〈是咁的，我是一個童貞魔法師〉: <魔力分類學>

Aaron指一指地下示意我企過去，我企好之後佢就扮晒野咁行開咗

我留意到由我企既方位黎計，順時針隔兩三個身位既距離企住藍色﹑綠色﹑紅色同黃色既魔法師。

當大家都就位而又扮晒唔識之後﹐我亦急急忙忙咁扮睇電話。就係我心不在焉咁低頭無耐，
就突然感覺到魔力由我全身開始慢慢流向地下，個感覺就好似比人拋離地面咁，有股力量將我個人飛起，而魔力就因為離心力而從我身體入面抽離出黎。

果一刻，我真係有啲驚。

但現實我依然腳踏實地，只有魔力源源流向地下，直到我所企既位置開始現出一道金光，之後係地面好似畫圓咁，一直流向藍色魔法師，繼而一路順時針劃過所有魔法腳下，返到我果度，係地面形成一個金圈。





當然，呢個異象只有魔法師先睇到。

令我有少少擔心既係，我既魔力仲未停止流失。係我開始焦急既時候，忽然由我腳下伸延出一條直線，直到綠色魔法師腳下，之後又由佢腳下伸延到黃色魔法師、再到藍色魔法師、然後到紅色魔法師，最後返到我腳下，一道道金色直線係圈內形成咗個五芒星圖案，之後發出一道耀眼既光芒，繼而消失。

我暗暗驚訝之際，亦發現魔力已經停止流失，睇黎已經完成任務。

「好喇，今日辛苦晒你喇！你可以走得喇，我地會保護你返去以防有人趁你魔力低下時抽水。」Aaron一邊拍我膊頭一邊講。

「完咗架喇？我仲以為會有更驚天動地既事發生。不過有樣野我想問你，到底點解魔法師間有唔同顏色？唔同係同屬性有關？起陣時個企位係咪有咩含意？」





我心有有好多疑問，本來都唔想理咁多，但宜家聯盟開始指派任務畀我，睇黎都係瞭解多啲好。

「你個問題少年丫，你黎緊去邊呀？我地一路行一路講啦。」Aaron再次拍我膊頭。

見時間咁早，我決定落一落深水埗，順便上下高登。

雖然高登宜家已經無人。

當我地準備再次落月台搭地鐵既時候，其他魔法師早已四散，連Leon都唔例外，睇怕佢地都係唔想係用完魔力之後畀黑魔法師撞到。





係往太子方向既列車，Aaron佢拎出部電話係咁㩒，之後同我講：

「係解答你所有問題前，首先要畀你知道下五芒星魔法陣既基本構成，用圖黎表示既話，就好似咁。」佢講完之後就畀部電話我睇。



「原來唔同顏色代表唔同屬性！乜原來我係金屬性，咁黑魔法師果啲又點計？個個都黑媽媽咁。」我一臉恍然大悟既表情。

「呃…其實呢…」就係Aaron佢吞吞吐吐既時候，我地已經要轉車。

「都係陣間坐低先慢慢講啦。」Aaron個表情有少少奇怪，好似…

好似有啲尷尬咁。





落到深水埗，可能因為消耗咗魔力既關係所以有啲肚餓，所以都係去茶記醫肚先。

「等我嗌野先。唔該！茶餐要通粉，凍檸茶少甜少冰！」我急不及待搶先落單。

「西多，熱奶茶。」Aaron落完單之後一反常態咁沉默起黎。

「繼續返頭先個話題丫，咁即係點？」我忍唔住問。

「其實…古時既所謂五行，都係由魔法師既魔力特性而黎…」Aaron佢欲言又止。

「吓？唔係呀？呢個世界好似咩古老野都同魔法師有關咁既？」我到宜家都依然覺得呢啲資訊衝擊力十足。

「係呀。就以我地白色魔法師為例，由於我地係十分稀有既存在，係魔法師中只會係少數，所以被譽為黃金一般珍貴，所以慢慢就被分類成金屬性。」

唔撚係呀，咁都得？





「唔好呃我喎，明知我係新手都唔使咁既。都完全唔合理既！」我一臉狐疑。

「唉，唔係你問到我都唔想講咁多。知唔知成為魔法師既原因會決定魔力既種類，即係顏色？」Aaron已經開始垂頭喪氣咁款。

「唔知，無人同我講過。呢啲樣我估連Google都Google唔到啦。」我宜家真係想知。

「要成為白色魔法師，條件就係堅守到只同心愛既人破處呢個信念而保留處子之身，係成為魔法師果時就會因為體內純潔無暇既魔力，而成為白魔法師。」Aaron把聲已經細到聽唔到咁滯。

「無理由，無理由既！明明五行有相生相尅架嘛，咁講點講得通！」我知魔法師對歷史同文化影響深遠﹐但都應該有個底。

「有關係架，其它既魔力來源係咩﹑點相生相尅法，等我食完野慢慢同你講啦…」隨著夥計將一碟碟野食掉上檯，Aaron佢耷低頭，默默咁食佢既火腿通粉。

因為佢之後同我講既，係一段悲慘既歷史。