[校園鬼故事系列 2] [又係你呀陳生] 十不思議事件: （二十）
這天晚上，我和Irene，連拖帶跑的，可以用逃出學校來形容！
我扶著雷少，Irene扶著冰冰，經過墜道，一直去到厚德村才停下來。
在途中，雷少和冰冰也清醒過來，我們一行四人，一言不發的，在公園坐了下來。
「頭先......發生左咩事？我好似係廁所見到......見到D好恐怖嘅野，之後我就暈左啦！」冰冰首先打破沉默。
我跟Irene相對而視，卻不願搭話。
「冰冰，你俾佢地靜下先。」雷少搭著冰冰的肩膊，把她帶到一旁，看來是跟她解釋暈倒後的情況。
「喂！」我低著頭說。
「咩事呀？」Irene也是沒精打采的回應我。
「你......第一次呀？」我問。
「你講乜野呀？」她用鄙視的眼光看著我，我才察覺自己問的方式有點奇怪。
「我係話......好似頭先咁逃走......你係咪第一次？」我更正了我的說法。
「哦......係呀，我跟左我師傅咁耐，通常我都把握到情況。我知道搞唔掂就會搵師傅幫手，係第一次咁樣逃走！你呢？都係第一次？」Irene把頭垂得低，看來是很不甘心。
「我？我唔係第一次啦！我記得果陣，第一次同天命叔去做果D咩除靈，個維園大叔話要俾我學野，感受下咩叫恐懼，佢掟左我入間屋，等我一個人係入面！果次我就好似D鬼片咁，見到D杯呀碟呀，飛黎飛去，又見到貞子係電視機爬出黎！果陣我連一個指印都未學識，又無符又無劍，我真係嚇到癲！個大叔明明講過，鬼係能量體黎，我就以為所有野都係幻覺，點知隻杯飛埋黎之後，我就暈左啦！」我回憶著。
「哇，你師傅都幾......幾大膽喎！」她驚訝的看著我。
「大膽？佢果D叫做虐待！我記得醒返之後，佢對住我淫笑，問我係咪重新認識咩係能量體，同咩叫做恐懼！」想起那時的情況，我還真有點憤怒。
「咁係你蠢者！」說完後，她對著我耳邊吹了一口氣。
「哇，搞咩呀你？」我掩著耳朵對她說。
「岩岩我吹果口氣，咪又係一種能量！除左令你感受到，仲可以吹郁你D頭髮，所以飛杯飛碟有咩咁奇喎！」她笑著對我說，看來是回復了一點生氣。
「我點知者，果陣咁細個！仲有呀，我記得第二次佢帶我出去果陣，佢又話要俾我感受下咩叫做正能量！佢果次夜媽媽掟左我去個爛鬼山頭度，我一條友係山度摸黑咁行，行到咁上下，我就覺得好似搵到路咁，仲見到有好多人落山，果時我都未知咩事，咪跟住佢地落山囉！之後我諗住同佢地講野啦，但佢地地個個死人咁款，淨係用對死魚眼望住我，之後我就感覺到，個人好暈，然後就有好多把聲係我腦入面。有D叫我去死，有D係咁話生存無希望，各式各樣嘅絕望係我腦入面響起！聽個維園阿叔講，佢係我爭少少跳崖果陣，救返我上黎！」我回憶起這不愉快的往事。
「吓，佢真係咁癲？你果D應該係自殺死左嘅靈魂集合地，所以充滿絕望嘅氣息。未受過訓練就去果D地方，好易痴線架喎！同埋我又唔明，咁樣點知咩係正能量？」她好奇的問。
「都話佢癲癲地架啦！佢話只有感受過真正絕望嘅人，並且跨過呢道牆，以後就睇咩都咁正能量喎！佢仲話如果我痴左線，對我黎講都係一件好事！之後呀......」我就這樣跟Irene說起了過往的事！
「唔怪得你唔拜佢為師啦！」她用明白了一切的語氣對我說。
「我已經試過好多次呢D情況，仲逃走過好多次添！所以，你都唔好咁介意啦。」我對她說。
「嗯......多謝你！」她看來已經完全打起精神來了。
只見雷少和冰冰慢慢向我們走來。
「睇黎你地都無咩事啦，可唔可以同我地講下頭先發生咩事？」雷少問。
「我講你地知啦！」然後我便把剛才發生的事告訴他們。
「原來係咁，者係話，十不思議事件，全部都開始係學校重演！」雷少說著。
「咁點算呀？我地學校會變成點呀？」冰冰擔心的問。
「我地暫時未諗到辨法，不過，如果可以聯絡到天命叔或者Irene師傅嘅話，可能會有方法都未定！」雖然沒有太大的自信，但我確信天命叔會有方法的，而且，我還有天命叔交給我的信封，他曾提到，這信封應該可以助我避過一劫，大概是一些強力的符咒吧！
「好彩之後兩日都放假，我一定會諗到辨法嘅！」Irene回復了自信，在缺少了天命叔和她師傅的情況下，也只好相信她了。
「不過，我地都唔係無野可以做！雷少，冰冰，你地係原校生，一定知道關於十不思議事件嘅野，不如由你地話返俾我地知，剩低嘅不思議事件係咩啦？上次阿強講左四個，坑口村黑夜事件，同埋岩岩係學校見到嘅吊死屍，者係已經六個！仲有剩低四個係乜野？」我問。
「無錯，我地係知道，但我地知果個版本，同阿強講嘅，或者學校遇到嘅，都好唔同！我諗，我地都係要搵阿強，佢可能會清楚發生緊咩事！」雷少說。
「但係，你肯定我地可以搵到佢？同埋，你都話佢已經唔係你識果個黃強，你覺得佢會幫我地咩？」我問。
「唔知，但點都好，要知道十不思議事件，就一定要搵黃強出黎！」雷少說。
的確，我也明白，黃強的舉止和行為也十分奇怪！
再加上，他在這個時候休學，要說他和這件事沒有關係，大慨也沒有人會相信吧！
但知道了他的情況，真的會對這事件有幫助嗎？我真的不能肯定。
「阿鋒，你諗得太多啦，你應該好似你師傅咁，諗到就去做！有D野唔做，係永遠得唔到答案！」Irene對我說。
對，現在不是煩惱的時候，根據Irene的說法，那邪靈正在休養生息，但沒有人能保證，哪天它會完全復活過來！
如果它真的有如此大的能力，那不單止學校，連坑口村，甚至更遠的地方，也有可能被它波及！屆時，如果影響了阿詩，我怎給天賜一個交待！
「阿詩......係喎，點解我諗唔到，仲有人可以幫我地手！」我竟然現在才記起我的好兄弟。
「仲有咩人會幫我地？」他們齊問。
「張天賜！雖然條友仔同我一樣，無拜天命叔為師，但條友係醒目仔黎，可能幫到手，又或者諗到D我地漏左嘅地方！」我說。
「咁事不宜遲，我地聽日係厚德村集合，到時睇情況去做野啦！我今晚會返去睇下師傅留俾我嘅筆記，睇下有無咩方法可以鎮壓佢地！」Irene說。
「好啦，咁聽日十點鐘，係厚德村等啦！」我說。
然後，回到家中，我致電給天賜。
「死仔，咁夜打俾我咩事呀？係咪測驗唔及格黎自首呢？」天賜一拿起電話便對我說。
「咩......咩測驗呀，我今日測，邊有咁快派呀！仲有，我打黎係想你幫手架！」我嚇了一跳，因為我完全忘了今天的測驗，應該是有史以來最糟的一次，要是真的不及格，也是非戰之罪吧。
這樣想著的我，便心安理得的，跟天賜解釋我遇到的怪事。
「原來係咁！睇黎今次單野，仲惡頂過小敏果次！」天賜回答我，看來他也感到不安。
「係呀，如果你真係唔得嘅，無所謂架！我都唔想連累你！」我真心的道。
「痴線！識咁多年你同我講呢D，我係諗緊點同阿詩講好者！」天賜說。
「認真，如果阿詩佢唔俾你黎，你同我講聲得架啦！千祈唔好勉強，我呢D天才無咩野搞唔掂嘅！」我說。
「得啦，天才！我陣間同阿詩講啦，我搞得掂架啦，聽日十點見！」天賜說完便掛上電話了，真不枉我和他多年的交情！
來吧，我就不信有甚麼是解決不了的！