[校園鬼故事系列 2] [又係你呀陳生] 十不思議事件: （十八）
「阿鋒，阿鋒！」我感到誰在呼喚我，我慢慢睜開雙眼。
「係咪小詠呀？」我感到四周都是明亮的白光。
「係呀，我係小詠呀，好掛住你呀。」小詠跟我說。
「你去左邊呀？我地搵左你好耐啦！」我對她說。
「無呀，我呢邊有少少麻煩，所以先咁耐無搵你。我好掛住你呀。」小詠說完後便向我撲了過來。
當小詠接觸了我的時候，我感到一股溫暖的感覺，給了我一種安心的感覺！
「係，係咩，我都掛住你地。」我的手不自覺的抱著她。
「係啦，阿鋒，我有野想你幫手呀。」小詠在我耳邊輕輕地說，使我全身一陣蘇軟。
「你……你想我幫你做D咩呀？」我感到自己的身體和小詠的身體也在發熱。
「我......我好耐無見你，發現自己真係好掛住你……你可唔可以應承我，以後都隨時陪住我呀？」小詠把臉慢慢湊到我眼前，粉嫰的嘴唇，仿佛在要求我好好的親上去。而且，我更感到從她身上傳來的香氣。
「我……我……」原來，這個小詠是……
「阿鋒，應承我啦，我好寂寞呀。」她的雙手在我頸後纏得更近了，果然，小詠你對我……
她的香氣相當誘人，我把我的嘴唇靠近她的耳朵，告訴她我的答案。
然後，「小詠」怪叫了一聲，從我的身上彈開了。
「阿鋒……你……你做咩呀？我好……好痛呀！點解……我唔會放過入侵呢片土地嘅人……我唔會放過你地！」她的聲音慢慢由溫婉，轉為痛苦，然後變得猙獰！然後她的軀殼慢慢腐爛，變成一個黑影般的模樣。
「哼，你呢D雕蟲小技，我中一果陣已經中過招啦！同一招對聖戰士黎講，係唔可以用兩次架！」我對眼前的「小詠」說。
黑影知道計劃失敗了後，飛快的消散了，而我也從睡夢中清醒過來。
「可惡！好在天命叔一早叫我同小詠約法三章，如果唔係頭先真係會中招！」我心中這樣想著。
還記得，那天和小詠去了道壇，天命叔解釋給我們聽，為何會把我們的意識連接起來。
為了確保我能分辨出真的小詠，亦不會在意識中發生甚麼奇怪的事情，他替我們定了一些制約！
「好啦，雖然你地兩個嘅意識係連接左，好多嘅訊息交流會方便左，但如果再次遇到小敏呢D能力比較勁嘅鬼鬼怪怪，佢地好大機會理用呢樣野，扮成你地個樣再去呃你地！記住，鬼同人一樣，都好鍾意講大話，但比起人麻煩嘅係，鬼提出嘅要求絕對唔可以隨便應承，如果唔係後果自負！為左令你地準確咁知道意識入面嘅你地係堅定流，你地係意識層見面嘅時候，唔會感受到任何氣味、體溫！」天命叔說。
「點解唔可以有氣味同體溫呀？」我問。
「人嘅意識，係靠所謂五感組成，如果封印左某D感覺，會令你地更能夠保持心境澄明！就好似打坐果陣，D人好鍾意閉上眼，係同樣原理！同埋，最重要，唔會等你地係夢入面發生D咩苟且嘅行為！而最重要，係夢入面，記住，唔好提出任何要求！呢點雖然我無辨法進行制約，但你地應該永遠記住，唔可以提出要求，呢個係保障你地，明唔明？如果係夢入面，你對對方有懷疑，我教你地一句咒語，可以排除其他外來嘅意識！記住，夢嘅主宰係你自己，要排除定接受外物，一切，都係睇你地嘅意志！」天命叔對我和小詠嚴正的說。
正正是那時，天命叔的千叮萬囑，我今天才能避過那黑影的誘惑！
我從床上走了去晝桌前，拿起天命叔給我的銅錢劍，想著：「天命叔，小詠，你地依家究竟係邊？點解完全搵唔到你地？我究竟捱唔捱得過今次呢關？」
看了看時鐘，才早上六時，我打開抽屜，把天命叔給我的一個信封拿出來。
「嗱，我今次要離開香港一段時間，都唔知幾耐先返。除左俾你果D符咒，呢度有封信，你覺得真係頂唔住就打開佢啦，應該幫到你！同埋D符呀，劍呀，小心D用呀！尤其係九字護身法嘅咒符，呢張野救到你一命架，千祈要小心用！」天命叔在離開香港前，曾這樣囑咐我。
我再次檢查了抽屜，除了那把銅錢劍外，其他的符咒已經被我用完了，那九字護身法符咒，我究竟是否用得對呢？
我就懷著不安的心情，回到學校去。
回到課室時，一直到上課的時間，我也沒有看見阿強！
直到老師來了，他宣佈了一件事：「大家，黃強同學因為家庭嘅理由，佢由今日開始會正式休學，所以之前一D分組情況會有變動，詳細情況會由各科老師再同你地交代。」
「唔係卦，尋晚仲一齊溫書，第二日就話休學，呢條友肯定有問題！」我心中這樣想著，只見雷少也露出不太相信的樣子。
然後，我就懷著不安的心情，渡過了整個上午，當然，測驗也因此考得一團糟了。
午飯期間，我們一行五人，除了阿強以外，都一起去吃午飯了，大家在有意無意間，也避免談及阿強和昨晚的事情。
在回去途中，雷少和我稍為放緩了腳步。
「阿鋒，你覺得，阿強佢點解無啦啦休學？」雷少問我。
「吓？唔知呀。坑口村黑夜事件都解決左啦，應該無事嘅。」我回答著，內心其實也感到不安。
「但我硬係覺得成件事有D唔妥，再加上佢休學得咁突然，我......我其實都唔知自己擔心緊D咩。」雷少對我說。
「咁......你知唔知阿強佢住邊？我地放左學去搵佢，搞清楚件事啦！」我這樣提議，畢竟我也很想查清楚這件事，雷少也覺得這樣挺好！
然後，總算等到放學，我和雷少只想盡快去坑口村找到阿強！
「小雷，今日測驗點呀？」冰冰忽然來到我們的課室。
「咦，冰冰。我今日應該OK嘅。」只見雷少回應她時，顯得有些閃縮，那當然了，經歷了這兩晚，那還有心情專注於測驗。
「係咪架？不過唔緊要啦，我地黎緊要係學校搞聖誕Party，但我地班D男仔出晒去比參觀，無人幫我地拎野，所以你今日陪我去買野啦。」冰冰纏著雷少。
「吓？但係......我同阿鋒佢......」雷少向我發出求助的眼神，但我實在沒有理由阻礙他們。
「咦，阿鋒你都係度呀？咁就好啦，你都黎幫手啦，咁我地就有四個人，應該可以一次買晒D所有野啦！」冰冰高興的說。
「吓？四個人？」我用疑惑的眼神看著冰冰。
「係四個人呀，你地好呀，第一次見面，我係今年轉過黎讀中六架，我都係叫阿冰。」只見一名美女從課室外走進來，但......為甚麼感覺這麼熟悉。
「咦，我......係咪係邊度見過你呀？」我問她。
「阿鋒估唔到你係咁架，用D咁舊嘅橋黎識女仔都有架！」冰冰打趣地說。
「唔係呢，我真係見過呢！我記得啦，你係黃炎冰！」我突然記起。
「阿鋒你講咩呀，佢唔係叫黃炎冰囉！都話你唔好用D咁舊嘅橋囉！」冰冰拍了拍我的肩膊。
「唔緊要啦冰冰，我叫鄭婉冰，第一次見面，陳子鋒同學！同埋雷少！你地可以叫我Irene，咁就唔怕搞錯我同冰冰啦。」她好像特意強調了「第一次見面」，真是我記錯了嗎？
「好啦，咁你地依家識左啦，無反對權利，咁我地出去買野！Gogogo！」冰冰邊說邊把雷少推了出去，看來只好暫停去找阿強的想法了。
「行啦，陳子鋒同學！」Irene對我說。
不對，雖然眼前這女人，比起之前見過的黃炎冰要來得高挑和美麗，但感覺卻是一樣的！我不可能認錯！
我們一行四人，在附近的商場，購買了很多的飲品、零食和裝飾用品。
「哇，好在有你地兩個Ja，如果肯定拎唔到咁多野，我地快D返去學校啦，如果唔係就好夜架啦。」冰冰對我們說。
當我們回到學校時，我看見牆上的時鐘，五點三十分，花了兩小時有多，看來今天沒有機會去找阿強了。
我們四人，把所有東西都搬回課室。
「阿鋒，唔該晒你呀！」冰冰感謝我說。
「唔駛客氣，不過駛唔駛咁早買呀？」我說。
「唔早啦，下星期尾就係聖誕Party，今日買定都差唔多啦！」冰冰回應。
「好啦，都晏啦，不如我地走啦！」Irene說。
「好呀，小雷，咁我地去邊呀？」冰冰說，我向雷少打了眼色，示意今天取消去阿強家裏的計劃。
「咁，咁我地一係去睇戲啦！」雷少提議。
「都好喎，哎吔，小雷你要等等我，我突然之間肚痛！」只見冰冰說完後，馬上跑了去廁所。
「都叫你晏晝唔好食三支雪條架啦！雷少，我諗你去照顧下佢會好D，呢度有胃藥同水！」Irene邊說邊把藥搋給雷少。
「哦，好，唔該你。」雷少馬上跑去女廁外等冰冰。
此刻，課室只剩下我和Irene，感覺有點尷尬。
就在沉默之際，Irene開口了：「我都講過，我地會再見面架啦！」
我馬上望向她：「你，果然係......黃炎冰！點解你要扮唔識我，同埋點解要講個假名俾我知！」
Irene？黃炎冰？怎稱呼也好，她冷冰冰的看著我：「正蠢材！」
甚麼，她為甚麼要這麼說？