[校園鬼故事系列 2] [又係你呀陳生] 十不思議事件: （二十三）
「雷少，你又話同黃強唔係好熟嘅，點解知佢地址嘅？」我跟雷少一起走到坑口村。
「哦，因為中四果年，我地要分組做project，當時黃強屋企係最近，我地就將D材料擺去佢屋企！但有一次，佢病左無返到學，咁我地就唯有去佢屋企拎返D材料！佢間屋好大，但唔知點解，個感覺唔係好舒服，同埋，全屋都好古怪！無鏡，無相，好似連電視機都無！」雷少回憶著。
「吓，唔係掛，電視機都無？」我驚訝的道。
「係，不過我都唔係太有印象，果次我同另外三個同學上去，佢原本唔係好想開門俾我地。但我地嘈左好耐，最尾先入到去！」雷少繼續說。
「吓，唔俾你地入去？我唔用腦諗都覺得有古怪啦！呢條友究竟咩事？」
我們邊聊邊走，很快來到一楝村屋前，這村屋是只有三層的那種，和一般的高樓大廈很不同。
「呢度就係阿強住嘅地方？」我看著眼前的獨立屋，心裏羡慕得很。
「係，不過問題係，我地要點樣入去？」雷少問我，然後我跟他互望了一下，還真的從沒有想過這個問題。
「諗咁多做乜，我地按門鈴咪得囉！」說完後，我把手放到那個門鈴上，但完全聽不到聲音。
「點解……好似無聲嘅？」雷少看著我，我再次按了下去，但仍然沒有聲音。
「點算呢？佢又落晒窗簾，咩都睇唔到！不如爬入去望下啦！」我嘗試窺看內裏的情況，但甚麼也沒有發現。
「吓？唔係咁好喎，陣間俾人發現左，又知道我地係呢度嘅學生，到時咪好大鑊！」雷少阻止我，我們站在屋外，甚麼也做不了。
「咁點呀？黎到都唔夠十分鐘，唔係就咁走呀？」我在屋外不停踱步，焦燥不安，總感覺來到這學校後，做甚麼也不順利。
我和雷少在屋外不斷討論，但還是沒有想到任何方法，然後一名老人緩緩向我們走來。
「喂！你兩個係度做咩呀！」只見那老人年約六十多歲，但中氣十足，一點老態也沒有！
「我……我地個朋友休左學，但佢咩都無講，打俾佢又唔聽！我地兩個擔心佢有咩事，所以咪黎搵佢囉！」我隨便編了個理由。
「朋友？你朋友住係呢度架？」那老人指著我們面前的房子，用懷疑的眼神看著我們。
「係呀！我之前去過佢屋企，所以諗住黎搵佢囉！」雷少回答。
「細路你地咪亂講野呀！呢間屋兩年前已經無人住架啦！你地究竟黎做咩嘅？」老人用更懷疑的口氣質問我們。
我和雷少面面相覷，對啊，為何我們沒有想過，阿強早已搬離這裏的可能性呢？
面對老人的質問，真的可能演變成不太好的情況，至少我們要再來這裏的話，會變得更困難，只好先想辨法撤離這裏。
「其實，我地真係諗住黎搵人架，我地無諗過佢已經搬走左，唔好意思呀！」我這樣回答。
「哼，你當我傻架！我張伯由細係度住到大，年中都見唔少賊或者地產商黎搞破壞！好，你地話黎搵人，咁你地搵邊個呀？講唔出嘅話，我就通知其他村民，一齊趕你地走，唔好以為我地好蝦呀！」張伯中氣十足的道，看來我和雷少在他心中已和賊人沒有兩樣。
「我地係黎搵一個叫做黃強嘅人！」雷少搶著回答，這樣也好，畢竟他的感覺比較正氣。
「黃強？你地係黎搵黃強？」張伯驚訝的問，他是認識黃強的吧！
「係呀，張伯，你係咪識黃強架？我地好擔心佢，好想問下佢點解突然間休學！」我馬上問他，希望能找到一些有用的資訊。
「無可能，點會係黃強？無可能！」張伯在自言自語，感覺我們是問了些不太合適的問題，但沒有辨法了，他現在是我們唯一的線索了！
「張伯，依家係我地身上發生左一D事，一D好恐怖嘅事！我知講出黎你可能唔會信，但我地依家真係好需要搵到黃強！希望可以解決到所有野！」我抓著張伯的肩膊，用真誠的語氣跟他說。
「發生咩事？係咪學校果邊又出左咩事？」張伯不安的看著我。
這種情況，我也不可能說謊了：「係！學校出左事！」
「無可能！你地講大話！無可能！你地唔好諗住作故仔呃我！」張伯激動得把我的手甩開了，然後準備離開這裏！不可以，絕不可以就這樣讓他離開！
「我地見到成個班房都係自殺嘅屍體！」雷少忍不住大喊。
只見張伯整個人震了一下，然後回頭看著我們。
「仲有，我地係廁所見到一個只有頭同手嘅女人，係小食部見到好多血水同殘肢，仲有……」我看他停了下來，於是繼續說著。
「夠啦……你地跟我黎啦！」張伯示意我們停止，看起來他已經回復冷靜，然後我們跟他來到旁邊的另一楝房子。
「你地入黎啦。」張伯把大門打開後，便邀請我們進去了。
於是，我和雷少便進入了這間大屋裏，終於，我們能掌握到黃強的資料了。
─────────────阿詩視角─────────────
「阿詩，你同天賜拍左拖好耐架啦？」冰冰問。
「哦，係呀，都五年啦！你同雷少呢？」我問。
我和冰冰一起走去將軍澳公共圖書館，在途中，我們聊了很多關於雙方的事情，對彼此也熟識了很多。
而我亦抓緊機會，向她問了一些關於那個Irene的事情，只是Irene也是轉校生，所以冰冰對她也不是十分了解。
但這樣就足夠了，我已經獲得了一個額外的線眼，可以替我打聽Irene的事情！
「咦，冰冰，你睇下呢篇新聞！」我發現了一段，是關於他們學校的。
新聞以「委員會成員齊發瘋，被詛咒的學校」作為標題，我想是跟他們提過的故事有關。
「等我睇下，有無名呢……有啦！陳太，李生！係佢地啦！照咁睇黎，黃強講嘅野應該無錯啦！」冰冰邊說邊翻看著新聞。
「冰冰，我仲搵到單舊新聞，你睇下關唔關事？」我拿著一張頗舊的報紙在問她。
「我睇下，呢個應該係岩岩議決通過，應該無用。咦？呢個……呢個係？我唔係眼花卦！」冰冰驚訝地道，然後又繼續翻找剛剛找出來，有關他們學校的新聞。
「無可能！點解會咁架？」冰冰拿起一些報章，很驚訝的道。
「做咩呀冰冰，有咩事呀？」我問。
然後冰冰指著新聞上的某個人，我看見了也感到很驚訝，這是甚麼一回事，是偶然嗎？
─────────阿詩視角結束，換成張天賜視角─────────
我跟他們分開後，馬上跑到父親的道壇。
而在回到道壇時，電話響起來了。
「喂，張氏天命道壇！」我接過電話。
「天賜！你返左道壇啦！咁你陣間記得拎返晒D道具，仲有，你俾晒D符佢地未呀？」電話傳來我父親，天命叔的聲音。
「我岩岩返到黎，陣間會開始執架啦！講起D符就奇怪，唔知點解會少左一張，依家得子鋒無符係身！」我跟他說。
「咁……算啦，無辨法啦，至少你地有符係身！子鋒果邊，你陣間去神枱下面，你會見到有個鐵盒！入面會有道符，道袍同一個公仔，另外會有張紙，寫住子鋒嘅生辰八字！你記得拎晒過去，如果唔係，呢個細路未必過到呢關！」父親說。
「老豆，今次真係咁嚴重咩？其實係咪我去制止子鋒參與呢件事會好D！」我說。
「嚴重，好嚴重！其實係臨走之前，我已經算到子鋒呢次好大鑊！所以我一早俾定張九字護身符佢！估唔到佢咁快就用左！雖然我另外已經俾左個信封佢，入面係另一張九字護身符，但我硬係有唔好嘅預感！同埋你制止唔到佢，佢命中注定要應呢一劫，愈遲應就愈危險！不過勢估唔到，偏偏係我離開左香港，佢先黎應呢一劫！」父親說。
「老豆，講真，你覺得最壞情況，子鋒會點？」我不安的問。
「天賜，唔好諗咩最壞情況啦，自從幾年前小敏單野！我就知道，所謂命運同定數，其實都係可以改變嘅！你依家要做嘅，就係做好晒所有準備！幫佢渡過呢一劫！」父親說。
「呀，係喎，老豆！我見到黃炎冰（Irene）啦，有無咩野要我同佢講或者交俾佢？」我問。
「差D唔記得左佢添，你係道壇個睡房入面，將擺左係櫃頂嘅書俾佢啦！書嘅上面會有幾道令旗，你拎埋俾佢啦！佢睇完知道點樣整個結界架啦！」父親完成了所有的吩咐後，便掛斷電話了，他應該正趕回來香港吧！
「死仔包，你條命咁硬淨，我唔會俾你有事嘅！」我看著收拾好的道具，在心裏這樣起誓！
─────────張天賜視角結束，切回陳子鋒視角────────
我跟雷少進入到屋子裏，只見張伯從櫃子裏拿出一本頗舊的記事本。
「係你地發問之前，我想俾少少野你地睇先！」張伯把他的記事本打開了。
究竟這記事本藏有甚麼秘密？