〈是咁的，我是一個童貞魔法師〉: <陣●初試>

於是我係星期六，一個人準時係三點去到中央圖書館十樓。就係我東張西望時，Simon已經先發現我仲同我揮手打招呼。

「Hi Wing！好準時喎！」Simon一如往常般友善。

「應該既。係呢，Aaron呢？」我好禮貌咁回應。

「佢到咗喇，黎跟我去一齊開個會啦。」Simon揚揚手之後又帶我返去上次間研討室。

「喂！阿Wing！」門一開Aaron又走埋黎拍住我膊頭講。





「係呀，今次又有咩事呀？」我馬上搵位坐底順勢甩開佢隻手。

「你地坐好先，都係由我黎講解啦。」Simon一關好門就示意我地都坐定定聽佢講。

「阿Wing，你之前都知道收得我地張八達通，就有義務要幫助聯盟，就好似之前Aaron同Leon佢地保護你咁。我地一直無搵你幫手，係因為知道你果時讀緊Master，另外就係你新加入無咩實戰經驗，所以到宜家你考晒試，又累積咗一定實戰經驗，先開始搵你幫手，講到呢度你有無野要問？」Simon講完之後眼定定咁望實我，根本無諗過比我有任何選擇。

「咁呢次你地想我做啲咩？帶新人我又唔熟規矩，做保鏢又怕唔稱職。」我暗示住我唔想搞咁多野。

點知Simon同Aaron兩個聽完之後相視而笑，隔咗陣Simon先再開口話：





「通常一開始我地都唔會指派新成員做呢啲工作，因為始終需要累積夠一定經驗我地先放心。今次我地想你做一樣入門級又無風險既野，就係幫手起魔法陣。」

「吓？入門？連咩係底法陣我都唔知喎！點幫手起陣？你唔係講笑呀？」我非常詫異。

「哈哈，你唔使擔心，其實好簡單既啫。只要係我地指定既地方按指定既方位企就得。之後自自然然你會感受到魔力開始由你身體一路輸入地面，跟住你會見到地面開始有啲發光，最後見到個五芒星形成就大功告成。」Simon邊講邊拎部電話畀我睇張圖。



「大約就係咁，通常幾幾分鐘就完成，完成之後你自然會感覺到魔力無再流失。而且全程有成員保護，免受黑魔法師打擾。」





咁簡單？我心諗。

「不過呢，你要同其他成員配合下。因為起個陣，每次都要五個成員合作。講明白啲，就係五個人依方位分別企係五芒星既一角，之後就會起到陣。」Aaron補充道。

諗諗下，唔通就係之前阿賤畀我睇果幅圖，五個毒撚著埋同一款衫係地鐵入面圍住枝扶手企咁？唔撚係呀？我接受唔到囉！

「咁有無話要指定著咩衫咁呀？」以防萬一都係問定先。

「哦？無喎。點解咁問呀？」Simon笑住答。

「無，我隨便問問啫，咁幾時出發？」我即刻唔再追問。

「聽日下午兩點，九龍塘地鐵站。到時Aaron同Leon都會係度，Aaron有份負責做護法，而Leon會同你一齊起陣。」Simon講完之後視線轉向Aaron，而Aaron亦笑住對我揮手。

到第二日，我一點五十分左右已經到咗九龍塘，仲係群組入面問定Aaron係邊個位等。





「健康工房對出丫，Leon已經到咗架喇！」

果然我離遠就見到有幾道光係健康工房果個方向，而間中有一兩個黑魔法師入到站都刻意兜路避開我地。

我行到埋去時，已經見到Leon係度低頭捉緊小精靈，連眼尾都無望過我一下。而除咗佢之外，仲有八個魔法師企係附近低頭打緊機，我企係附近都感受到一股毒氣。

咦？今次出黎既魔法師，集齊晒所有顏色種類喎？除咗我一個白色、連同Leon一共兩個黃色、兩個紅色、一個綠色同埋三個藍色，真係前所未見。

「喂！係準時喎！」聽聲都知又係Aaron，佢從後拍住我膊頭講。

「小事啦！咁宜家我要點做？」我轉身問佢，順勢再甩開佢隻手。

「嗱，陣間我會帶你企埋過去，當你企岩位時我就會自動行開。之後你拎部電話出黎扮打機又好，上下咩登都好，總之扮晒等人咁。其他人一就位就自然開始起陣架號喇，通常兩三分鐘就起完陣，之後就可以走人架喇！」





Aaron佢講到好簡單咁，亦唔怪得之Leon同埋共他魔法師扮晒唔識咁，各自企係度打機同扮等人。就係咁，Aaron就示意我跟佢行，為我人生第一次起陣帶路。