[校園鬼故事系列 2] [又係你呀陳生] 十不思議事件: （九）
「子鋒，你知唔知我地學校嘅歷史？」雷少問。
「歷史？咩歷史？我讀理科架喎，D史嘅野我唔識架喎！」我回答，卻換來雷少的冷眼看待。
「你係外校生，唔知都唔出奇，但係我地呢D原校生，係呢區生長嘅居民，基本上都一定知呢間學校。唔係因為讀書勁，唔係因為出過咩明星！而係因為，呢間學校，由通過會議，決定建校，足足用左十年時間，先起得成，同埋開始招生！」雷少說。
「十年？一般都係三四年喎，保良局咁拖D工程，係咪用黎洗黑錢架？」我驚訝道，雷少再次以看待垃圾的眼神看著我。
「其實，係果十年期間，學校成立左委員會，負責監督工程。但就係頭幾年，工程進行期間，愈到後期，愈黎愈多怪事發生。本身都只係一D工作人員受傷，或者唔見野咁。但到左後期，有工作人員發生意外死亡！果陣學校請左D人黎做法事，之後靜左一排，去到第五年，學校總算建成！而怪事，呢一刻先係正次開始！係呢間學校嘅工作人員，據傳聞，好多都係事後出左意外，死嘅死，傷嘅傷！除左一D住係將軍澳區嘅工人無事之外，其他全部中招！」雷少繼續解釋。
「吓，咁分明歧視者，果時係咪未有平機會？如果唔係可以去投訴！」我在中途插嘴，林副校忍不住對我說。
「陳同學，麻煩你專心D聽好嘛！」
「超，聽咁耐，我唔悶，讀者都悶啦！」我小聲說。
「果陣雖然咁多工人出事，但學校嘅人根本完全唔知，仲計劃緊之後招生嘅情況！而有一日，佢地係學校傾緊招生情況果陣，學校裏面出左D靈異事件，更導致委員會其中一人死亡！之後，每次委員會係學校開會，都會遇到好多怪事，呢個，就係學校九不思議事件嘅由來！」雷少對著我說。
「咪住，你之前明明話係十不思議事件架，點解得返九個？」我問他。
「無錯，其實原本係學校發生嘅事係得九個，但因為呢D事件，除左搞到委員會成員有人死亡，更影響到開學嘅開學日期，令到開校嘅事一拖再拖。呢件事其實一早已經傳到去保良局董事局果度，只係佢地開頭一路都無做D咩，直到第十年，其中一名保良局董事黎到呢度，佢一次過玩晒咁多個不思議事件，嚇到傻左之後，保良局先正視呢件事！」雷少說。
「哇，一次過玩九個不思議事件，抵過去海洋公園玩喎！」我驚歎地道，雷少已放棄不看我了。
「跟住，保良局董事局果邊，有D成員都識得一D佛教人士，於是請左佢地去學校，睇下究竟發生咩事！而一黎到學校，聽講，十個佛教嘅僧人黎到，佢地即刻就覺得好唔舒服，而當時其中一位僧人，正正係我阿叔！佢後來話返俾我知，佢地當時，用左三日三夜去唸經淨化呢度嘅邪靈，但發現有一隻邪靈，無論點樣都無辨法淨化，而且更搞到佢地嘅靈力愈黎愈弱。於是，我阿叔當時做左一個決定，佢決定用結界封印佢，而且要將成間學校，以至成個坑口村，都要封印！」
「結界？就係指……呢度？」我問。
「無錯，我地身處呢個地方，我地稱之為『裏坑口村』。既然你有學道，咁相信都有聽過咩係結界！簡單講，阿叔當時用左一種比較特別嘅結界，為左唔好影響係度住嘅人同埋學校運作！佢用左大量符咒，同埋集合左當時佢所有師兄弟，幾乎每人都用盡所有靈力，係坑口村同學校，分別十個地方，去進行封印！據我阿叔所講，佢地已經將所有唔乾淨嘅野封印左！而且，十年內，所有唔乾淨嘅野，包括果隻淨化唔到嘅邪靈，都會消散於結界內！」雷少說。
「又係十年，乜中國D乜教物教，咁鍾意封十年，又唔封耐D又唔封短D！一係一早消滅佢地咪無事囉！」我對雷少說。
「其實係好正常，始終所謂結界，都係能量集合體，會流失，會消散，所以一般都係十年。同埋阿叔都曾經講過，大部份嘅所謂邪靈，封印十年，就算唔消失，佢地嘅能量都會愈黎愈少，因為佢地好難靠自己去補充能量！只有好少數嘅例子，會愈變愈強！」雷少解釋。
我馬上想起，小敏的事情也確實如此，如果不是堅嬸，以上香方式，提供力量，可能小敏根本唔會變到咁惡。
「而設立左封印之後，由於阿叔同其他佛教弟子，都因為消耗過度，之後離開左香港，返左大陸某個地方，修行之餘亦可以回復靈力。不過，由於佢地走左，阿叔好擔心結界嘅運作。所以阿叔就教我地整左D有咒文嘅香，然後吩咐坑口村D人係度賣，同埋定期係幾個地方點香，咁就可以維持結界嘅力量。另外，由於我同阿爸阿媽都係住係呢區，所以阿叔臨走嘅時候，佢教左我地一D方法，可以進入結界入面。」
「我唔明，點解要教你？教學校D老師或者坑口村D村民唔係仲好咩，始終佢地先係直接受影響嘅人！而且，教你入結界，同依家發生嘅事究竟有咩關係？」我仍然有一堆疑問，我實在搞不清楚現時的情況和他說的故事有何關聯。
「首先，做呢場法事，只有保良局董事局內部，先知道用意係咩，唔會想外人知。而且，教坑口村或者老師係唔可能。第一，村民如果知道左，佢地陣間搬走左咁點算？而老師，我相信正常嘅老師係唔會信呢D野，所以，唯一同班佛教徒有關係，而又住係呢頭附近嘅，只有我地。當日，阿叔教我地入結界嘅原因好簡單，因為結界未必可以咁穩定，如果有人誤闖入去，佢地未必可以出得返黎。我地屋企嘅角色，就類似結界守護者咁，有人入左去，我地會係入面搵返佢地出黎。而結界入面，時間同空間理論上同現實應該一樣，但係唔知點解，第一次有學生失蹤之後，我阿媽雖然入左去結界搵佢，但搵返佢之後，發現出黎嘅時間已經過左一個星期。而呢個，亦係第十個不思議事件嘅由來，第一位同學被救返出黎之後，就將呢件事傳開左啦！而之後亦不斷有學生失蹤，救返佢地出黎果陣，時間延長左。而由於咁會嚴重影響生活，我地決定每次只會派一個人入結界。而我果陣都仲係好細個，所以直到我黎到呢度讀書，即係四年前，先至第一次入去結界！」
「就係你俾人影相上晒新聞果次？」我問。
「無錯！果次嘅情況，令到我消失左差唔多一個月！」雷少回答我。
「一個月！」我驚訝的道。
「係，自從果次之後，我同我父母就經常去各個結界點燒香，希望維持結界力量！而我地都以為好成功，因為自從四年前開始，所有失踪事件都無再出現過！但就係你黎到之後，結界俾你闖入左，我同屋企人都開始擔心會出現D咩問題，畢竟今年已經係第十年，根據阿叔所講，今年個結界就會失效！我地只想呢段時間可以平平安安，唔好有咩事，所以我就作個故仔出黎同你講，話有D人同你一樣遭遇，希望你盡量避開坑口村，減少闖入結界嘅機會！」
「我唔明，咁點解釋我兩次都係學校入面見到裏坑口村？但明明我無消失到，你同副校都見到我架？」無錯，第一次出現異象時，我看見學校的照片在笑，那時是雷少拍了我肩膊，令我清醒過來。而第二次，副校在訓話，我更沒有可能消失了十分鐘然後回到現實，若我消失了，副校應該不會和我訓話了十分鐘。
「呢層……我都答你唔到，我估係結界嘅力量愈黎愈弱，同埋就黎失效，我懷疑係咁樣造成一D時空重疊嘅情況，所以，你先會見到自己同我嘅出現！」
「咁，依家呢度D黑影又係咩黎，同埋林副校、冰冰佢地，點解又可以衝到入黎？同埋，有咁多怪事，你地無問過你地阿叔嘅咩？」若只有我是這樣，他的解釋或可勉強過關，但現在牽涉的，可不是只有我，還有一些所謂本區的人。
只見雷少無奈的看了看他的父母，然後又再看著我。
「我阿叔，係十年前，完左法事之後，返左大陸之後，我地就一直搵佢唔到！而黑影，其實係你黎左之後先出現，我都唔清楚係咩黎！冰冰同副校嘅出現我更加係預料唔到！」雷少愈說愈無奈。
「吓，你阿叔失左蹤，咁大鑊？呀，唔係，咁點算先依家？副校同冰冰佢地點入黎又唔知！黑影點黎又唔知！咁我地依家點做好呀？」我緊張的道。
還記得之前天命叔曾說，我有十年的運氣，係比較容易遇到陰事，簡單講，我會非常倒霉，難道這次事件又是我引起的？
「其實，我地已經試過係結界不同的出入點，嘗試離開，但全部都唔成功！我同我父母都覺得，可能係結界愈黎愈弱，所以無足夠能量，再去開啟D出入口！而更嚴重係，結界完結嘅日子好近，萬一結界消失嘅時候，我地仲係結界入面，我都唔知，仲係入面嘅我地，會係點！」雷少說著。
「唉，仆街啦呢次，早知唔咁多事啦，真係拿屎上身！」我心想。
「但要離開呢個結界，都唔係無方法！」雷少突然說。
「吓，有你就早講啦！頂，嚇得我呀！老老豆豆，係就快啦，其他野我唔想理啦，我淨係唔想再留係呢度！」我說。
「個方法就係……破壞結界！」雷少語出驚人的說。