〈是咁的，我是一個童貞魔法師〉: <魔法與宗教>

一如所料，深水埗﹑旺角等地區都係魔法師佔優勢。而中環﹑灣仔呢啲地區就黑魔法師佔優。普遍黎講，大部份地區都係打成平局，呢個係大家之間一直以黎既共識。

「所以呢，大部分時間大家都係均勢既。你話好似九龍塘呢啲轉車既地方是旦一方有優勢，肯定會天下大亂。好似之前出咗Ingress之後，多咗好多魔法師出街，之後搞到雙方圍住啲塔開戰，搞到兩邊盟主都要出面調停。」阿賤講完之後聳一聳肩以示無奈。

「咁其它地方既情況又係點？我指香港以外既國家。」我突然醒起條例入面有一條係唔可以係香港以外地方參戰。

「呃…外國黎講，由於地方大好多。一般呢就一個城市由一個小聯盟監管，之後每個國家都有個大聯盟咁，運作方式都係同香港差唔多。不過…」

「不過咩呀？講啦！」





「有少部分國家情況十分特殊，舉個例子，梵蒂岡。無人會係梵蒂岡度發起挑戰，而果度由教庭控制晒雙方勢力。」

「點解會咁？」我十分好奇。

「咁就又要講下歷史。你知道咩叫blue blood嘛？」

「我梗知，純種貴族嘛。」阿賤真係當我傻既。

「無錯。最初既魔法師，係同宗教有關，而佢地身上發出既光，係藍色既，藍血呢個詞其實係咁黎。基本上你去到梵蒂岡，會見到大量藍光。J.K.羅琳都好清楚呢個典故，所以你睇下哈利波特，魔法師幾強調純種呢樣野。」





「嘩！咁佢地咪玩晒？」我表示驚訝。

「以前仲係魔力元素充沛既年代就係，如果唔係政教合一點黎。但宜家魔力元素缺乏，唔可以再靠武力架喇。但係爛船都有三斤釘，佢地係國境內有秘傳既魔法術式，魔力元素既濃度特別高，所以各國政府都忌佢地三分。另外一樣野，佢地選教宗，都係靠戰鬥力分勝負。所以你見大部分教宗都係年紀比較大，因為魔法師年紀越大，魔力越精純。」阿賤講完後一口氣飲晒杯檸茶，好明顯佢都講到口乾。

「唔係話魔法師之後發唔起挑戰既咩？點分勝負呀？」我越諗越唔明。

「每個宗教都有唔同秘傳術式，我知條鐵咩。淨係知每次所謂投票無結果出黑煙，實際係不分勝負要比佢地回氣再戰咋。同埋教宗唔夠勁，點服眾丫。據聞代代教宗既招數都非常誇張，睇下呢張示意圖…」阿賤邊講邊拎佢部電話出黎比我睇。







「有無咁誇呀？」我睇完只係想笑。

「咩呀，大賢者級以上既有以一敵百既戰鬥力架。不過我無份戰鬥所以未體驗過，真係唔識答你。」

其實阿賤講好多野我都無咩放係心上，因為到宜家我都唔係好想面對魔法師既世界。自果日之後我一直等成績出，同一邊小心翼翼咁過日子。之後就到出成績同埋我跟Sally食飯之後同個韓系男戰鬥，達再「質變」呢個境界到今日。

好事多磨，本來一心諗住成功入讀Phd，點知原來要考個GMAT先可以。明明大陸班同學唔使，偏偏得本地學生要考，咩道理黎？考得黎我又趕唔切入學，睇怕都要等下年九月果轉。

最慘既係當我同Sally講完之後，佢連畢業相都無同我影，一路都係咁話忙。搞到阿賤同班老友一齊同我影畢業相時話足我成日。我真係唔鍾意佢地咁。

Sally係真心愛我既，我堅信。

畢業袍都還埋之後，我又懷住沉重既心情返工放工，同準備考GMAT既事。諗起要對住班同事多一年咁滯，實在令人沮喪。

但係我又邊諗到，平淡是褔。





就係上個星期，我係魔法師既白色群組入面，收到Aaron tag我既信息：

「Wing，準備出任務，星期六下午三點總部等，有任務講解。」

要黎既始終會黎。