[惡搞無極限] 就係咁，我同幾個豬朋上左大陸獵金: ２９９　第二封遺書（只得半封）

下！？究竟仲有幾多樣野係預料之外架！！！

不過聽阿妹咁講，其實都似，佢平時一坐司機位都變左另一個人咁，佢有另一個人格都不出為奇。

只不過，點解阿妹咁驚佢另一個人格出黎呢？呢個我都無再深究落去。

扶起左阿妹後，我地就去搵頭盔男，佢帶左我地去另一個地方，比呢度裹少少，地點難搵少少，甚至係一個連電話訊號都收唔到既地方。

「你地都保管我幾小心ＷＯ。」我一邊行一邊話，而頭盔男就笑一笑講：「這個是前當家交付我們要做的事，我們一定要做到最好。」





最後我地行到一間石室，而石室上入面只係我一個夾萬。

頭盔男用左一個好繁複既密碼開左個夾萬後，就拎左果半封遺書出黎。

「這半封遺書是我們前當家奮不顧身搶回來的，所以，你們一定要好好保護它。」佢將半封遺書交到我同阿妹面前。

「妳開？定我開？」我問阿妹，而阿妹就答：「我地兩個一齊開。」

第二封遺書





賢仔、可兒：

仲記唔記得我同你玩樂既
鐘意既，係玩結他，可兒
ＥＥＹＯＲＥ公仔。

妳成日都話，佢好似妳，
自己但又唔敢，傻豬，爸

而家諗返起，同你相處既




呢一刻，我先係度諗我係
出去做野賺錢養家，但係
少少時間陪你地。

唔駛等到而家呢一刻，先

如果可以既話，我真係想
ＥＥＹＯＲＥ公仔，可以

阿爸　字

我同阿妹望住呢半封遺書，雖然一臉疑惑，但只要係阿爸既字，我地就好開心。