[校園鬼故事系列 2] [又係你呀陳生] 十不思議事件: （二十二）
經過一輪的討論，天賜和阿詩已經大致了解，發生在我們身上的事情了。
「嗯……大致上我都明白！黃強當然係一個好重要嘅因素，但我反而覺得，我地忽略左一個好重要嘅事實！就係一開始，坑口村黑夜事件，究竟係乜野力量，將你地幾個捉入去，係偶然？定係有目標咁捉？」天賜提出他的想法。
「有目標咁捉？點解你會咁諗？」雷少問。
「呢方面，炎……Irene會清楚過我！因為一個正常結界，係唔會出現所謂嘅裂縫，普通人更加無可能會唔小心入到去！如果係咁嘅話，世界各地就會好頻繁咁，出現唔同嘅失踪事件！所以，如果係唔小心闖到入去，一定係本身有咁上下靈力嘅人！又或者，係有人打開左結界，引左佢地入去！而且，入面果D黑影，我估，佢地唔係想保護個結界或者傷害你地，而係想破壞結界！」天賜繼續說。
「破壞結界？你想話，我地係被佢呃左入去，幫手破壞結界？」我驚訝的道。
「呢個只係我嘅假設！而且，我仲留意到一樣野，雷少你講過，你同你父母係第一批入左結界嘅人，但當時黑影數量無咁多，係唔係？」天賜望向雷少，雷少緩緩點頭。
「而當冰冰同佢嘅父母入去之後，黑影數量開始增加！而子鋒你入到去之後，先出現大量黑影！但子鋒你感受唔到果D黑影嘅靈力或奇怪氣息，係咪咁？」天賜看著我。
「係呀，D黑影好奇怪，我用劍指又好，符咒又好，都可以驅走佢地，但我感覺唔到任何邪惡嘅氣息！成件事好古怪！」我回憶著當時的情況。
「仲有，你記唔記得，你用左幾多次指印之後暈低左？簡單講，你有無發現，你比平時用嘅次數會少左？」天賜問。
「幾次我真係無數！但係……聽完你講，我又真係唔係用左好多次指印！我仲以為用左九字護身法之後，無晒靈力添！」我說。
「無錯，九字護身法係原因之一！但我估，果D黑影，唔係果隻邪靈嘅力量！而係你地本身嘅力量！」天賜解釋。
「唔係卦？果D野係我地創造嘅？」我驚訝的說。
「正確黎講，唔係你地創造，而係你地提供左靈力俾某樣野，然後創造左D黑影！而黑影只有一個諗法，就係破壞結界！由於雷少同冰冰你地本身唔係有好強靈力嘅人，所以黑影數量唔多！但子鋒呢條死仔包，雖然係咁嘅款，但靈力甚至比我或者Irene更強！而九字護身法雖然打散左D黑影，但我諗，所有力量無消失到，而係比入面某樣野吸收左，之後重新創造D黑影出黎！所以最後數量愈黎愈多！當時我一心諗住去救你地，所以無諗太多野就破壞左結界，話唔定我當時做左一個好錯嘅決定！」天賜說到最後，感覺有一點怪責自己的意思。
「唔關小天你事，始終當時佢地被困，係結界入面都出唔到黎。同埋雷少佢地講得岩，如果佢地再出唔到黎，一路直到結界崩壞，可能全部人都唔可以再見到陽光！」Irene安慰著天賜。
「無錯，同埋要怪嘅話，都只能怪本少爺太過天才，靈力太勁，先搞左咁多黑影出黎！唔怪得會咁難對付啦！」雖然我很在意Irene對天賜的稱呼，和阿詩散發出的殺氣，但我還是比較擔心天賜，他可是為了救我才破壞了結界，我可不想他太過自責。
「得啦天才！我無野！雖然破壞結界可能係做錯左，但我地依家只可以做一樣野，就係快D搞掂返件事！如果我無估錯，隻野一開始，就係睇中子鋒你！我估計你第一次見到D相郁，同埋果隻眼透綠光嘅黑影，都係針對你而黎！」天賜分析著。
「針對我？點解要咁做？我唔係又衰靚仔呀？」我驚訝地問。
「靚仔呢，就應該無你份架啦！但係你身上嘅靈力，同埋你嘅命格，對D邪靈黎講，應該會幾吸引！」Irene對我說，天賜則點頭表示認同。
「點解要係我？呢隻女人夠有靈力啦，做咩要搵我？」我不忿氣的說。
「咩隻呀，打爆你個頭呀啦！」Irene作勢敲打我的頭。
「我估……係因為Irene，佢係呢區嘅原居民，所以一開始佢無搵佢！但唔知咩原因，依家隻野，好似已經唔分係咪原居民，證據就係，雷少你地幾個，都受到隻野騷擾！如果，佢真係復活，我估計，已經唔係外唔外人嘅問題，可能成個區域，甚至大嘅地方，都會受到影響！」只見天賜緊皺眉頭，像在擔心些甚麼似的。
「你咁講，係咪呢個……都未係最壞情況？」我問。
「嗯……最壞情況係，果隻邪靈，俾人誤導左，甚至俾人操控左，所以先會好似依家咁，咩人都搞！」天賜解釋著。
「無可能！要誤導或者操控邪靈，係幾咁難嘅事，你唔會唔知！」Irene緊張的提醒他。
「如果……係靈力比佢高嘅，或者……係佢嘅至親，都唔係無可能！」天賜對我們說。
「至親？唔通……係黃強？」雷少突然這樣說。
「現階段，只可以咁樣分析！我地假設黃強講嘅故仔係真嘅，咁詛咒嘅來源就係黃大一！」天賜回答。
「但係，黃強佢明明講過，黃大一嘅屋企人，俾D逃兵殺晒架？」我問。
「呢層……我都答你唔到，我諗，真係要搵到黃強出黎，等佢答返你！但我硬係覺得有D野，係漏左，未諗到嘅！逃兵！村民！仲有咩呢？」天賜邊想邊抓著他的頭。
「喂喂喂！陣間你禿頭唔好賴我呀！同埋好在你係度，原來之前有咁多野漏左我地都唔知！你幫左我地好多架啦！」說實話，我實在不想令天賜過於煩惱，始終這事件是因我而起的！
「痴線！講呢D！等我整理返少少野啦！基本上所有不思議事件都係因為一個詛咒而黎，而今次單野，好大機會係一個邪靈造成！而呢個邪靈，恐怕已經俾人操控左或者無左咩理性，咩人都會襲擊！而關鍵，相信就係黃強度！所以，我地要做嘅野有幾樣！第一，搵黃強出黎，睇下佢仲知幾多野，同埋搵齊剩低嘅十不思議事件，知道會有咩情況，咁就有機會預防甚至預先驅除！第二，我地要證實一下，黃強講果D野係唔係真，我諗呢個要去圖書館慢慢搵！第三，要諗下，有無方法，可以整返個結界，或者襯隻野未復元，走去打散佢！呢度，我諗得我同Irene可以諗到方法！」天賜整理好，並指出接下來的分工。
天賜的分析非常到位，而且分工亦非常合理。
但有些事情，不應只進求合理性，這種分工下，肯定是我和雷少一組、冰冰和阿詩一組、而天賜和Irene是一組的！
我偷偷地的看了阿詩一眼，只見她眼內閃過一絲殺機！
我的天，這是我認識的阿詩嗎？我差點把心聲都叫了出來！
「嗯，咁樣嘅話！我同冰冰一齊去圖書館搵資料，睇下阿強之前講果D野係咪岩嘅！雷少就同子鋒去搵阿強！至於天賜，你同Irene研究下有無方法可以制止今次嘅事啦！」阿詩緩緩的分配好大家的工作，我真配服她的冷靜。
「無錯，大致上係咁！不過，Irene，關於對付果隻邪靈嘅事，我諗要交俾你去處理先啦！始終我無跟任何師傅，呢方面仍然係你比較優勝，無問題嘛？」天賜看著Irene。
「我原本都諗住自己研究架啦！我唔會忘記落荒而逃呢種恥辱，我一定要搵到方法對付佢！」Irene咬牙切齒的道。
「天賜，咁你點呀？」阿詩捉著天賜的手說……她平時會這樣做的嗎？
「我要返去老豆個道壇度！拎返D道具過黎！同埋，呢度有幾道符，今朝老豆打俾我果陣，提我記得俾你地！咦？點解得五道符，仲有道去左邊呢？」天賜邊說邊在他的背包裏尋找著。
「唔緊要啦，天命叔好耐以前咪俾左道符我嘅，果幾道符你地要啦！最緊要爭取時間，我唔想拖到太夜！」我說。
「咁好啦，我陣間去完道壇，順便返屋企搵下道符啦！咁我地就分頭行動啦，今晚七點係度集合啦！」
天賜說完後，我們便分成四組人，各自去完成自己的任務了！
看我把黃強給抓出來，好好教訓一頓！