[惡搞無極限] 就係咁，我同幾個豬朋上左大陸獵金: ４０３　白雪危機

睇左阿爸比我地既第三封信，仲可以幫阿妹解決左佢既陰影，呢一行真係收獲好大，最重要既係已經知道晒所有遺書既去向，小燕子果封睇唔睇到我覺得只係時間問題，而白雪公主果封……雖然我對呢個女仔印象幾深，不過，聽完阿倫同阿輝講既說話後，總覺得佢係另一個阿欣。

我地係呢個地方留多左一晚，而大家都因為某件事成功後戒心放得左好多，所以決定今晚好好食一餐同玩下。

可能就係呢一個放鬆既心情，令到我地危險意識慢慢低起上黎。

而接落黎發生左件事，係發生於當晚大家返晒房訓覺既時候。

唔知點解，我訓唔著，但又唔想嘈醒已經訓左既阿欣，就諗住出去行下，而一出到房門，一個熟識既身影出現係呢條走廊既盡頭。





係白雪公主，我見到佢本來想行過去，但佢見到我咁做後，即刻跑走左，聽阿倫同阿輝既說話，記得佢地講過佢地玩緊捉迷藏，見訓唔著，我就試下今晚捉唔捉到佢先。

但係佢好似有意無意咁引我去某個地方咁，因為當我每轉一個彎，都會見到佢係走廊等緊我，而走到最後一個無路可走既走廊時，佢就停左係度等我行過去。

而到我行到佢既面前，佢就同我講：「點解？」

佢咁樣一問，我露出一個不解既笑問佢：「咩野點解？」

「點解你會有佢陣味？」佢問。





「邊個佢？」我又問返佢。

「點解你會有花木蘭既味？」佢問。

當我諗緊要點答佢果陣，佢突然向我個頭打左一下，然後，我就暈低左，而係我暈低前，我聽到佢講左句：「碇司令要既野，無人可以搶。」