[惡搞無極限] 就係咁，我同幾個豬朋上左大陸獵金: ２７５　火焰山

其實，同阿欣一齊去跟蹤阿俊，我擔心佢發癲多過比阿俊發現。

阿倫同阿輝都話阿俊有Ｄ問題，事出必有因，我信佢地兩個，只不過我想自己去查下阿俊佢係同邊Ｄ人一齊先再下定論。

「阿賢，我頭先有記低阿俊去左邊度，係未好叻啊。」阿欣拎左本小簿仔比我，我睇一睇本簿仔，見到既，係一大堆時間同地點。

「做得好。」我讚阿欣，佢開心到飛起。

而我再細心咁睇下佢去過既地方，有一個比較特別，所以我問阿欣：「呢度係邊度啊？」我問佢既地方，係寫住「荒廢左既石屋村（去過，我仲瘋狂踢一個人既下面）」。





而阿欣睇到後，就話：「佢去左果晚我地同方中瀡搵個癲佬既地方。」

我諗一諗，然後再問佢：「果個不停問你姑娘多少錢果個人？」

「係啊……我記得拿，係阿妹既舅父啊。」阿欣話，無錯，係大寶既地方，我再睇一睇個時間，咦，未就係我地發現大寶比人倒吊左係到，同埋阿妹見到二號機個時間前囉！

「阿欣，妳記唔記得阿俊呢個時間同邊Ｄ人傾野？」我即刻問。

「有啊，我之前未話阿俊同一個女人傾計，個女人好似以前某動畫中一個女角架。」佢答我。





「係未新世紀福音戰士啊？」我問佢，而佢一個恍然大悟咁話：「係啊係啊，就係呢套啊，個女仔好似著紅色衫果個女角架。」

阿欣見到既果個女仔，係二號機。

「咁妳有無見佢做Ｄ咩啊？」我問佢，然後佢諗左諗就話：「好似同阿俊講左Ｄ野，阿俊好似有Ｄ驚佢，然後個女行開左陣，阿俊就原地等佢，係等佢果陣我聽到有把男人聲叫得好凄厲，等左都有一段時間後個女人先返黎，仲同搵住阿俊走。」

原來當我同阿妹見到大寶比人倒吊住既時候，阿欣同阿俊都係附近。

「咁之後呢？」我繼續問，而阿欣就答我：「之後我都繼續跟架，但唔知點解多左好多人出黎同我玩，但我有記住阿賢比我既重要任務架，所以我都唔同果Ｄ人玩咁耐，個個我都係速戰速決，不過最後都係跟甩左。」阿欣擺出一臉既愧疚。





「傻豬唔駛咁，妳已經好叻拿，咁妳最後跟到邊？」我問佢，而剛剛聽完我讚佢既阿欣笑得好天真咁答我，「係呢度。」阿欣指住本簿仔。

我望住佢所指既三個字，「下？火焰山？」

「係啊，火焰山。」阿欣答我。

唔係掛，先前阿妹話大寶要搵果五個女人中，有一個係鐵扇公主，唔通就係呢個火焰山入面？