得有錯，環境，各種因素，我地只係受害者！而黃大一都一樣，佢要詛咒我地，殺我，都係被逼嘅，佢都係受害者！自從中三果年，第一次見到黃大一！佢話晒所有嘅野俾我知，我知道晒前因後果，亦都知道晒所謂嘅詛咒！我就知道，所有野，都只係人性嘅安排！既然人性係醜惡，我走唔甩，咁幫黃大一都好正常！我只係做返正常人性下應該做嘅事！你地都唔駛旨意走甩！」黃強說。
這傢伙瘋了！他真的知道他在說甚麼嗎？
但，假如他真的沒有受黃大一控制，那麼，他比那些受鬼操控的人更加危險！
「黃強！係，人性係醜惡嘅，我認同！但你無非都係想自保者，信我，我師傅好勁嘅，佢一定幫到你手解決問題！」希望先認同他，能拖延一點時間吧。
「解決？你有咩保證？如果我應承左你，佢下秒就殺左我，咁點算？萬一你師傅無料到，搞唔掂，咁點算？又萬一你地反口，咁點算？咁多變數，我係唔會搏！」黃強說。
「但……但係你幫黃大一，佢都未必會放過你架？」我說。
「我講過啦，就算我要死，都要拉埋其他人落水！同埋，黃大一佢需要我幫佢，只要我一日仲幫到佢，我就可以生存多一日！人同其他生物一樣，求生係最優先嘅本能，無人可以怪我，哈哈哈哈！」媽的，這瘋子。
「你諗清楚，你咁樣只係一日拖一日。我之前同師傅去過好多地方除靈，做完之後就一了百了架啦！」快想，有甚麼可以扭轉他的想法！
「算啦，陳子鋒！你想幫我？我話你知，你自身難保呀！黃大一佢要嘅係你，唔係我！哈哈哈哈！你唔好再諗住係度拖時間！你唔想佢兩個有咩事嘅話，即刻黎坑口村，張伯間屋搵我！唔好同任何人講，亦都唔好報警！總之，如果你令我有任何懷疑嘅話，我就送佢地一程！一個鐘內好黎到啦，如果唔係，我都唔知會做D咩架，拜拜！」
黃強說完後，便掛斷了電話，媽的，這個瘋子！
要通知其他人嗎？
要報警嗎？
不，我根本沒有選擇，只能聽他的說話去做！
既然他說，黃大一需要我，那麼，我應該暫時不會有事吧！
好，自求多褔吧！黃強，我來了！