[校園鬼故事系列 2] [又係你呀陳生] 十不思議事件: （二十一）
「阿鋒！阿鋒！死人頭！」我又再一次聽到熟悉的叫喊聲。
「小……小詠？」我睜開雙眼，看見一張熟悉的臉，但我仍在疑惑著，這是否真的小詠！
「做咩呀，死人頭！一排無見做咩成副死人口面咁架？」小詠慢慢走向我，但我本能的向後退了數步！
「你……你真係小詠？」我仍然警戒著。
「你講乜呀，我唔係小詠係邊個呀？你係咪讀書讀上腦傻左呀！」說完後，她一手打向我的頭上。
「哇，頂你，無啦啦打人！咦，唔暖唔凍嘅？」在她的手碰到我的前額時，我感覺不到任何溫度，加上這暴燥的脾氣，應該是真貨吧。
「你講乜鬼野呀，係咪痴左線呀，等我幫下你，打醒你先！」說完後她又把手打過來，雖然不會弄傷我，但我還是下意識的擋下來了。
「痴線啦你！你之前搞咩呀？我試過用意識同你溝通，發覺你切斷左同我嘅聯繫！打俾天命叔又搵極都搵唔到！依家又無啦啦出現！你地究竟發生左咩事？」我真的挺擔心他們的情況，畢竟現在已經十二月，他們已經離開了超過半年。
「之前同你講過啦，我地無事呀，不過係師傅呢邊有D教派同師兄弟之間有D野要處理，所以先搞咁耐者！之前佢地掛住講數，又叫左D靈呀神呀鬼呀，真係乜鬼都有，搞到D磁場亂晒，我先焗住要切斷同你之間嘅連繫者！同埋大陸呢邊電話收得好差，所以我地都廢事搵你地！」小詠解釋著。
「哦，原來係咁，咁你地幾時返黎呀？」知道他們都平安後，我又想起自己這邊的情況，如果天命叔能早點回來，我相信事件肯定能很快落幕。
「我地其實差唔多走得架啦，不過快極應該都要一個月！」小詠說。
「吓！一個月！咁……咁你地小心D啦！」我的心情馬上跌至最低點，看來是不能依靠天命叔了。
「咪住，阿鋒！你抬高頭！」小詠突然變得嚴肅，並要我把頭抬高，只見她對著我的臉觀察了數分鐘。
「喂喂，搞咩呀？」我被她看得有點不自在，只見她緊皺眉頭，好像在想著甚麼似的。
「阿鋒！幾個月前，你同我講係學校遇到嘅事，處理好未？同埋個過程係點，你快D講俾我知！」小詠說。
於是，我便把坑口村黑夜事件，和最近發生的事情詳細告訴她。
「頭先我就係諗住叫你同天命叔返黎幫手，不過唔緊要啦，有我係度，實搞得掂嘅！」我這樣對小詠說。
「阿鋒……你……不如唔好插手呢件事啦！」只見小詠筆直的看著我，一點開玩笑的意思也沒有。
「……理由呢？」我不由得認真的想了一想，然後問她。
「我……我唔想你死！」她認真的看著我。
──────────────────────────────
「喂，死仔包，咁早到呀？」天賜的聲音突然傳來，使我從沉思中清醒過來。
「哦，係……係呀，今朝早左起身。」我還沒有回過神來。
「喂，死仔，無野呀你？呆下呆下咁嘅？」天賜搭著我的肩膊。
其實，我很想告訴他，是真的有事發生了。
早上的夢，原本應該是高興的，畢竟終於和小詠聯繫上了，但想不到，小詠居然這樣說，我實在是接受不到！
這是我的命運！就算告訴了天賜又如何？
是我把他牽扯進來的，要是在這個時間告訴他，我發的這個夢，天賜肯定會制止我，不讓我繼續參與這件事。
我可不希望，要別人來代替我受罪！
而且，俗語有云：「避得一時避唔得一世」！難道每次遇上困難，我就要落荒而逃嗎？
如果我沒有在天命叔身邊學過道，或者我可以選擇不理這件事，因為我未必會發現，亦沒有能力去管這些事！
現在，我的能力雖然不大，但沒有理由就這樣退縮的！
大慨，是受到那維園大叔的性格影響吧！
「我無野呀，可能放假太早起身，適應唔到者！」我笑著對天賜說，內心卻有點不安。
「叫你早D訓架啦！係喎，老豆有無搵你呀？」天賜突然這樣問，使我有點驚訝，該不會那大叔跟他說了甚麼吧。
「無……無呀，佢有搵你咩？」我說。
「係呀，佢古古怪怪咁，今朝無啦啦打返黎屋企。問我係咪又被你捲左入去D咩怪事度，我答完佢，佢就叫我小心D，同埋帶齊D工具先好去！仲有，佢話你果十年嘅陰運未行完，要我睇實你喎！之後佢就話佢會盡快返落黎，叫我地自己小心D！不過佢無搵你嘅話，應該唔係太嚴重者！」天賜說。
「哦，係啦，個大叔自己生人唔生膽者，好地地點會有咩事先得架！」我雖然這樣說，但心中卻明白，小詠為甚麼要特意在夢中勸我不要參與這件事！
然後，只見天賜突然搭著我的雙肩，用懷疑的眼神看著我！
「佢地真係無搵你？你唔係有野想隱暪呀？」
我知道，這時我絕不能退縮，也不能有任何情緒上的變化！我偷偷在背後結好手印，使自己的心神安定下來。
「無呀！有乜鬼野好隱暪先得架？你果然係維園阿叔個仔，連D疑心都遺傳埋俾你！」我故作輕鬆的說，希望不會露出任何破綻吧！
然後，只見天賜仍然筆直的看著我雙眼，然後他把雙手慢慢從我身上移走。
「你個頭就遺傳！我呢D講求科學性架嘛，雖然我唔識好似老豆咁睇D咩氣咩面相，但我都學緊D心理學讀心術呢D！頭先你答我果陣都無咩情緒起伏，者係你應該無講大話！不過老豆真係古古怪怪咁，好少可會特登打黎講呢D野！」天賜雖然認同了我沒有說謊，但還是認為整件事都有古怪，不可以讓他繼續想下去。
「個大叔可能年紀大，又係上邊唔知搞D咩黎，先會咁者！唔好講咁多啦，就黎十點啦，我地快D行啦！要佢地等就唔好啦，果度有個女人好鬼恐怖，唔知佢會唔會因為我地遲到而殺我地滅口架！」我邊開玩笑邊推天賜前行。
我和他走到厚德村的公園裏，只見在約定的地點，已經有四個人在那裏。
奇怪，為甚麼是四位？
Irene、雷少和冰冰，不是四個人嗎？
再多走幾步，我總算看見那神秘的第四人是誰了。
「咦！阿詩？」我不禁叫了出來，我原本就是不想牽連到阿詩，才想把事情盡快處理好！而我的驚訝還未完結，因為天賜也突然大叫！
「咦！炎冰？」只見天賜露出了燦爛的笑容。
只見Irene瞬間把頭轉過來，看著天賜。
「你……你係，張天賜？張天命？原來係你！小天！點解我會諗唔到！」
「好耐無見啦，點解你係度嘅，炎冰！」天賜又這樣叫她，她的名字真是炎冰嗎？不，不可能，她的中文名字應該會紀錄在學校，加上她也會作自我介紹，冰冰沒有理由不知道她的名字。
只見Irene拉了天賜在一旁，然後跟天賜竊竊私語，不知道在講甚麼秘密。
而這期間，我只感到身旁傳來一股銳利的殺氣！
我偷偷看了旁邊，只見阿詩保持笑容的看著兩人，但站在她旁邊，我竟感到恐懼！
「阿鋒呀，我想問，你知唔知佢地係咩關係呀？」雖然阿詩的語氣平淡，但比起小敏還是之前遇到的黑影，更能帶給我死亡的威脅，這就是小詠要我小心的原因嗎？
「唔……唔知呀，我都係早兩日先識Irene，唔知佢地咁多！呀，不過之前佢提過佢師傅同天命叔係師兄弟，可能咁樣見過面都唔奇！哈哈，無野嘅阿詩！」希望我的解釋能令她滿意吧。
「阿鋒你真係奇怪，我會有D咩野者，係咪？」阿詩那沒有任何高低起伏的聲線，感覺像一把又一把的利刃在我眼前，天賜，求你快點和那女人回來吧！我可不想插手你們之間的戰爭中！
而雷少和冰冰，不知甚麼時候，已經站在一個安全的位置觀察著我們，絲毫沒有介入的意思，可惡！
然後，Irene和天賜走回來了。
只見阿詩走上前，一下子挽著天賜的手臂：「你地傾左D咩呀？」
「哦，無呀，炎…… Irene佢同我講返以前係道壇D野者！」天賜明顯在隱藏甚麼。
「哦，原來係咁，唔緊要啦，快D過黎呢邊啦。我頭先早左過黎，聽雷少講，今次件事都幾嚴重咁！」阿詩不愧為優質女友，知道甚麼時候作甚麼事，剛才湧現的殺氣一下子沒有了，但，明顯是我對女人的想法不夠認識。
就在我們集合起來，準備討論之前，阿詩悄悄地跟我說：「子鋒呀，完晒之後呢，我想你幫我問下天賜同Irene D野呀！我諗你應該好樂意幫忙架啊！」
難道我有選擇嗎？我只好答應她，不過那是題外話了，有機會再說吧。
然後，我們再次集合起來，總算開始討論這次的事情了！
小詠的說話，就讓我暫時忘了吧！