〈是咁的，我是一個童貞魔法師〉: <黑魔法師的起源>

係魔法興盛既年代，唔同地方既人都用唔同既方法去研究點發揮魔法既最大力量。佢地試過用文字﹑符號﹑咒術同陣法之類去加強魔力同魔力元素既聯繫。因為本來靠自身魔力去發動魔法，因種種原因唔能夠同魔力元素百分之百發生作用，但係透過以上方法就可以更有效率咁使用魔力。

但隨住科學既興起，係戰爭時魔法既優勢開始減弱。為咗維持魔法師既價值，係差唔多同一個時期，全世界有魔法師組織既地方都做咗同一件事：

大型魔法陣。

大型魔法陣既原理係透過用灌注咗魔力元素既魔法道具，配合埋一定數量既魔法師一齊依陣法起陣，目的係將原本散佈係全世界既魔力元素永久集中係大型魔法陣內，等魔法師可以更有效率咁施展魔法。

一開始都好順利，魔法師既地位亦再次提高﹐而佢地亦大肆地用係戰爭方面。點知後來，全世界大部分既魔力元素都突然間消失咁滯。而剩底既，就只夠我地發起結界之用。





而由果日起，本來無分彼此既魔法師同黑魔法師就慢慢開始形成對立關係。

「所以話，本來魔法師同黑魔法師就唔係對立既，就好似我咁，係同魔法師聯盟企係同一陣線既。」阿賤得戚咁講。

「吓？咁點分得出呀？咁你平日突然比魔法師挑戰點搞？」我越來越多野唔明白。

「你記唔記得你當初點成為魔法師？」佢問。

「呃…佢地話當初有個人將魔法種子打到我度嘛。」我自己都快唔記得。





「無錯，就係有個純種魔法師將魔法種子打入你度﹐去完整你體內既魔法迥路。而成為黑魔法師主要有兩種方法。一就係一個魔法師破處，二就係果個人本來唔係魔法師，但係佢繼承咗佢老豆既魔法迥路，但就無係變成魔法師既情況下就已經破處。之後就有三條路。」阿賤講唔停。

「邊三條路？」我都好有興趣知道。

「一係畀純種魔法師發掘同邀請﹐再打另一種魔法種子打入，咁係呢種情況下形成既魔法迥路，係唔會對魔法師平時發起挑戰既起陣式作出反應。二就係畀黑魔法師發掘同邀請，直接灌輸魔力去完成體內既魔法迥路，成為同魔法師爭奪魔力既黑魔法師。三就係無人理，從此過住平凡人既生活。」阿賤講完之後望住我，好似等我問佢問題咁。

「咁如果我無估錯，你就係第一種情況啦？」我極力整理思緒。

「無錯，所以你大可以放心啦。」阿賤笑住講。





點解我好似乜都唔知咁架？明明入咗會都已經有幾個月，但係仲好似戇鳩鳩咁唔知頭唔知路。

「喂！唔公平喎！點解你知多咁多野架！」我忍唔住問。

「因為我早過你，上年已經成為黑魔法師。你呀，嗌野食或野飲先啦！」阿賤一面認真。

「你請呀死仔！」我真係有啲嬲。

「無問題。本來聯盟一早想同你講更多背景，但係見你咁忙，先安排我黎同你講。」

「仲有咩我宜家係需要知架？」

「暫時無喇﹐到你考完最後一科試之後，聯盟會安排任務﹐或者搵人教下你同人組陣法之類。」

「吓？任務？陣法？」





「係，咪好似之前Leon同Aaron佢地咁，幫下手帶下新人之類。」阿賤講完之後一口氣飲晒杯咖啡。

「咁仲有咩陣法呢？」

「本來唔應該宜家同你講，但見係你…你睇咗呢張相先啦。」阿賤跟手畀佢部電話我睇。



「吓？做咩事？」我唔明白。

「頂你真係連高登都唔上，呢張圖係之前有人post上網話有五條毒撚係同一卡地鐵上著埋間條衫，話毒撚有樣睇既圖。」阿賤好激氣咁講。

「屌我真係好忙嘛！咁有咩關係？」





「佢地就係係地鐵入面起緊陣，五個人一粒五芒星。而地鐵，就係現時魔法師同黑魔法師之間既主戰場。」阿賤變得神色凝重。

「點解係地鐵呀？」

「因為﹐大部分地鐵都係地脈之上，即係一般人講既龍脈。邊一邊用佢地佔既陣佔得更多地脈之力，就可以係果個範圍內用得更多魔力，同回復得更快。」

「哦，咁兩方面都好唔得閒？」

「本來唔係，因為雙方年年都有代表會面商討勢力分佈，所以一般唔會有咩改動。」

「哦，咁咪好囉，仲搞咁多做乜？」我鬆一口氣。

「但係自從三年前一款電話遊戲出現後，就開始打破咗局面。而個遊戲將會重新包裝推出過，相信會令情況更加惡化。個新遊戲就係叫Pokemon GO。」