[校園鬼故事系列 2] [又係你呀陳生] 十不思議事件: （十九）
「你......你講咩呀？邊個蠢呀？」我對她說。
「呢度有其他人咩？梗係話你啦，死蠢！」媽的，這臭婆娘。
「你就蠢，點解你要俾個假名我？同埋點解你會出現係呢間學校，係偶然定你特登黎接近我？」我指著她問。
「唔好手指指先！所以咪話你死蠢囉，好地地係街點會俾個真名你先得架！不過我估唔到你果次俾我嘅係真名者！哈哈哈！同埋唔好諗到自己咁重要啦，我點會特登為左你入黎呢間學校！」她略帶輕佻的取笑我。
「哼！係你自己身有屎先唔敢俾人知你真名者！唔係特登嘅話，咁你點會係度？」我反駁說。
「點解係度？因為近囉，反正中六七係邊度讀都一樣，咪揀間近架囉！」她說。
「近？你都係坑口村住？」該不會她也是村民吧？
「對唔住，你估錯左！我係厚德村住！唔係個個都係你諗咁，同坑口村有關架！」她看著我，我感到她絕對有些奇怪。
「哼，你講我就要信？」我實在不太相信這女人。
「信唔信隨便你！你呢D蠢材，邊識分真假！」
「好啦喎，唔好蠢材前蠢材後喎！」我真想賞她兩三巴，可惜的是我不會打女人！
「唔咁樣嗌你點嗌你呀？蠢到死，無啦啦整爛個結界！」Irene不肖地說。
「你......你點會知......」我正想問她的時候，只聽到走廊傳來冰冰的慘叫聲！
我和Irene馬上跑到洗手間，只見冰冰和雷少已經暈倒在地上。
「雷少，冰冰！」我馬上跑到兩人面前，照顧著他們。
「嗯！佢地身上面有殘餘靈力！依家幾點？」Irene這樣問我。
「依家？六點過少少！」我雖然仍感到疑惑，但下意識的還是回答了她。
「咩話？過左六點？唔好理佢地住，你跟我上黎天台！」她面色突變。
我檢查了一下二人，應該只是普通的暈倒罷了，於是決定先跟她走上天台。
來到天台，只見她正把一些令旗插在地上。
「你仲望咩呀，快D幫我將D令旗插好啦！」她對我說。
我本想問她，這些令旗應該插在甚麼位置！
但下一秒，我便知道不需要發問，因為我清晰地感到，某些地方散發出一種特別的靈力！應該就是要把令旗插在那些地方吧！
所有令旗都放好後，只見她口中念念有詞，跟天命叔的感覺有點相似。
然後，只見令旗位置都發出微弱的光芒，感覺覆蓋了整間學校後，便自然消散了！
「你究竟係咩人？」我看著Irene。
「我？咪同你一樣，都係道家弟子囉！」她筆直的看著我。
「咩話？你係道家弟子？」我驚訝的說。
「係呀，如果以年資計，你應該叫我一聲師姐先岩！」
「痴線，我都唔係道家弟子，師乜鬼姐！」我反駁。
「咩話？你唔係道家弟子？無理由架，師傅明明話你拜左入張天命門下架？」她驚訝的道。
「總之，我無正式拜入佢門下！我只係一個普通嘅學生！同埋，岩岩你係度做乜？」我抱著懷疑的態度跟她說話，我還沒有完全信任她。
「原來你無正式拜師，唔怪得咁鬼蠢啦！我做乜？咪就係幫你地執手尾囉！」她對我說。
「夠啦，唔好再話我蠢啦！同埋，我有咩手尾要你執呀？」我問。
「唉，算啦，你無拜師嘅話又好難怪你！早幾個月，你地雷少係咪入左結界？」她問我。
「點解你連結界都知？」我問。
「你咁講者係真係入左去啦！你知唔知，就係因為你地破壞左結界，釋放左D邪靈出黎，搞到我先要係天台呢度整返個結界，如果唔係，之前果幾個月會咁和平！」她說。
「吓？唔好嘅野？個結界明明得返唔夠一個月嘅效力，我地衡量過先破壞架喎！同埋，你唔知我地當時有幾咁危險，結界入面有好多黑影，我地好辛苦先走得返出黎！」我說。
「痴線，封印類嘅結界，如果提早被人破壞左，基本上除左失去效能之外！仲會令被封邪嘅邪靈重新釋放出黎，之前困住佢地果D功夫就全部白費心機啦！我估唔到呢件事係咁嚴重，如果你講嘅黑影真係存在，呢鋪就真係大鑊！唔怪得我每次嘅結界時間都愈黎愈短啦！」她擔憂地說。
「吓？你咁講，者係話俾班逃兵殘殺嘅怨靈俾我地釋放左出黎？」我說。
「我唔知你講咩逃兵咩怨靈，我淨係知，果日你地破壞結界嘅時候，我有一秒鐘感覺到非常邪惡嘅力量！之後就消失左！跟住有一晚，我留左係學校，遇到一D怪事，我就即刻上黎整左個結界！原本我以為我成功鎮住佢，但當我結界有效嘅時間愈黎愈短，我就知道，果日果股邪惡嘅力量唔係消失左，而係沉睡左，正確D講，佢係休養生息緊！但依家睇黎，佢嘅力量慢慢恢復緊，唔知仲有幾耐佢會完全復活！」她愈說，臉愈變得陰沉！
「咁......咁點算呀？你有無辨法呀？」我緊張的問。
「無！以我嘅力量，個結界都只係阻到佢一陣！」她搖了搖頭。
「咁點呀？最衰我聯絡唔到天命叔啦！呀，係喎，你搵你師傅幫手咪得囉！」我提醒她。
「無用，幾個月前，我師傅交低左D野俾我之後，就去左中山，依家完全聯絡唔到佢！」她說。
「唔係卦，佢又係去左中山？天命叔又係喎，佢地約埋架？」
「吓，你唔知咩，張天命同我師傅，係師兄弟關係！佢地一齊去中山，有D重要野處理！不過好似今次咁，完全聯絡唔到就真係少有D！」
不是吧，天命叔和她的師傅是師兄弟？他們究竟在處理些甚麼事情？
不對，現在要解決的，應該是眼前的問題！
當我想繼續詢問她時，樓下又傳來一聲慘叫，是冰冰！
我和Irene馬上跑了下去，只看見雷少正扶著冰冰，逃向課室。
至於為甚麼發出慘叫聲，我和Irene馬上知道了原因，因為他們背後，有一個看似寵物小精靈裏的小拳石的東西，正在慢慢接近他們。
「企係度！」我馬上跑上前，制止那酷似小拳石的東西。
當那東西聽到我的叫聲，它有意識地向我轉過來。
我看到它的正面時，媽的，我差點嘔吐了出來！
只因這東西跟形象可愛的小拳石相差甚遠，那為甚麼我會錯認它是小拳石，是因為從後面看來，它只有一個頭和兩雙手在漂著！
但從正面看的時候，那腐爛的臉容，沒有雙眼的頭部，被削去了的鼻骨，而且不斷從臉上的洞流出不知名的液體，我仿佛嗅到了前所未有的惡臭。
而這怪物，正是阿強當日形容，女廁內的那隻怨靈！
不同的，是這怨靈不是單眼的，而是雙眼都不見了。
下一秒，我看見它把手伸出來，慢慢逼向我。
我感到非常驚訝，驚訝的不是它可怕的外表，而是它手上，拿著的眼球！
這和阿強說的，那怨靈被陳太撞跌了眼球的情景太過相似，阿強說的故事，難道是真的？
「哇，核突到咁嘅！天兵神將聽我命令，破！」只見一道符咒從我身旁飛到那東西的頭上，然後Irene瞬速念了咒語後，那顆人頭和它的雙手消失了！
還來不及喘息，我們又聽見雷少的叫聲從課室裏傳來！
當我和Irene來到課室，總算明白為甚麼他會嚇得叫了出來！
只見一具又一具的屍體，正垂吊在課室裏！
數量少說也有二三十具，而每一具的屍體，都以怨恨的眼光，看著我們！
不知道是否因為我和Irene沒有任何反應，那些屍體可能心有不甘，只見它們慢慢的滲出血水，七孔流血，大慨是最適合用來形容它們吧！
大慨這還不夠驚嚇，它們還附送了一些眼球和內臟，不斷的從它們的身體掉了出來！
「無可能架，我明明整好左結界架！雷指印！」只見Irene像被激怒了般，結出了雷指印，像有一道閃電般，向那一具又一具的屍體襲去！
然後，所有屍體都消失了。
「勁喎，你掂左啦！」我拍了拍她的肩膊，以示讚賞。
「唔係，我無成功到，頭先只係對我地小小嘅警告！如果唔係，無理由頭先個符咒同岩岩嘅指印可以咁易打散佢地！」Irene搖頭歎息道。
「點都好啦，唔好再留係學校啦！我地快D走！」我把雷少扶起，Irene則扶著冰冰，瞬速的離開這裏。
來到大門，只見牆上那些照片，所有人像都望向我們，並發出詭異的笑聲，仿佛在恥笑著我們的逃離。
我跟了天命叔這麼久，從沒有遇過這樣大膽的惡靈！
「可惡！」只見Irene臉上露出心有不甘的表情，大慨如果沒有冰冰和雷少在，她會回去再次對付那些東西吧！
我拍了拍她的肩膊，示意她要忍耐！
我感覺得到，即使再留下來，也不會對事情有幫助！
這次，我就先承認是我們的敗北吧，下次一定要解決它！